ಶಾಸಕರ ಬಂಧನಕ್ಕೆ ಒತ್ತಾಯಿಸಿ ಪ್ರತಿಭಟನೆ

ತರೀಕೆರೆ: ಗುರುವಾರ ನಡೆದ ಎಪಿ ಎಂಸಿ ಚುನಾವಣೆಯ ಮತದಾನದ ವೇಳೆ ಶಿವನಿ ಕ್ಷೇತ್ರದ ಮತಘಟ್ಟೆಗೆ ಅಕ್ರಮವಾಗಿ ಪ್ರವೇಶಿಸಿ ನಕಲಿ ಮತದಾನ ಮಾಡಿದ ಆರೋಪ ಹೊಂದಿರುವ ಶಾಸಕ ಜಿ.ಎಚ್. ಶ್ರೀನಿವಾಸ್ ಹಾಗೂ ಬೆಂಬಲಿಗರನ್ನು ಭಾನುವಾರದೊಳಗೆ ಬಂಧಿಸಬೇಕು. ಇಲ್ಲದಿದ್ದರೆ ಸೋಮವಾರ ಬಿಜೆಪಿ ವತಿಯಿಂದ ಪಟ್ಟಣದಲ್ಲಿ ರಸ್ತೆ ತಡೆ ಸೇರಿದಂತೆ ಬೃಹತ್ ಪ್ರತಿಭಟನೆ ನಡೆಸಲಾಗುವುದು ಎಂದು ಬಿಜೆಪಿ ಮುಖಂಡ ಡಿ.ಎಸ್.ಸುರೇಶ್ ಎಚ್ಚರಿಸಿದರು.

 

ಅವರು ಶುಕ್ರವಾರ ಪಕ್ಷದ ಕಚೇರಿಯಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದರು. ಮತಗಟ್ಟೆಗೆ ನುಗ್ಗಿ 51 ಬ್ಯಾಲೆಟ್ ಪತ್ರಗಳನ್ನು ಚುನಾವಣಾಧಿಕಾರಿಗಳಿಂದ ಕಸಿದುಕೊಂಡು ಶಾಸಕರು ತನ್ನಬೆಂಬಲಿಗರೊಂದಿಗೆ ಅಕ್ರಮ ಮತದಾನ ಮಾಡಿರುವ ಪ್ರಕರಣ ರಾಜ್ಯದಲ್ಲಿ ಪ್ರಥಮವಾಗಿದೆ. ಇದರಿಂದ ಕ್ಷೇತ್ರದ ಜನತೆಯ ಗೌರವಕ್ಕೆ ಧಕ್ಕೆ ಬಂದಿದೆ. ಶಾಸಕರು ಪ್ರಜಾಪ್ರಭುತ್ವದ ಆಶಯಗಳ ಹತ್ಯೆ ನಡೆಸಿದ್ದಾರೆ. ಅವರಿಗೆ ಶಾಸಕರಾಗಿ ಮುಂದುವರೆಯಲು ನೈತಿಕತೆ ಇಲ್ಲದ ಕಾರಣ ರಾಜೀನಾಮೆ ನೀಡಬೇಕೆಂದು ಒತ್ತಾಯಿಸಿದರು.

 

ಮತದಾನ ನಡೆಯುವ ಕೇಂದ್ರದಲ್ಲಿ ಶಾಸಕರನ್ನು ಒಳಬಿಟ್ಟಿರುವ ಬಗ್ಗೆ ಅನುಮಾನಗಳಿದ್ದು, ಚುನಾವಣೆಯಲ್ಲಿ ಭಾಗವಹಿಸಿದ್ದ ಎಲ್ಲ ಅಧಿಕಾರಿಗಳನ್ನು ತನಿಖೆಗೆ ಒಳಪಡಿಸಬೇಕು. ತಾಲ್ಲೂಕಿನ ಸ್ಥಿತಿಯನ್ನು  ಶಾಸಕರು ಹಿಂದಿನ ಬಿಹಾರ ರಾಜ್ಯದ ಪರಿಸ್ಥಿತಿಗೆ ತಳ್ಳಿದ್ದಾರೆ. ವೀಕ್ಷಣೆಗಾಗಿ ಶಾಸಕರು ಮತಗಟ್ಟೆಗೆ ಬಂದಿದ್ದಾರೆ ಎಂದು ಉತ್ತರ ನೀಡುವ ತಹಶೀಲ್ದಾರರು, ‘ಶಾಸಕರೇನು ಚುನಾವಣಾ ಅಧಿಕಾರಿಯೇ?’ ಎಂಬುದನ್ನು ಖಚಿತಪಡಿಸಬೇಕೆಂದು ಪ್ರಶ್ನಿಸಿದರು.

 

ತಾಲೂಕು ಬಿಜೆಪಿ ಅಧ್ಯಕ್ಷ ಎಸ್.ಬಿ.ಆನಂದಪ್ಪ,  ಜಿಲ್ಲಾ ಪಂಚಾಯಿತಿ ಸದಸ್ಯ ಕೆ.ಆರ್.ಆನಂದಪ್ಪ, ಟಿಎಪಿಸಿಎಂಎಸ್ ಅಧ್ಯಕ್ಷ ವಸಂತಕುಮಾರ್, ಮುಖಂಡರಾದ ಲಕ್ಕವಳ್ಳಿ ರಮೇಶ್, ಸಂಜೀವ್ ಕುಮಾರ್, ಶಾಂತರಾಜ್, ಸುಧಾಕರ್, ಶಿವಮೂರ್ತಿ ಹಾಗೂ ಇತರರು ಇದ್ದರು