ಹೂವಿನ ಸಂತೆ

ಹೂವಿನ ಸಂತೆ

ಹೂವಿನ ಸಂತೆ ಇದು ಹೂವಿನ ಸಂತೆ
ಮರೆತು ಬನ್ನಿರಿ ಸೊಪ್ಪು ಮೆಂತೆ
ಬಿಟ್ಟು ಬನ್ನಿರಿ ತರಕಾರಿ ಕಂತೆ
ಮಾಡುವುದಿಲ್ಲ ಗುಲಾಬಿ ‘ಲಾಬಿ’
ಕಣ್ಣಿಗೆ ಸೊಂಪಿನ ಜಿಲೇಬಿ!
ಹೂವಿನ ಸಂತೆ ಇದು ಹೂವಿನ ಸಂತೆ

ಹೂವಿನ ಸಂತೆ ಇದು ಹೂವಿನ ಸಂತೆ
ಕನಕಾಂಬರದ ಬಿಳಿ ಬಿಳಿ ತೊಟ್ಟು
ಬರಬರ ಜೋಡಿಸಿ ಮಾಲೆಯ ಕಟ್ಟು
ಅರಳಿದೆ ಮಲ್ಲಿಗೆ ಹೂ ಬಾಲೆ
ತುರುಬಿಗೆ ಅಂದದ ತೋಮಾಲೆ!
ಹೂವಿನ ಸಂತೆ ಇದು ಹೂವಿನ ಸಂತೆ
ಹೂವಿನ ಸಂತೆ ಇದು ಹೂವಿನ ಸಂತೆ
ಕಣ್ಣಾಮುಚ್ಚೇ ಆಡುವ ಕಾಕಡ
ಎಲೆ ಮರೆಯಲ್ಲಿ ಅಡಗಿದೆ ಪಾಕಡ
ಬಣ್ಣವ ತೋರಿದೆ ದಾಸವಾಳ
ಗಾತ್ರವೆ ಇದರ ಜೀವಾಳ!
ಹೂವಿನ ಸಂತೆ ಇದು ಹೂವಿನ ಸಂತೆ

ಹೂವಿನ ಸಂತೆ ಇದು ಹೂವಿನ ಸಂತೆ
ತುತ್ತೂರಿ ಊದಿದೆ ಸ್ಪಟಿಕ
ಬಳ್ಳಿಯು ಬಳುಕಿತು ಬಳಿಕ
ಚಿಟ್ಟೆಯ ಕಣ್ಣಿಗೆ ಆಸೆಯ ನೋಟ
ಮಧುವನು ಹೀರಿ ಕಿತ್ತಿತು ಓಟ!
ಹೂವಿನ ಸಂತೆ ಇದು ಹೂವಿನ ಸಂತೆ
*
-ಟಿ.ಎಸ್‌. ನಾಗರಾಜ ಶೆಟ್ಟಿ

***

-ನಲ್ಲಿಯ ಅಳು

ಅಮ್ಮ ಅಮ್ಮ
ಅಡುಗೆಮನೆ ನಲ್ಲಿ
ಸದಾ ಅಳುವುದು ಏಕಮ್ಮ?

ಹೆಚ್ಚಿದ ಈರುಳ್ಳಿಯ ಕಾರಣವೆ?
ಒಗ್ಗರಣೆಯ ಘಾಟಿನ ಕಾರಣವೆ?
ದಿನವೂ ನೀನದರ ಕಿವಿ ಹಿಂಡುವೆಯೇ?
ಒಂಟಿಕಾಲಲಿ ನಿಂತೂ ನಿಂತೂ ನೋವಾಯ್ತೆ?
ಜನರು ನೀರನು ಪೋಲು ಮಾಡುವರೆಂದೆ?

ಹೀಗೆ ಒಂದರ ಹಿಂದೆ ಒಂದು
ಪ್ರಶ್ನೆಗಳ ಪೋಣಿಸಿದ ಚಂದು
ಅಮ್ಮ ಬಾಯಿ ಬಿಡುವುದರೊಳಗೆ
ಕರವಸ್ತ್ರವೊಂದನು ತಂದು
ಸೋರುವ ನಲ್ಲಿಯ ಬಂಧಿಸಿದ

ಅಮ್ಮ ಅಮ್ಮ
ನಲ್ಲಿ ಅಳುವುದ ನಿಲ್ಲಿಸಿತೆಂದು
ಚಪ್ಪಾಳೆ ತಟ್ಟುತ ನಲಿದ.

*
-ವಿಜಯಕುಮಾರ್‌ ಹುತ್ತನಹಳ್ಳಿ