ಸಮಾಜಕ್ಕೆ ಬೆಳಕು ನೀಡುವ ಜ್ಞಾನ ನೀಡಿ

ರಾಜ್ಯದ ಜನರಿಗೆ ಹಲವಾರು ಭಾಗ್ಯಗಳನ್ನು ಕಲ್ಪಿಸಿರುವ ರಾಜ್ಯದ ಮುಖ್ಯಮಂತ್ರಿ ಸಿದ್ಧರಾಮಯ್ಯನವರು ಶಿಕ್ಷಣ ಇಲಾಖೆಯ ಸಬಲೀಕರಣಕ್ಕೆ ಶಿಕ್ಷಕರ ಭಾಗ್ಯ ಕಲ್ಪಿಸಬೇಕೆಂದು ವಿಧಾನ ಪರಿಷತ್ ಸದಸ್ಯ ಬಸವರಾಜ ಹೊರಟ್ಟಿ ಒತ್ತಾಯಿಸಿದರು.

 

ಪಟ್ಟಣದ ವಿದ್ಯಾ ಪ್ರಸಾರಕ ಸಮಿತಿಯ ಸುವರ್ಣ ಮಹೋತ್ಸವ ಸಮಾರಂಭದಲ್ಲಿ ಸಂಸ್ಥೆಯ ಆಂಗ್ಲ ಮಾಧ್ಯಮ ಶಾಲಾ ಕಟ್ಟಡ ಉದ್ಘಾಟಿಸಿ ಮಾತನಾಡಿದ ಅವರು, ಸರ್ಕಾರ ಕಳೆದ ಹಲವು ವರ್ಷಗಳಿಂದ ಪದವಿ ಪೂರ್ವ ವಿದ್ಯಾಲಯಗಳಿಗೆ, ಪ್ರೌಢಶಾಲೆ ಮತ್ತು ಪ್ರಾಥಮಿಕ ಶಾಲೆಗಳಿಗೆ ನಿಗದಿತ ಶಿಕ್ಷಕರನ್ನು ನೇಮಕ ಮಾಡುವುದನ್ನು ಬಿಟ್ಟು ವಿವಿಧ ಭಾಗ್ಯ ಕಲ್ಪಿಸುತ್ತಿದೆ. ಶಿಕ್ಷಣದ ಗುಣಮಟ್ಟ ಸುಧಾರಣೆಗೆ ಮುಖ್ಯಮಂತ್ರಿಗಳು ಮೊದಲಿಗೆ ಶಿಕ್ಷಕರ ನೇಮಕಾತಿಗೆ ಮುಂದಾಗಲಿ ಎಂದು ಹೇಳಿದರು. 

 

ಗುಣಮಟ್ಟದ ಶಿಕ್ಷಣ ನೀಡುತ್ತಿರುವ ರಾಜ್ಯದ ಖಾಸಗಿ ಶಿಕ್ಷಣ ಸಂಸ್ಥೆಗಳ ಅಭಿವೃಧ್ಧಿಗೆ ಬೇರೆ ರಾಜ್ಯದಿಂದ ಆಗಮಿಸಿರುವ ಐಎಎಸ್ ಅಧಿಕಾರಿಗಳು ಶ್ರಮಿಸುವ ಬದಲು ಅವುಗಳ ನಿಯಂತ್ರಣಕ್ಕೆ ಮುಂದಾಗುತ್ತಿದ್ದಾರೆ ಎಂದು ಅಸಮಧಾನ ವ್ಯಕ್ತಪಡಿಸಿದ ಅವರು ಒಂದು ವೇಳೆ ಖಾಸಗಿ ಶಿಕ್ಷಣ ಸಂಸ್ಥೆಗಳ ಮಾಯವಾದರೆ ಶಿಕ್ಷಣ ವ್ಯವಸ್ಥೆಯ ಮೇಲೆ ವ್ಯತಿರಿಕ್ತಪರಿಣಾಮ ಬರಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.

 

ಕನಿಷ್ಠ ಪ್ರಾಥಮಿಕ ಹಂತವನ್ನಾದರೂ ಕನ್ನಡ ಮಾಧ್ಯಮದಲ್ಲಿ ಕಲಿತ ವಿದ್ಯಾರ್ಥಿಗಳು ಉನ್ನತ ಮಟ್ಟದ ಶಿಕ್ಷಣ ಪಡೆಯಲು ಸಹಕಾರಿಯಾಗುತ್ತದೆ. ಐಟಿಬಿಟಿ ಆರಂಭದ ನಂತರ ಬಹುತೇಕ ಪಾಲಕರಲ್ಲಿ ಇಂಗ್ಲೀಷ ವ್ಯಾಮೋಹ ಹೆಚ್ಚಾಗಿದೆ. ಆದರೆ ಎಂಟೆಕ್ ಮತ್ತು ಬಿಇ ಓದಿರುವ ಸುಮಾರು 7ಸಾವಿರ ವಿದ್ಯಾವಂತರ ನಿರುದ್ಯೋಗಿಗಳಾಗಿದ್ದಾರೆ. ಇಂದು ಕನ್ನಡ ಭಾಷೆಯೇ ಜೀವನ ನಿರ್ವಹಣೆಗೆ ಅಗತ್ಯವಾಗಿದೆ ಎಂದು ಅವರು ಹೇಳಿದರು.

ವಿದ್ಯಾಪ್ರಸಾರಕ ಸಮಿತಿಯ ಸುವರ್ಣ ಸಂಭ್ರಮಾಚರಣೆ ಹಿನ್ನೆಲೆಯಲ್ಲಿ ಉಂಟಾದ ಜನದಟ್ಟಣೆ, ವಾಹನ ದಟ್ಟಣೆಯಿಂದ ರೈತರು, ಶಾಲಾ ಮಕ್ಕಳು, ನ್ಯಾಯಾಲಯಗಳಿಗೆ ಹೋಗುವವರಿಗೆ ಕಿರಿಕಿರಿಯಾಯಿತು. 

 

ಕೃಷಿ ಇಲಾಖೆ, ನ್ಯಾಯಾಲಯ, ಶಾಲೆ ಕಾಲೇಜಿಗೆ ಹೋಗುವವರಿಗೆ ಕೋರ್ಟ್‌ ರಸ್ತೆಯಲ್ಲಿ ಅಡೆತಡೆ ಹಾಕಿದ್ದ ಪೊಲೀಸರ ಕ್ರಮದಿಂದ ತೀವ್ರ ತೊಂದರೆಯಾಯಿತು. ಅರಮನೆ ಆವರಣದಲ್ಲಿ ನಡೆದ ಕಾರ್ಯಕ್ರಮ ಸಲುವಾಗಿ ಪೊಲೀಸರು ಮುಖ್ಯ ರಸ್ತೆಯಲ್ಲಿಯೇ ತಡೆದು ನಿಲ್ಲಿಸಿದ್ದರಿಂದ ಟ್ರಾಫಿಕ್ ಜಾಮ್ ಕೂಡ ಆಗಿತ್ತು. 

 

ಸೋಮವಾರ ಕೋರ್ಟ್‌ನ ಕಲಾಪಗಳು ನಡೆಯಲು ಧ್ವನಿ ವರ್ಧಕದ ಕಿರಿಕಿರಿಯಾಗಿದ್ದರೂ ಪೊಲೀಸರು ಮತ್ತು ಕೋರ್ಟಿನವರು ಚಕಾರ ಎತ್ತದೇ ಮೌನವಹಿಸಿದ್ದರು. ನಿವೃತ್ತ ನ್ಯಾಯಾಧೀಶರೊಬ್ಬರನ್ನು ಮುಖ್ಯ ಸಮಾರಂಭಕ್ಕೆ ಆವ್ಹಾನಿಸಿದ್ದರಿಂದ ಸಾರ್ವಜನಿಕರ ತೊಂದರೆಗಳನ್ನು ಮೀರಿ ಎಲ್ಲವೂ ನಿರರ್ಗಳವಾಗಿ ನಡೆಯಿತು. ಕಿಲ್ಲಾ ಗಲ್ಲಿಯ ಜನ, ಶಾಲೆಗಳಿಗೆ ಹೋಗುವ ಮಕ್ಕಳ ಪಾಲಕರು, ಕೋರ್ಟ್‌ಗೆ ಹೋಗುವವರು ಸಾಕಷ್ಟು ತೊಂದರೆಗೆ ಸಿಲುಕಿಕೊಂಡರು. ಮುಖ್ಯ ಸಮಾರಂಭವೇ ಸುಮಾರು ಒಂದು ಗಂಟೆಗೂ ಹೆಚ್ಚು ಕಾಲ ತಡವಾಗಿ ಆರಂಭಗೊಂಡದ್ದಕ್ಕೆ ಪ್ರೇಕ್ಷಕರೂ ಬೇಸರ ಪಟ್ಟರು.