ರೈತರ ನಿರುತ್ಸಾಹ: ಮತಗಟ್ಟೆ ಖಾಲಿ...ಖಾಲಿ...

ರಾಮನಗರ: ‌‌ಜಿಲ್ಲೆಯ ಮೂರು ಎಪಿಎಂಸಿಗಳ ಒಟ್ಟು 29 ಸ್ಥಾನಗಳಿಗೆ ಮಂಗಳವಾರ ನಡೆದ ಮತದಾನಕ್ಕೆ ರೈತ ಸಮುದಾಯದಿಂದ ನಿರುತ್ಸಾಹ ವ್ಯಕ್ತವಾಯಿತು. ಒಟ್ಟಾರೆ ಶೇ 37.14 ರಷ್ಟು ಮತದಾನವಾಗಿದೆ ಎಂದು ಅಂದಾಜಿಸಲಾಗಿದ್ದು, ಅರ್ಧಕ್ಕೂ ಹೆಚ್ಚು ಮತದಾರರು ಮತಗಟ್ಟೆಯಿಂದ ದೂರವೇ ಉಳಿದರು.

ರಾಮನಗರ ತಾಲ್ಲೂಕಿನಾದ್ಯಂತ ಶೇ 42.49 ಮತದಾನವಾಯಿತು. ಒಟ್ಟು 12,251 ಮತದಾರರಿದ್ದು, ಇವರ ಪೈಕಿ 5205 ಮತದಾರರು ಮಾತ್ರ ತಮ್ಮ ಹಕ್ಕು ಚಲಾಯಿಸಿದರು. ಮತ ಹಾಕುವಲ್ಲಿ ಪುರುಷರೇ ಮುಂದೆ ಇದ್ದು, ಶೇ 44.08 ಜನರು ವೋಟು ಒತ್ತಿದರು. ರಾಮನಗರ ಎಪಿಎಂಸಿ ಮತಗಟ್ಟೆಯಲ್ಲಿ ಗರಿಷ್ಠ ಅಂದರೆ ಶೇ 87.73ರಷ್ಟು ಮತದಾನವಾಯಿತು. ಇಲ್ಲಿ ಒಟ್ಟು 440 ಮತದಾರರ ಪೈಕಿ 386 ಮಂದಿ ಮತ ಹಾಕಿದರು.

ದೊಡ್ಡಮಣ್ಣುಗುಡ್ಡೆ ಮತಗಟ್ಟೆಯಲ್ಲಿ ಅತ್ಯಂತ ಕನಿಷ್ಠ ಅಂದರೆ ಶೇ 20.27ರಷ್ಟು ಮತದಾನವಾಯಿತು. ಇಲ್ಲಿ ಒಟ್ಟು 666 ಮತದಾರರು ಇದ್ದು, ಅವರ ಪೈಕಿ ಕೇವಲ 135 ಮಂದಿ ಮಾತ್ರ ತಮ್ಮ ಹಕ್ಕು ಚಲಾಯಿಸಿದರು. 

ಬೆಳಿಗ್ಗೆ 8ಕ್ಕೆ ಮತದಾನ ಪ್ರಕ್ರಿಯೆಯು ಆರಂಭಗೊಂಡಿತು. ಆದಾಗ್ಯೂ ಆರಂಭದಲ್ಲಿ ಮತದಾರರು ಮತಗಟ್ಟೆಗಳತ್ತ ಹೆಚ್ಚು ಸುಳಿಯಲಿಲ್ಲ.

ಇಲ್ಲಿನ ಎಪಿಎಂಸಿ ಆವರಣದಲ್ಲಿರುವ ಮತಗಟ್ಟೆಯಲ್ಲಿ ವರ್ತಕರ ಕ್ಷೇತ್ರದ ಪ್ರತಿನಿಧಿಯ ಆಯ್ಕೆಗಾಗಿ ನಡೆದ ಮತದಾನದಲ್ಲಿ ಒಟ್ಟು 440 ಮತದಾರರ ಪೈಕಿ ಬೆಳಿಗ್ಗೆ 11ರ ಸುಮಾರಿಗೆ 176 ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದರು. ಹನುಮಂತನಗರದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯಲ್ಲಿನ ಮತಗಟ್ಟೆ, ಬಿಳಗುಂಬದ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿನ ಮತಗಟ್ಟೆಯಲ್ಲೂ ಮಧ್ಯಾಹ್ನದವರೆಗೆ ಮತದಾರರು ವಿರಳವಾಗಿದ್ದರು. ಸಂಜೆ ಹೊತ್ತಿಗೆ ಹೆಚ್ಚಿನ ಮಂದಿ ಮತಗಟ್ಟೆಗಳತ್ತ ಹೆಜ್ಜೆ ಹಾಕಿದರು.

ರಾಮನಗರ ತಾಲ್ಲೂಕು ವ್ಯಾಪ್ತಿಯಲ್ಲಿ ಒಟ್ಟು 8 ಕ್ಷೇತ್ರಗಳಿದ್ದು, ಇದರಲ್ಲಿ 2 ಕ್ಷೇತ್ರಗಳಿಗೆ ನಾಮಪತ್ರ ಸಲ್ಲಿಕೆ ಆಗಿರಲಿಲ್ಲ. ಉಳಿದ 6 ಕ್ಷೇತ್ರಗಳ ಪೈಕಿ ಬಿಡದಿ, ಕೈಲಾಂಚ ಹಾಗೂ ಬಾನಂದೂರು ಕ್ಷೇತ್ರಗಳಿಗೆ ಅವಿರೋಧ ಆಯ್ಕೆ ನಡೆದಿತ್ತು. ಹೀಗಾಗಿ ಮಂಗಳವಾರ ತಾಲ್ಲೂಕಿನ ಕೂಟಗಲ್‌, ಬಿಳಗುಂಬ ಹಾಗೂ ವರ್ತಕರ ಕ್ಷೇತ್ರಗಳಿಗೆ ಮಾತ್ರ ಮತದಾನ ಪ್ರಕ್ರಿಯೆ ನಡೆಯಿತು.

ಪ್ರತಿ ಮತಗಟ್ಟೆಯ ಹೊರಗೆ ವಿವಿಧ ಪಕ್ಷಗಳ ಬೆಂಬಲಿಗರು ಮತದಾರರಿಗೆ ಕ್ರಮ ಸಂಖ್ಯೆಯ ಚೀಟಿ ಬರೆದುಕೊಟ್ಟು ಅಲ್ಲಿಯೂ ಅಭ್ಯರ್ಥಿ ಪರ ಪ್ರಚಾರ ನಡೆಸಿದರು.

ಅಭ್ಯರ್ಥಿಗಳು ಎದುರು ಬಂದವರಿಗೆ ಕೈಮುಗಿದು ಮತಯಾಚನೆ ಮಾಡುತ್ತಿದ್ದ ದೃಶ್ಯವೂ ಕಂಡು ಬಂದಿತು. ರಾಮನಗರ ತಾಲ್ಲೂಕಿನಾದ್ಯಂತ 24 ಮತಗಟ್ಟೆಗಳನ್ನು ತೆರೆಯಲಾಗಿತ್ತು. ಪ್ರತಿ ಮತಗಟ್ಟೆಗೆ ಒಬ್ಬರು ಅಧ್ಯಕ್ಷಾಧಿಕಾರಿ ಹಾಗೂ ಮೂವರು ಮತಗಟ್ಟೆ ಅಧಿಕಾರಿಗಳನ್ನು ನಿಯೋಜಿಸಲಾಗಿತ್ತು.

ಉಪ ವಿಭಾಗಾಧಿಕಾರಿ ರಾಜೇಂದ್ರಪ್ರಸಾದ್‌, ತಹಶೀಲ್ದಾರ್‌ ರಘುಮೂರ್ತಿ ಮತಗಟ್ಟೆಗಳಿಗೆ ತೆರಳಿ ಅಲ್ಲಿನ ವ್ಯವಸ್ಥೆಗಳನ್ನು ಪರಿಶೀಲಿಸಿದರು.

ಕಣದಲ್ಲಿದ್ದವರು: ರಾಮನಗರ ತಾಲ್ಲೂಕಿನ ಮೂರು ಕ್ಷೇತ್ರಗಳಿಂದ ಒಟ್ಟು 10 ಅಭ್ಯರ್ಥಿಗಳು ಕಣದಲ್ಲಿ ಇದ್ದಾರೆ. ಕೂಟಗಲ್ ಕ್ಷೇತ್ರದಿಂದ  ಎಂ.ಜಗದೀಶ್, ಪುಟ್ಟರಾಮಯ್ಯ, ಮಹದೇವಯ್ಯ ಹಾಗೂ ಬಿಳಗುಂಬ ಕ್ಷೇತ್ರದಿಂದ ವೆಂಕಟರಂಗಯ್ಯ, ವೆಂಕಟಾಚಾರ್, ಪುಟ್ಟಸ್ವಾಮಯ್ಯ ಸ್ಪರ್ಧೆಯಲ್ಲಿದ್ದಾರೆ. ವರ್ತಕರ ಕ್ಷೇತ್ರದಲ್ಲಿ ಪೈಪೋಟಿ ಹೆಚ್ಚಿದ್ದು ಶಿವಕುಮಾರ್, ಕರಡೀಗೌಡ, ಅಕ್ಕುಲ್ಲಾ ಷರೀಫ್, ಸಯ್ಯದ್‌ ಮುತಾಹಿರ್ ಅವರು ಸ್ಪರ್ಧಿಸಿದ್ದು, ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ.