ಗುಜರಿ ವಸ್ತುವಿನಿಂದ ಮರ ಏರುವ ಯಂತ್ರ

 

ಅಗಸ್ತ್ಯ ಅಂತರರಾಷ್ಟ್ರೀಯ ಫೌಂಡೇ­ಷನ್, ಹುಬ್ಬಳ್ಳಿ–ಧಾರವಾಡ ಮಹಾನಗರ ಪಾಲಿಕೆ, ದೇಶಪಾಂಡೆ ಫೌಂಡೇಷನ್, ಜೆ.ಎಸ್.ಡಬ್ಲ್ಯು ಹಾಗೂ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಆಶ್ರಯದಲ್ಲಿ ನಡೆಯುತ್ತಿರುವ ಪ್ರದರ್ಶನದಲ್ಲಿ ಗುಜರಿ ವಸ್ತುಗಳನ್ನು ಸಂಘಟಕರೇ ಪೂರೈಸಿದ್ದರು. ತಮಗೆ ಬೇಕಾದ ವಸ್ತುಗಳನ್ನು ಆಯ್ದುಕೊಂಡ ವಿದ್ಯಾರ್ಥಿಗಳು ಅವುಗಳಿಗೆ ‘ಜೀವ’ ತುಂಬಿದರು.

 

ಕೊಪ್ಪಳ ಜಿಲ್ಲೆ ಮೂಗನೂರು ಗ್ರಾಮದ ಸರ್ಕಾರಿ ಶಾಲೆ ವಿದ್ಯಾರ್ಥಿಗಳಾದ ರವಿಕಿರಣ ಸುರಳಿಕಲ್ಲು ಮತ್ತು ಸಂತೋಷ ಗೌಡರ ಸುಲಭವಾಗಿ ಮರ ಏರಲು ಸಹಕಾರಿಯಾಗುವ ಯಂತ್ರ ತಯಾರಿಸಿದ್ದರು. 

 

ಕಬ್ಬಿಣದ ಕಂಬಕ್ಕೆ ಕಬ್ಬಿಣದಿಂದ ತಯಾರಿಸಿದ 35 ಡಿಗ್ರಿ ಬಾಗಿದ ಮತ್ತೊಂದು ವಸ್ತುವನ್ನು ಸಿಲುಕಿಸಿ ಅದರ ಮೇಲೆ ಕಾಲಿಟ್ಟು ಮೇಲೇರಬಹುದು ಎಂಬುದು ಈ ವಿದ್ಯಾರ್ಥಿಗಳ ಅನಿಸಿಕೆ. ಕಾಲಿಡುವ ವಸ್ತುವಿನ ಮೇಲೆ ಹೆಚ್ಚು ಭಾರ ಬೀಳದಂತೆ ಮಾಡಲು ಮತ್ತು ಕಂಬ ಏರುವ ವ್ಯಕ್ತಿ ದೇಹದ ಸಮತೋಲನ ಕಾಯ್ದುಕೊಳ್ಳಲು ಸಹಕಾರಿಯಾಗುವಂತೆ ಕಬ್ಬಿಣದ ಕೋಲನ್ನು ಕೂಡ ಬಳಸಬಹುದು ಎಂದು ರವಿಕಿರಣ ಮತ್ತು ಸಂತೋಷ ವಿವರಿಸಿದರು.

 

ಪ್ಲಾಸ್ಟಿಕ್ ಕುರ್ಚಿ, ಗೋಣಿಚೀಲ ಮತ್ತಿತರ ವಸ್ತುಗಳನ್ನು ಬಳಸಿ ಭೂಮಂಡಲ, ಸೂರ್ಯ, ಗ್ರಹಗಳು ಮತ್ತು ಅವುಗಳ ಚಲನೆಯನ್ನು ಜಿಂದಾಲ್‌ ಶಾಲೆಯ ಶಶಾಂಕ ಮತ್ತು ಆರ್ಯನ್‌ ವಿವರಿಸಿದರು.

 

ನೂಲ್ವಿ ಸರ್ಕಾರಿ ಶಾಲೆಯ ಗೌರಮ್ಮ ಹಕಾರಿ ಮತ್ತು ನಾಗರತ್ನ ದಾನಪ್ಪಗೌಡ್ರ ಹಳೆಯ ಪ್ಲಾಸ್ಟಿಕ್ ಬಾಟಲಿಗಳನ್ನು ಬಳಸಿ ಗಾಳಿಯ ಚಲನೆಗೆ ಅನುಗುಣವಾಗಿ ನೀರು ಸಾಗಿಸುವ ತಂತ್ರದ ಮಾದರಿಯನ್ನು ಪ್ರದರ್ಶಿಸಿದರು. ವಿಜಯಪುರದ ಎಕ್ಸಲೆಂಟ್ ಶಾಲೆ ವಿದ್ಯಾರ್ಥಿಗಳಾದ ರೋಹಿತ್ ಸಿ ಮತ್ತು ಕಿರಣ ಸಿ ಡಬ್ಬಗಳು, ಅಯಸ್ಕಾಂತ ಇತ್ಯಾದಿ ಬಳಸಿ ಪವನ ಯಂತ್ರದ ಮಾದರಿಯನ್ನು ತಯಾರಿಸಿದ್ದಾರೆ. ಒಟ್ಟು ಹದಿನೈದು ಶಾಲೆಗಳ ವಿದ್ಯಾರ್ಥಿಗಳು ಮಾದರಿಗಳನ್ನು ಸಿದ್ಧಪಡಿಸಿದ್ದಾರೆ. 

 

ಅಗಸ್ತ್ಯಾ ತಂಡದವರು ನಟ್‌, ಬೋಲ್ಟ್‌, ಸ್ಕ್ರೂ ಇತ್ಯಾದಿಗಳನ್ನು ಬಳಸಿ ತಯಾರಿಸಿದ ಹಕ್ಕಿ, ಪ್ರಾಣಿ, ಕೀಟಗಳ ಮಾದರಿಗಳು ಗಮನ ಸೆಳೆಯುತ್ತಿವೆ. 

 

***