‘ರೋಗಿಗಳ ರಕ್ಷಣೆ ನಮ್ಮದು, ನಮ್ಮ ರಕ್ಷಣೆ ನಿಮ್ಮದು’

 

ಕರ್ತವ್ಯ ಬಹಿಷ್ಕರಿಸಿ, ಕಪ್ಪುಪಟ್ಟಿ ಧರಿಸಿ ಪ್ರತಿಭಟನೆಗಿಳಿದ ಮೆಡಿಕಲ್‌ ಕಾಲೇಜು ವಿದ್ಯಾರ್ಥಿಗಳು ಹಾಗೂ ವೈದ್ಯರು ಜಯದೇವ ವೃತ್ತದಲ್ಲಿ ಮಾನವ ಸರಪಳಿ ರಚಿಸಿ ಆಕ್ರೋಶ ವ್ಯಕ್ತಪಡಿಸಿದರು. ಈ ಸಂದರ್ಭ ಐಎಂಎ ಜಿಲ್ಲಾ ಘಟಕದ ಅಧ್ಯಕ್ಷ ಡಾ.ರವೀಂದ್ರ ಮಾತನಾಡಿ, ‘ವೈದ್ಯರ ಮೇಲೆ ನಿರಂತರ ಹಲ್ಲೆಗಳು ನಡೆಯುತ್ತಿದ್ದು, ಭಯದ ವಾತಾವರಣದಲ್ಲಿ ಕಾರ್ಯ ನಿರ್ವಹಿಸಬೇಕಾಗಿದೆ. ಚಿಕಿತ್ಸೆ ವೇಳೆ ರೋಗಿ ಮೃತಪಟ್ಟರೆ ವೈದ್ಯರನ್ನೇ ಹೊಣೆ ಮಾಡಿ, ಹಲ್ಲೆ ನಡೆಸಲಾಗುತ್ತಿದೆ. ರೋಗಿಯ ಪರಿಸ್ಥಿತಿ ಅರ್ಥ ಮಾಡಿಕೊಳ್ಳದೆ ವೈದ್ಯರ ಮೇಲೆ ದೈಹಿಕ ಹಲ್ಲೆ ನಡೆಸುವುದು ಖಂಡನೀಯ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

 

‘ಚಿಕಿತ್ಸೆ ನೀಡುವಾಗ ವೈದ್ಯರು ಕರ್ತವ್ಯ ಲೋಪ ಎಸಗಿದರೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ದೂರು ನೀಡಬೇಕು. ಆದರೆ, ಕೆಲವು ಕಿಡಿಗೇಡಿಗಳು ದುರುದ್ದೇಶಪೂರಿತವಾಗಿ ಹಲ್ಲೆಗೆ ಮುಂದಾಗಿ ಆಸ್ಪತ್ರೆಯ ಪೀಠೋಪರಣಗಳನ್ನು ಧ್ವಂಸಗೊಳಿಸು ತ್ತಿದ್ದಾರೆ. ಇದರಿಂದ ತಪ್ಪು ಮಾಡದ ಇತರ ರೋಗಿಗಳು ತೊಂದರೆ ಅನುಭವಿಸುವಂತಾಗಿದೆ’ ಎಂದರು.

 

ಡಾ.ಕಾರ್ತಿಕ್‌, ಡಾ.ಹರ್ಷ ಹಾಗೂ ಡಾ.ಶಾಲಿನಿ ಮೇಲೆ ಹಲ್ಲೆ ನಡೆಸಿದ ಪ್ರಕರಣದಲ್ಲಿ ಇಬ್ಬರು ಆರೋಪಿಗಳನ್ನು ಬಂಧಿಸಲಾಗಿದ್ದು, ಪ್ರಕರಣದ ಇತರ ಆರೋಪಿಗಳನ್ನೂ ಶೀಘ್ರ ಬಂಧಿಸಬೇಕು. ವೈದ್ಯರು ನಿರ್ಭಯವಾಗಿ ಆಸ್ಪತ್ರೆಯಲ್ಲಿ ಕರ್ತವ್ಯ ನಿರ್ವಹಿಸುವಂತಹ ವಾತಾವರಣವನ್ನು ನಿರ್ಮಾಣ ಮಾಡಬೇಕು ಎಂದು ಡಾ.ರವೀಂದ್ರ ಒತ್ತಾಯಿಸಿದರು.

 

ಹಲ್ಲೆಗೊಳಗಾದ ವೈದ್ಯೆ ಡಾ.ಶಾಲಿನಿ ಮಾತನಾಡಿ, ಚಿಕಿತ್ಸೆಗೆ ಬರುವಾಗ ರೋಗಿಗಳ ಕೆಲವು ಸಂಬಂಧಿಗಳು ಪಾನಮತ್ತರಾಗಿ ಬರುತ್ತಾರೆ. ಅವಾಚ್ಯವಾಗಿ ಮಾತನಾಡುತ್ತಾರೆ. ಇವೆಲ್ಲವನ್ನು ಸಹಿಸಿಕೊಂಡು ಚಿಕಿತ್ಸೆ ನೀಡಬೇಕಾಗುತ್ತದೆ. ಆಕಸ್ಮಿಕವಾಗಿ ರೋಗಿ ಮೃತಪಟ್ಟರೆ ವೈದ್ಯರನ್ನು ಹೊಣೆಮಾಡಿ ಹಲ್ಲೆ ನಡೆಸಲಾಗುತ್ತದೆ. ಜಿಲ್ಲಾ ಆಸ್ಪತ್ರೆಯಲ್ಲಿ ಮಹಿಳಾ ವೈದ್ಯರಿಗೆ ಅಗತ್ಯ ಭದ್ರತೆ ಒಗಗಿಸಬೇಕು ಎಂದು ಒತ್ತಾಯಿಸಿದರು.

 

ಪ್ರತಿಭಟನೆಯಲ್ಲಿ ಡಾ.ಸುನೀಲ್ ಕುಮಾರ್, ಡಾ.ರವಿ, ಡಾ.ಶಿವಲಿಂಗಪ್ಪ, ಡಾ.ಸಂಗಮೇಶ್, ಡಾ.ಚಂದನ್‌, ಡಾ.ಧರ್ಮರಾವ್ ಸೇರಿದಂತೆ ಐಎಂಎ ಸದಸ್ಯರು, ಕದಳಿ ಮಹಿಳಾ ವೇದಿಕೆ ಸದಸ್ಯರು, ಜಿಲ್ಲಾ ಮಕ್ಕಳ ಘಟಕ, ಜಿಲ್ಲಾ ನರ್ಸಿಂಗ್ ಹೋಂ ಸಂಘ, ಜಿಲ್ಲಾ ಶುಶ್ರುತ ಸಂಘ, ಔಷಧ ವ್ಯಾಪಾರಿಗಳ ಸಂಘದ ಸದಸ್ಯರು ಭಾಗವಹಿಸಿದ್ದರು.

 

**

 

**