ಬಾಲಕಿಯರ ಹಾಸ್ಟೆಲ್‌ನಲ್ಲಿ ತಾಜಾ ತರಕಾರಿ !

–ನಗರದ ಕೌಲ್‌ಬಜಾರ್‌ನಲ್ಲಿರುವ ಪರಿಶಿಷ್ಟ ಪಂಗಡದ ಮೆಟ್ರಿಕ್‌ ನಂತರದ ಬಾಲಕಿಯರ ವಿದ್ಯಾರ್ಥಿನಿಲಯದ ರೂಪಾ, ಜ್ಯೋತಿ, ತಿರುಮಲ ಅವರು ಸಂತಸದ ಹೇಳುವಾಗ ನಿಲಯದ ಅಂಗಳದಲ್ಲಿ ಎಳೆಬಿಸಿಲು ಮೂಡಿತ್ತು.

 

ಇಲಾಖೆಯಲ್ಲಿ ವಾರ್ಡನ್‌ ಆಗಿ ಕೆಲಸ ಮಾಡಿ ನಿವೃತ್ತರಾಗಿದ್ದ ಯಲ್ಲಮ್ಮ ಅವರನ್ನು ಮತ್ತೆ ವಾರ್ಡನ್‌ ಆಗಿ ಇಲ್ಲಿಗೆ ನಿಯೋಜಿಸಲಾಗಿದೆ. ಅವರು ಈ ಹೆಣ್ಣು ಮಕ್ಕಳಿಗೆ ತಾಯಿಯಂತೆ, ಅಕ್ಕನಂತೆ ಇದ್ದಾರೆ. ಟೆಂಡರ್‌ 

 

ಮೂಲಕ ಬರುವ ಧಾನ್ಯ ಸೇರಿದಂತೆ ಪಡಿತರವನ್ನು ಹೊರತುಪಡಿಸಿದರೆ, ಊಟಕ್ಕೆ ಅಗತ್ಯವಿರುವ ಎಲ್ಲವನ್ನೂ ತರುವ ಹೊಣೆಯನ್ನು ವಿದ್ಯಾರ್ಥಿನಿಯರಿಗೇ ವಹಿಸಿದ್ದಾರೆ. ಅದು ಒತ್ತಾಯವಲ್ಲ ಎಂಬುದು ವಿಶೇಷ.

 

ಹೀಗಾಗಿ ವಿದ್ಯಾರ್ಥಿನಿಯರು ಪಾಳಿ ಪದ್ಧತಿಯಲ್ಲಿ ತಾಜಾ ತರಕಾರಿ ತರುತ್ತಾರೆ. ಪರಿಣಾಮವಾಗಿ ಅಡುಗೆಯೂ ರುಚಿಕಟ್ಟಾಗಿರುತ್ತದೆ. ವಾರಕ್ಕೊಮ್ಮೆ ಮೂವರು ವಿದ್ಯಾರ್ಥಿನಿಯರು ಹಾಗೂ ಅಡುಗೆ ಸಿಬ್ಬಂದಿಯ ಮಾರುಕಟ್ಟೆ ಭೇಟಿ ನಿಗದಿಯಾಗಿರುತ್ತದೆ.

 

12 ಕೊಠಡಿಗಳ ನಿಲಯದಲ್ಲಿರುವ 180 ಮಂದಿ ಪೈಕಿ ಡಿಪ್ಲಮೋ, ಶಿಕ್ಷಕರ ತರಬೇತಿ, ಸ್ನಾತಕೋತ್ತರ ಪದವಿಗಾಗಿ ಓದುತ್ತಿರುವ ವಿದ್ಯಾರ್ಥಿನಿಯರಿದ್ದಾರೆ. ಅವರ ಪೈಕಿ ಕೆಲವು ಗೃಹಿಣಿಯರೂ ಇದ್ದಾರೆ. ಕೊಪ್ಪಳ ಜಿಲ್ಲೆಯ ಕುಷ್ಟಗಿ ತಾಲ್ಲೂಕಿನ ಮಾಟಲದಿನ್ನೆ ಗ್ರಾಮದ ಗೃಹಿಣಿ ಅನ್ನಪೂರ್ಣ ಇದೇ ನಿಲಯದಲ್ಲಿದ್ದುಕೊಂಡೇ ಬಿ.ಇಡಿ ಪದವಿ ಪಡೆದಿದ್ದಾರೆ. ಈಗ ವಿಜಯನಗರ ಶ್ರೀಕೃಷ್ಣದೇವರಾಯ ವಿಶ್ವವಿದ್ಯಾಲಯದಲ್ಲಿ ಇಂಗ್ಲಿಷ್‌ ಎಂ.ಎ ವಿದ್ಯಾರ್ಥಿಯಾಗಿರುವ ಅವರಿಗೆ ಯಮುನಮ್ಮ ಅವರನ್ನು ಕಂಡರೆ ಭರ್ತಿ ಕೃತಜ್ಞತೆ. ‘ಬಿ.ಇಡಿ ವಿದ್ಯಾರ್ಥಿಯಾಗಿದ್ದು ಪರೀಕ್ಷೆ ಎದುರಿಸಬೇಕಾಗಿದ್ದ ಸಂದರ್ಭದಲ್ಲೇ ತಂದೆ ತೀರಿಕೊಂಡಿದ್ದರು. ಆಗ ಖಿನ್ನತೆಯಿಂದ ಕುಗ್ಗಿಹೋಗಿದ್ದ ನನ್ನಲ್ಲಿ ವಾರ್ಡನ್‌ ಆತ್ಮವಿಶ್ವಾಸವನ್ನು ತುಂಬಿದರು. ಅದೊಂದು ಮರೆಯಲಾಗದ ಸಂಗತಿ’ ಎಂದು ಅವರು ನಿಲಯಕ್ಕೆ ಭೇಟಿ ನೀಡಿದ್ದ ‘ಪ್ರಜಾವಾಣಿ’ಗೆ ತಿಳಿಸಿದರು.

 

ಬೇಸ್‌ ತಿಂದು ಬೇಸ್‌ ಓದ್ರಿ: ‘ಓದುವ ಹೆಣ್ಮಕ್ಕಳು ಹಸಿವಿನಿಂದ ಬಳಲಬಾರದು. ಹೀಗಾಗಿಯೇ, ಬೇಸ್‌ ತಿಂದು ಬೇಸ್‌ ಓದ್ರಿ ಎಂದು ಸದಾ ವಾರ್ಡನ್‌ ಹೇಳುತ್ತಾರೆ. ಇಲ್ಲಿ ಇರಲು ಖುಷಿಯಾಗುತ್ತದೆ’ ಎಂಬುದು ಹಿಂದಿ ಶಿಕ್ಷಕ್‌ ತರಬೇತಿ ಸಂಸ್ಥೆಯ ವಿದ್ಯಾರ್ಥಿನಿ ರೂಪ ಅವರ ನುಡಿ. ಕೂಡ್ಲಿಗಿ ತಾಲ್ಲೂಕಿನ ಗುಡೇಕೋಟೆ ಸಮೀಪದ ರಾಮಸಾಗರ ಗ್ರಾಮದ ಅವರಿಗೆ ಈ ನಿಲಯ ಭದ್ರತೆಯ ಭಾವವನ್ನು ಒದಗಿಸಿದೆ.

 

ಕೊರತೆಗಳು: ನಿಲಯದಲ್ಲಿ ಬಿಸಿ ನೀರಿನ ವ್ಯವಸ್ಥೆ ಇಲ್ಲ. ಅದಕ್ಕಾಗಿ ಸೌರ ವಿದ್ಯುತ್‌ ಘಟಕ ಮಂಜೂರಾಗಿದ್ದು ಅಳವಡಿಸಬೇಕಾಗಿದೆ. ಜನರೇಟರ್‌ ಇರುವುದರಿಂದ ವಿದ್ಯುತ್‌ ವ್ಯತ್ಯಯವಾದಾಗ ತೊಂದರೆ ಇರುವುದಿಲ್ಲ. ಕೆಲವರಿಗೆ ಹಾಸಿಗೆ ಕೊಡಬೇಕಾಗಿದೆ. ಗ್ರಂಥಾಲಯವಿದೆ. ಪುಸ್ತಕಗಳು ಇನ್ನೂ ಬರಬೇಕಾಗಿದೆ. ಸಿಸಿ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ ಎಂದು ಯಲ್ಲಮ್ಮ ಮಾಹಿತಿ ನೀಡಿದರು.

 

**

‘ವಿದ್ಯಾರ್ಥಿನಿಯರಿಗೇ ಜವಾಬ್ದಾರಿ’

 

**