ಸಂಕ್ರಾಂತಿಗೆ ಬರದ ಛಾಯೆ

 

ನಗರದ ಇತಿಹಾಸ ಪ್ರಸಿದ್ಧ ಸಂಕ್ರಾಂತಿ ಆಚರಣೆಗೆ ಸುತ್ತಮುತ್ತಲಿನ ಹಲವಾರು ಜಿಲ್ಲೆಗಳ ಸಾವಿರಾರು ಜನರು ಕುಟುಂಬ ಹಾಗೂ ಬಂಧುಮಿತ್ರರ ಸಮೇತ ಪುಣ್ಯಸ್ನಾನಕ್ಕಾಗಿ ನದಿಗೆ ಬರುತ್ತಾರೆ. ಈ ಸಂದರ್ಭದಲ್ಲಿ ಜನಸಂದಣಿ ಹೆಚ್ಚಾಗುವುದು ಸಾಮಾನ್ಯ. ನದಿಪಾತ್ರದಲ್ಲಿ ಹಾಗೂ ನದಿಯಲ್ಲಿ ಅಕ್ರಮ ಮರಳು ಗಣಿಗಾರಿಕೆಯ ಪರಿಣಾಮ, ನಿಂತ ನದಿ ನೀರಿನಲ್ಲಿ ಎಲ್ಲೆಲ್ಲಿ ಗುಂಡಿಗಳಿವೆ ಎನ್ನುವುದು ಸಾರ್ವಜನಿಕರಿಗೆ ತಿಳಿಯದಂತಾಗಿದೆ. ಅಪಾಯದ ಸಾಧ್ಯತೆಗಳನ್ನು ಮತ್ತಷ್ಟು ಹೆಚ್ಚಿಸಿದೆ. ಅಪಾಯಕಾರಿ ಸ್ಥಳಗಳ ಬಳಿ ಸೂಚನಾ ಫಲಕಗಳನ್ನು ಹಾಕುವಲ್ಲಿ ಅಧಿಕಾರಿಗಳು ನಿರ್ಲಕ್ಷ್ಯ ವಹಿಸಿರುವುದು ಸಾರ್ವಜನಿಕರಲ್ಲಿ ಬೇಸರ ಮೂಡಿಸಿದೆ.

 

ಹರಿಹರೇಶ್ವರ ದೇವಸ್ಥಾನ ಹಿಂಭಾಗ ನದಿ ಮಧ್ಯದಲ್ಲಿರುವ ಮಂಟಪಕ್ಕೆ ಚಿಕ್ಕ ಮಕ್ಕಳೂ ಸಲೀಸಾಗಿ ನಡೆದುಕೊಂಡು ಹೋಗಬಹುದಾದಷ್ಟು ನೀರಿನ ಮಟ್ಟ ಇಳಿದಿದೆ. ಆದರೆ, ಅಕ್ರಮ ಮರಳು ಗಾರಿಕೆ ಸೃಷ್ಟಿಸಿರುವ ಗುಂಡಿಗಳು ಮಕ್ಕಳ ಜೀವಕ್ಕೆ ಅಪಾಯ ಒಡ್ಡುವ ಸಾಧ್ಯತೆ ಇದೆ.

 

ಸೇತುವೆ ಕಾಮಗಾರಿ ನಡೆಯು ತ್ತಿರುವ ಹಿನ್ನೆಲೆ ಎಲ್ಲೆಂದರಲ್ಲಿ ಕಬ್ಬಿಣ ತುಂಡು ಹಾಗೂ ಕಾಂಕ್ರೀಟ್‌ ಅವಶೇಷ ಗಳಿದ್ದು, ಸ್ನಾನಕ್ಕೆ ಬರುವವರಿಗೆ ಅಪಾಯ ಸೃಷ್ಟಿಸಿವೆ. ಪ್ಲಾಸ್ಟಿಕ್‌ ಹಾಗೂ ಬಳಸಿ ಬಿಸಾಡಿದ ಬಟ್ಟೆಗಳಿಂದ ಪರಿಸರ ಹಾಗೂ ನೀರು ಸಂಪೂರ್ಣವಾಗಿ ಕಲುಷಿತ ಗೊಂಡಿದೆ. ನದಿ ತೀರಕ್ಕೆ ಕುಟುಂಬ ಸಮೇತ ಸಹಭೋಜನಕ್ಕೆ ಆಗಮಿಸು ವವರು ಶುದ್ಧ ಕುಡಿಯುವ ನೀರನ್ನು ಒಯ್ಯಬೇಕಾದ ದುಃಸ್ಥಿತಿ ಸೃಷ್ಟಿಸಿದೆ ಎಂದು ಮಂಜುನಾಥ ಗದ್ಗಿಮಠ ಅಭಿಪ್ರಾಯ ಹಂಚಿಕೊಂಡರು. 

 

ಹರಿಹರವನ್ನು ಯಾತ್ರಾಸ್ಥಳವನ್ನಾಗಿ ಅಭಿವೃದ್ಧಿಪಡಿಸಿಬೇಕು ಎಂಬುದು ಇಲ್ಲಿನ ನಾಗರಿಕರ ಹಲವಾರು ದಿನಗಳ ಕನಸು. ಈ ಬಗ್ಗೆ ಜನಪ್ರತಿನಿಧಿಗಳು ಭರವಸೆ ನೀಡುತ್ತಿದ್ದರೂ, ಅದಕ್ಕೆ ಬೇಕಾದ ಸೌಲಭ್ಯಗಳ ಒದಗಿಸುವುದರಲ್ಲಿ ವಿಫಲರಾಗಿದ್ದಾರೆ. ಪ್ರತಿವರ್ಷ ಆಚರಿಸುವ ಸಂಕ್ರಾಂತಿಗೆ ನದಿ ದಡದಲ್ಲಿ ಸಾರ್ವಜನಿಕರಿಗೆ ಅಗತ್ಯ ಸೌಲಭ್ಯಗಳನ್ನು ನಿರ್ಮಿಸಿಕೊಡುವ ಬದ್ಧತೆಯನ್ನು ತಾಲ್ಲೂಕು ಆಡಳಿತ ಹಾಗೂ ಅಧಿಕಾರಿಗಳು ಪ್ರದರ್ಶಿಸಬೇಕು ಎಂಬುದು ನಾಗರಿಕರ ಆಗ್ರಹ.

 

**

ಪುಣ್ಯಸ್ನಾನಕ್ಕೆ  ನೀರಿನ  ಕೊರತೆ

 

**

–ಆರ್‌. ರಾಘವೇಂದ್ರ