ಸಹೋದರ ಭಾಷೆಗೂ ಸಮಾನ ಮನ್ನಣೆ ಸಿಗಲಿ

ಆರ್.ಗುಂಡೂರಾವ್ ಸಭಾಂಗಣ, ಎದುರ್ಕುಳ ಶಂಕರನಾರಾಯಣ ಭಟ್ ಪ್ರಧಾನ ವೇದಿಕೆ, ಕುಶಾಲನಗರ: ಕನ್ನಡ ಭಾಷೆಯ ಸಹೋದರ ಭಾಷೆಗಳಿಗೆ ಸಮಾನ ಮನ್ನಣೆ ನೀಡುವ ಮೂಲಕ ಅವುಗಳ ಬೆಳವಣಿಗೆಗೆ ಪ್ರೋತ್ಸಾಹ ನೀಡಬೇಕು ಎಂದು ಸಾಹಿತಿ ಬಂಜಗೆರೆ ಜಯಪ್ರಕಾಶ್ ಹೇಳಿದರು.

ಇಲ್ಲಿನ ರೈತ ಸಹಕಾರ ಭವನದ ಆವರಣದಲ್ಲಿ ಏರ್ಪಡಿಸಿದ್ದ 11ನೇ ಕೊಡಗು ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಬುಧವಾರ ನಡೆದ ಭಾಷೆ ಮತ್ತು ಬದುಕು ವಿಚಾರಗೋಷ್ಠಿಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಕನ್ನಡ ಭಾಷೆ ಕೊಡವ ಭಾಷೆ, ತುಳು ಸೇರಿದಂತೆ ಇನ್ನಿತರ ಸಹೋದರ ಭಾಷೆಗಳ ಮೇಲೆ ಆಧಿಪತ್ಯ ನಡೆಸಬಾರದು. ಬದಲಿಗೆ ಸಹೋದರ ಭಾಷೆಗಳ ಬೆಳವಣಿಗೆಗೆ ಒತ್ತಾಸೆಯಾಗಬೇಕು ಎಂದು ಹೇಳಿದರು.

ಪ್ರಗತಿಪರ ಚಿಂತನೆಯ ಸಾಹಿತ್ಯದಲ್ಲಿ ಧನಾತ್ಮಕ ಹಾಗೂ ನಕಾರಾತ್ಮಕ ಆಲೋಚನೆಗಳನ್ನು ರೂಢಿಸಿಕೊಂಡು ಸಾಹಿತ್ಯ ಕೃಷಿಯಲ್ಲಿ ತೊಡಗಿಸಿಕೊಳ್ಳುವ ಮನಸ್ಥಿತಿ ವಿದ್ಯಾರ್ಥಿಗಳು ಮತ್ತು ಕನ್ನಡ ಸಾಹಿತ್ಯಾಭಿಮಾನಿಗಳಲ್ಲಿ ಬೆಳೆಯಬೇಕು ಎಂದರು.

ಆಧುನಿಕ ಮತ್ತು ಸಾಂಪ್ರದಾಯಿಕ ಕೃಷಿಯಲ್ಲಿ ಬದುಕು ಎಂಬ ವಿಚಾರ ಕುರಿತು ಮಾತನಾಡಿದ ಉಪನ್ಯಾಸಕ ಜಯಕುಮಾರ್, ಆಧುನಿಕ ಬೇಸಾಯ ಪದ್ಧತಿಯಿಂದ ಕೃಷಿ ಉತ್ಪನ್ನಗಳು ವಿಷಕಾರಿ ಅಹಾರವಾಗಿ ಮಾರ್ಪಡುತ್ತಿವೆ. ಇಂಥ ವಿಷಕಾರಿ ಆಹಾರ ಸೇವನೆಯಿಂದ ಆರೋಗ್ಯ ಸ್ಥಿತಿ ಹದಗೆಡುತ್ತಿದೆ ಎಂದರು.

ರೈತರು ಭೂಮಿಯೊಂದಿಗೆ ಸಂಘರ್ಷದ ಹಾದಿ ಹಿಡಿದಿದ್ದಾರೆ. ಕೃಷಿಯಲ್ಲಿ ರಾಸಾಯನಿಕ ಗೊಬ್ಬರಗಳನ್ನು ಹೆಚ್ಚಾಗಿ ಬಳಕೆ ಮಾಡುವ ಮೂಲಕ ಮಣ್ಣಿನ ಫಲವತ್ತತೆಯನ್ನು ನಾಶ ಮಾಡುತ್ತ ತಮ್ಮ ಬದುಕನ್ನೂನಾಶ ಮಾಡಿಕೊಳ್ಳುತ್ತಿದ್ದಾರೆ ಎಂದು ವಿಷಾದ ವ್ಯಕ್ತಪಡಿಸಿದರು.

ಉತ್ತಮ ಆರೋಗ್ಯ ಸುಧಾರಣೆಗೆ ಸಾವಯವ ಬೇಸಾಯ ಪದ್ಧತಿ ತುಂಬ ಅಗತ್ಯವಾಗಿದ್ದು, ರೈತರು ಈ ನಿಟ್ಟಿನಲ್ಲಿ ಚಿಂತನೆ ನಡೆಸಬೇಕು. ಸಾವಯವ ಕೃಷಿಗೆ ಆದ್ಯತೆ ನೀಡಬೇಕು. ಕೃಷಿ ಅಧಿಕಾರಿಗಳು ಕೂಡ ರೈತರಿಗೆ ಅಗತ್ಯ ಮಾಹಿತಿ ನೀಡುವ ಮೂಲಕ ಅರಿವು ಮೂಡಿಸಲು ಮುಂದಾಗಬೇಕು ಎಂದರು.

ಕೃಷಿಯಲ್ಲಿ ಜಾನಪದ ಸಾಹಿತ್ಯ ಕುರಿತು ವಿಚಾರ ಮಂಡಿಸಿದ ಪ್ರಗತಿಪರ ಕೃಷಿಕ ಅಳುವಾರದ ಪ್ರೇಮ್ ಕುಮಾರ್, ಕೃಷಿಯಿಂದ ರೈತರ ಬದುಕು ಹಸನಾಗುತ್ತದೆ. ರೈತರು ಹಣಗಳಿಸುವ ಉದ್ದೇಶದಿಂದ ಕೃಷಿಯಲ್ಲಿ ತೊಡಗಬಾರದು. ರೈತ ಕುಟುಂಬದವರು ತಮ್ಮನ್ನು ಪರಿಪೂರ್ಣವಾಗಿ ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಲ್ಲಿ ಮಾತ್ರ ಸಾರ್ಥಕ ಬದುಕು ರೂಪಿಸಿಕೊಳ್ಳಲು ಸಾಧ್ಯವಾಗುತ್ತದೆ ಎಂದರು.

ಕನ್ನಡ ಸಾಹಿತ್ಯ ಪರಿಷತ್‌ನ ಜಿಲ್ಲಾ ಘಟಕದ ಅಧ್ಯಕ್ಷ ಬಿ.ಎಸ್.ಲೋಕೇಶ್ ಸಾಗರ್, ಸಮ್ಮೇಳಾನಾಧ್ಯಕ್ಷ ಎಸ್.ಸಿ.ರಾಜಶೇಖರ್, ಉದ್ಯಮಿ ಹಂಡ್ಲಿ ವೇದಕುಮಾರ್, ಸಮಾಜ ಸೇವಕ ಜಿ.ಎಂ.ಕಾಂತರಾಜ್ ಉಪಸ್ಥಿತರಿದ್ದರು.  ನಿವೃತ್ತ ಶಿಕ್ಷಕ ಸೋಮಪ್ಪ ಸ್ವಾಗತಿಸಿದರು. ಪ.ಪಂ.ಸದಸ್ಯ ಎಂ.ನಂಜುಂಡಸ್ವಾಮಿ ನಿರೂಪಿಸಿದರು. ದಾಮೋದರ್ ವಂದಿಸಿದರು. ಎಚ್.ಬಿ.ದಿನೇಶಾಚಾರಿ ನಿರ್ವಹಣೆ ಮಾಡಿದರು.

ಓದುವ ಅಭಿರುಚಿ ಬೆಳೆಸಿಕೊಳ್ಳಿ
ಸಮ್ಮೇಳನದ ಮಕ್ಕಳಗೋಷ್ಠಿಯಲ್ಲಿ ಪುಟಾಣಿಗಳು ನಿರರ್ಗಳವಾಗಿ ಮಂಡಿಸಿದ ವಿಚಾರಗಳು ಗಮನ ಸೆಳದವು. ಬದಲಾಗುತ್ತಿರುವ ಜೀವನ ಶೈಲಿ ಕುರಿತು ವಿಷಯ ಮಂಡಿಸಿದ ಕೃತಜ್ಞ ಬೆಸೂರು, ಬದಲಾಗುತ್ತಿರುವ ಜೀವನ ಶೈಲಿಯನ್ನು ಒತ್ತಡದ ಬದುಕಿನ ಅನಿವಾರ್ಯತೆಯಿಂದಾಗಿ ಜನ ಅನುಕರಣೆ ಮಾಡುತ್ತಿದ್ದಾರೆ ಎಂದರು.