ಹೆಜ್ಜೆ ಇಟ್ಟರೂ ವಿದ್ಯುತ್ ಉತ್ಪಾದನೆ!

ಹೆಚ್ಚು ನಡೆದಾಡುವ ಪ್ರದೇಶಗಳಲ್ಲಿ ಈ ತಂತ್ರಜ್ಞಾನವನ್ನು ಅಳವಡಿಸಿದರೆ ಹೆಚ್ಚು ವಿದ್ಯುತ್‌ ಉತ್ಪಾದಿಸಬಹುದು ಎಂಬುದು ಈ ವಿದ್ಯಾರ್ಥಿಗಳ ವಾದ. ಹಾಗಾಗಿ, ಮನೆಗಳು, ಪಾದಚಾರಿ ಮಾರ್ಗಗಳು, ರಸ್ತೆಗಳು, ರೈಲ್ವೆ ಹಾಗೂ ಬಸ್ ನಿಲ್ದಾಣಗಳು,  ಕ್ರೀಡಾಂಗಣದಲ್ಲಿ ಈ ತಂತ್ರಜ್ಞಾನವನ್ನು ಅಳವಡಿಸಿದರೆ ಅಗತ್ಯ ವಿದ್ಯುತ್‌ ಉತ್ಪಾದಿಸಬಹುದು ಎನ್ನುವುದು ಇವರ ವಾದ.

2015ರ ವೇಳೆಗೆ ಬಹುತೇಕ ಪೆಟ್ರೋಲಿಯಂ ಇಂಧನಗಳು ಖಾಲಿಯಾಗುತ್ತವೆ. ಆಗ ಪುನರ್ಬಳಕೆ ಇಂಧನ ಮೂಲಗಳನ್ನು ಬಳಸಬೇಕಾಗುತ್ತದೆ. ಭಾರತದಲ್ಲಿ ಸೌರಶಕ್ತಿಯನ್ನು ಬಳಸಿಕೊಂಡು ಈಗ 4,344 ಮೆಗಾವ್ಯಾಟ್‌, ಜೈವಿಕ ತ್ಯಾಜ್ಯದಿಂದ 4,418 ಮೆಗಾವ್ಯಾಟ್‌, ಕಿರು ಜಲವಿದ್ಯುತ್‌ ಕೇಂದ್ರಗಳಿಂದ 4,146 ಮೆಗಾವ್ಯಾಟ್‌, ಪವನಶಕ್ತಿಯಿಂದ 24,376 ಮೆಗಾವ್ಯಾಟ್‌ ವಿದ್ಯುತ್‌ ಉತ್ಪಾದಿಸಲಾಗುತ್ತಿದೆ (2015ರ ಅಂಕಿ–ಅಂಶಗಳು). ಇವೆಲ್ಲಾ ಮೂಲಗಳನ್ನು ಸೇರಿಸಿ 37,13 ಮೆಗಾವ್ಯಾಟ್‌ ಉತ್ಪಾದನೆ ಆಗುತ್ತಿದೆ. 2020ಕ್ಕೆ ಇದನ್ನು ಶೇ 50ರಷ್ಟಾದರೂ ಹೆಚ್ಚಿಸಬೇಕು ಎಂದು ಪುನರ್ಬಳಕೆ ಇಂಧನಗಳ ಇಲಾಖೆ ಗುರಿ ಹೊಂದಿದೆ. ಇದಕ್ಕೆ ಪೂರಕವಾಗಿ ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡರೆ ಒಟ್ಟು ಉತ್ಪಾದನೆಯ ಕನಿಷ್ಠ ಶೇ10ರಷ್ಟಾದರೂ ವಿದ್ಯುತ್‌ ಉತ್ಪಾದಿಸಬಹುದು ಎನ್ನುವುದು ಈ ವಿದ್ಯಾರ್ಥಿಗಳ ಭರವಸೆ.

ಕಾರ್ಯವೈಖರಿ ಹೀಗಿದೆ...
ಕಾಲ್ತುಳಿತವನ್ನು ಗಮನಿಸಿ ಅದಕ್ಕೆ ಸ್ಪಂದಿಸುವ ಸಂವೇದಕಗಳು ಈ ತಂತ್ರಜ್ಞಾನದಲ್ಲಿ ಇರುತ್ತವೆ. ಇವುಗಳ ಜತೆಗೆ, ವ್ಯಕ್ತಿಯ ತೂಕಕ್ಕೆ ಸ್ಪಂದಿಸುವ ಮೆಕ್ಯಾನಿಕಲ್ ಪಟ್ಟಿಗಳು ಕಂಪಿಸುತ್ತವೆ. ಈ ಕಂಪನವನ್ನು ಗ್ರಹಿಸುವ ಜನರೇಟರ್‌ಗಳು ವಿದ್ಯುತ್‌ ಉತ್ಪಾದಿಸುತ್ತವೆ. ಉತ್ಪಾದನೆಯಾದ ವಿದ್ಯುತ್‌ ಬ್ಯಾಟರಿಯೊಂದರಲ್ಲಿ ಶೇಖರವಾಗುತ್ತದೆ. ಇವೆಲ್ಲವನ್ನೂ ನಿಯಂತ್ರಿಸುವ ಒಂದು ಸರ್ಕ್ಯೂಟ್‌ ಸಹ ಇದರಲ್ಲಿದೆ.

ಭಾರತದಂತಹ ಜನದಟ್ಟಣೆ ಹೆಚ್ಚಿರುವ ದೇಶದಲ್ಲಿ ಈ ವಿಧಾನದ ಮೂಲಕ ವಿದ್ಯುತ್‌ ಉತ್ಪಾದಿಸುವುದು ಜಾಣ್ಮೆ ಕೆಲಸ. ಹಾಗಾಗಿ, ಈ ವಿಧಾನವನ್ನು ಅಳವಡಿಸಿಕೊಂಡು ತಂತ್ರಜ್ಞಾನ ಅಭಿವೃದ್ಧಿಪಡಿಸಿದೆವು ಎನ್ನುತ್ತಾರೆ ವಿದ್ಯಾರ್ಥಿನಿ ಪ್ರೀತಿ ಹರಗೆ. ತಮ್ಮ ಕಾರ್ಯಯೋಜನೆಯ ಭಾಗವಾದ ಈ ಸಂಶೋಧನೆಯ ವೆಚ್ಚ ₹10,200. ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡು ದೊಡ್ಡ ಪ್ರಮಾಣದಲ್ಲಿ ಉತ್ಪಾದಿಸುವುದಾದರೆ ಇನ್ನೂ ಕಡಿಮೆ ಬೆಲೆಗೆ ತಂತ್ರಜ್ಞಾನ ಲಭ್ಯ ಎನ್ನುತ್ತಾರೆ.

ಜತೆಗೆ, ಈ ತಂತ್ರಜ್ಞಾನದಿಂದ ಕೊಂಚವೂ ಪರಿಸರ ಮಾಲಿನ್ಯ ಆಗುವುದಿಲ್ಲ. ಅಲ್ಲದೇ, ಸ್ಥಳೀಯವಾಗಿ ಲಭ್ಯವುಳ್ಳ ಸಾಧನಗಳನ್ನೇ ಬಳಸಿಕೊಂಡು ಈ ತಂತ್ರಜ್ಞಾನ ಅಭಿವೃದ್ಧಿಪಡಿಸಲಾಗಿದೆ. ಹಾಗಾಗಿ, ವಿದೇಶಿ ತಂತ್ರಜ್ಞಾನಕ್ಕೆ ಅವಲಂಬಿತವಾಗುವ ಅಗತ್ಯ ಇರುವುದಿಲ್ಲ ಎಂದು ಈ ವಿದ್ಯಾರ್ಥಿಗಳು ಹೇಳುತ್ತಾರೆ.

ಈ ತಂತ್ರಜ್ಞಾನದಲ್ಲಿ ಬ್ಯಾಟರಿಯದೇ ಪ್ರಮುಖ ಪಾತ್ರ. ಸದ್ಯಕ್ಕೆ ಇವರು ಕಡಿಮೆ ಸಾಮರ್ಥ್ಯದ ಬ್ಯಾಟರಿಯನ್ನು ಅಳವಡಿಸಿದ್ದಾರೆ. ಲೀಥಿಯಂ ಅಯಾನ್‌ ಅಥವಾ ಲೀಥಿಯಂ ಪಾಲಿಮರ್‌ ರಾಸಾಯನಿಕಗಳುಳ್ಳ ಬ್ಯಾಟರಿಯನ್ನು ಅಳವಡಿಸಿದರೆ ಈ ತಂತ್ರಜ್ಞಾನದಿಂದ ಹೆಚ್ಚು ಅನುಕೂಲ ಪಡೆಯಬಹುದಾಗಿದೆ. ದೊಡ್ಡ ಪ್ರಮಾಣದಲ್ಲಿ ಈ ತಂತ್ರಜ್ಞಾನ ಅಳವಡಿಸಲ್ಪಟ್ಟರೆ ಕಡಿಮೆ ಬೆಲೆಗೆ ನಾಗರಿಕರಿಗೆ ಸಿಗುವುದು ಸಾಧ್ಯ  ಎನ್ನುತ್ತಾರೆ.