ಹುಳಗೋಳದ ಯುವಕನ ‘ಹೂಗ್ಲು’ ಕನಸು ನನಸು

ಅಂದಾಜು ₹ 45 ಲಕ್ಷ ಬಂಡವಾಳ ತೊಡಗಿಸಿರುವ ನವೀನ್ ಅವರ ‘ಐಟಿಓಆರ್ ಫುಡ್‌’ ತಯಾರಿಕಾ ಘಟಕ ಹುಳಗೋಳದಿಂದ 5 ಕಿ.ಮೀ ದೂರದ ಸೋಂದಾ ಕ್ರಾಸ್‌ನಲ್ಲಿದೆ. ಕೋಕಂ ಜ್ಯೂಸ್‌ನೊಂದಿಗೆ ಆರಂಭವಾದ ಉದ್ಯಮ ಬೆಳವಣಿಗೆ ಹೊಂದಿ ಒಂದೂವರೆ ವರ್ಷದಲ್ಲಿ ನಾಲ್ಕು ವಿಧದ ಜ್ಯೂಸ್, ಎರಡು ಬಗೆಯ ಚಿಪ್ಸ್‌ ತಯಾರಿಸುವ ಮಟ್ಟಕ್ಕೆ ತಲುಪಿದೆ. 

 

ಬೆಟ್ಟದ ನೆಲ್ಲಿಕಾಯಿ ಜ್ಯೂಸ್ ಮಾಡುವ ಪ್ರಯತ್ನ ನಡೆಯಿತು. ಒಗರು ರುಚಿಯ ಬೆಟ್ಟದ ನೆಲ್ಲಿಗಿಂತ ರತ್ನಾಗಿರಿಯ ದೊಡ್ಡ ನೆಲ್ಲಿ ಜ್ಯೂಸ್‌ಗೆ ಉಪಯುಕ್ತವಾಗಿದೆ. ಹೀಗಾಗಿ ಅಲ್ಲಿಂದ ಗೂಗ್ಲಿ ಗೂಸ್ಬೆರಿ ಜ್ಯೂಸ್‌ಗೆ ಕಚ್ಚಾವಸ್ತುಗಳನ್ನು ತರುತ್ತೇವೆ. ಶಿರಸಿ ತಾಲ್ಲೂಕಿನ ದೇವನಳ್ಳಿಯ ಸ್ವ ಸಹಾಯ ಗುಂಪಿನ ಮಹಿಳೆಯರು ಮುರುಗಲು ಹಣ್ಣಿನ ಹಂಗಾಮಿನಲ್ಲಿ 6–8 ಟನ್ ಕೋಕಂ ಸ್ವ್ಕ್ಯಾಷ್ ಸಿದ್ಧಪಡಿಸಿಕೊಡುತ್ತಾರೆ. ನಿಸರ್ಗದಲ್ಲಿ ಬೆಳೆದ ಕಚ್ಚಾವಸ್ತು ವರ್ಷವಿಡೀ ಸಂಗ್ರಹಿಸಿಟ್ಟು ಇಂಡಸ್ಟ್ರಿಯಲ್ಲಿ ಸಂಸ್ಕರಿಸಿ ಪ್ಯಾಕಿಂಗ್ ಮಾಡುತ್ತೇವೆ. ಬಾಳೆಹಣ್ಣಿನ ಜ್ಯೂಸ್‌ ಪ್ರಯೋಗ ಮಾಡಿದೆವು. ಗ್ರಾಹಕರು ಅಷ್ಟಾಗಿ ಇಷ್ಟಪಡಲಿಲ್ಲ. ಅದನ್ನು ಕೈಬಿಟ್ಟು ಈಗ ಕೋಕಂ, ನೆಲ್ಲಿಕಾಯಿ ಜೂಸ್‌ ಜೊತೆ ಚಿಲ್ಲಿ ಲೆಮನ್‌, ಗೋಲ್‌ಗಪ್ಪೆ ಪಾನಿ ಹೂಗ್ಲು ಉತ್ಪನ್ನವಾಗಿ ಮಾರುಕಟ್ಟೆ ಪ್ರವೇಶಿಸಿದೆ. ಶುದ್ಧ ಬೆಲ್ಲದಿಂದ ಮಾಡುವ ಗೋಲ್‌ಗಪ್ಪೆ ಕಟ್ಟಾಮೀಠಾ ರುಚಿ ಹೊಂದಿದೆ. ಇದರೊಂದಿಗೆ ಬಾಳೆಕಾಯಿ ಚಿಪ್ಸ್, ಪೊಟೆಟೊ (ಬಟಾಟೆ) ಚಿಪ್ಸ್ ತಯಾರಾಗುತ್ತವೆ ಎಂದು ಅವರು ಇಂಡಸ್ಟ್ರಿಯಲ್ಲಿ ತಯಾರಾಗುವ ಉತ್ಪನ್ನದ ಬಗ್ಗೆ ಹೇಳಿಕೊಳ್ಳುತ್ತಾರೆ. 

 

‘ಮಹಿಳೆಯರು ಮನೆಗೆಲಸ ಮುಗಿಸಿ ಬಿಡುವಿನ ವೇಳೆಯಲ್ಲಿ  ಕೋಕಂ ಜ್ಯೂಸ್ ಸಂಗ್ರಹಣೆ, ಬಾಳೆಕಾಯಿ ಸಿಪ್ಪೆ ಸುಲಿಯುವ ಕೆಲಸ ಮಾಡುತ್ತಾರೆ. 40ಕ್ಕೂ ಅಧಿಕ ಹಳ್ಳಿ ಮಹಿಳೆಯರಿಗೆ ಕಿರು ಆದಾಯ ನೀಡಿರುವ ಖುಷಿಯಿದೆ’ ಎಂದು ಹೇಳಲು ಅವರು ಮರೆಯಲಿಲ್ಲ. 

 

ಮಾರುಕಟ್ಟೆ ಸವಾಲು

‘ಉದ್ದಿಮೆಯಲ್ಲಿ ಎದುರಾಗುವ ಮುಖ್ಯ ಸವಾಲು ವಿತರಣೆ ಮತ್ತು ಮಾರುಕಟ್ಟೆ. ತಾಜಾತನ, ಶುದ್ಧತೆ ಕಾಪಾಡಿಕೊಂಡಾಗ ಸಹಜವಾಗಿಯೇ ಉತ್ಪಾದನಾ ವೆಚ್ಚ ಅಧಿಕವಾಗುತ್ತದೆ. ಆದರೆ ಮಾರುಕಟ್ಟೆಯ ಸ್ಪರ್ಧೆಯಲ್ಲಿ ಲಾಭ ಮತ್ತು ದರದಲ್ಲಿ ಆಟವಾಡಬೇಕು. ಪೂರೈಕೆ ಮತ್ತು ವಿತರಣೆ ಎರಡು ಪ್ರತ್ಯೇಕ ದಾರಿಗಳು. ಇವುಗಳ ಹೊಂದಾಣಿಕೆಯೇ ಉದ್ದಿಮೆಯ ಯಶಸ್ಸು. ಆರಂಭಿಕ ದಿನಗಳಲ್ಲಿ ಸಾಕಷ್ಟು ತೊಂದರೆಗಳು ಎದುರಾದವು. ಮಂಗಳೂರು ಮತ್ತು ಬೆಂಗಳೂರಿನಲ್ಲಿ ಅನುಭವಿಗಳಾದ ಶ್ರೀಧರ ಹೆಗಡೆ ಹಾಗೂ ಸತೀಶ ಪೂವಯ್ಯ ಮಾರುಕಟ್ಟೆಯ ಹೊಣೆಗಾರಿಕೆ ನಿರ್ವಹಿಸುವುದರಿಂದ ನನ್ನ ಮೇಲಿನ ಭಾರ ಕಡಿಮೆಯಾಗಿದೆ’ ಎನ್ನುತ್ತಾರೆ ಅವರು. 

 

‘ಸದ್ಯ ನಮ್ಮ ಇಂಡಸ್ಟ್ರಿಯಲ್ಲಿ ದಿನಕ್ಕೆ 80–100 ಕೆ.ಜಿ ಚಿಪ್ಸ್ ತಯಾರಿಸುವ, 2500–3000 ಸಾವಿರ ಪೌಚ್ ಜ್ಯೂಸ್ ತಯಾರಿಸುವ ಯಂತ್ರಗಳು ಇವೆ. ನಾನು ಎಲೆಕ್ಟ್ರಾನಿಕ್ಸ್ ಎಂಜಿನಿಯರಿಂಗ್ ಓದುವಾಗ ಕಲಿತ ತಂತ್ರಜ್ಞಾನ ಇಂಡಸ್ಟ್ರಿಯಲ್ಲಿ ಯಂತ್ರಗಳನ್ನು ಅಳವಡಿಸುವಾಗ ಸಹಾಯಕ್ಕೆ ಬಂತು’ ಎಂದು ಹೇಳುತ್ತಾರೆ ಅವರು.  

ಸಂಪರ್ಕ ಸಂಖ್ಯೆ: 9481751022.

ಅಪ್ಪ–ಅಮ್ಮನ ಬೆಂಬಲ

‘ನನ್ನ ಪದವಿಗೆ ಶಿರಸಿಯಂತಹ ಸಣ್ಣ ಪಟ್ಟಣದಲ್ಲಿ ಉದ್ಯೋಗಾವಕಾಶವಿಲ್ಲ. ಊರಿನಲ್ಲಿ ಉಳಿದುಕೊಂಡೇ ಬದುಕನ್ನು ಕಟ್ಟಬೇಕೆಂಬ ಛಲಕ್ಕೆ ಪಾಲಕರು ನೀರೆರೆದರು. ನಿವೃತ್ತಿಯ ನಂತರ ಅಪ್ಪ– ಅಮ್ಮ ಹುಳಗೋಳದಲ್ಲೇ ಬಂದು ನೆಲೆಸಿದ್ದಾರೆ. ಅವರೊಂದಿಗೆ ಗ್ರಾಮೀಣ ಪರಿಸರದಲ್ಲಿ ಕಳೆಯುವ ದಿನಗಳು ಕೊಡುವ ಖುಷಿ ಪಟ್ಟಣದಲ್ಲಿ ಸಿಗಲಾರದು’.