ಮದುವೆ ಆಸೆ ಕುಗ್ಗಿಸಿದ ಪೋಷಕರ ಜಗಳ

 

‘ನಿಮ್ಹಾನ್ಸ್‌ ಸೆಂಟರ್‌ ಫಾರ್‌ ವೆಲ್‌ ಬೀಯಿಂಗ್‌’ (ಎನ್‌ಸಿಡಬ್ಲ್ಯುಬಿ) ಕೇಂದ್ರದಲ್ಲಿ ನಡೆದ ‘ವಿವಾಹಪೂರ್ವ ಸಿದ್ಧತಾ ಕಾರ್ಯಕ್ರಮ’ದಲ್ಲಿ ನಿಮ್ಹಾನ್ಸ್‌ನ ವಿವಾಹ ಮತ್ತು ಕೌಟುಂಬಿಕ ಥೆರಪಿ ವಿಭಾಗದ ಸಲಹೆಗಾರ ಡಾ. ಬಿನೋ ಥಾಮಸ್‌ ಅವರ ಬಳಿ 24 ವರ್ಷದ ಎಂಬಿಎ ಪದವೀಧರೆಯೊಬ್ಬರು ತನ್ನ ಸಮಸ್ಯೆಯನ್ನು ವಿವರಿಸಿದ್ದು ಹೀಗೆ.

 

‘ತಂದೆ–ತಾಯಿ ನಡುವಿನ ಜಗಳ ಮಕ್ಕಳ ಮಾನಸಿಕ, ಶಾರೀರಿಕ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತದೆ ಎಂಬುದಕ್ಕೆ ಇದೊಂದು ಉದಾಹರಣೆ. ಈಗ ಆಕೆಗೆ ಮದುವೆ ಮಾಡಲೆಂದೇ ತಂದೆ–ತಾಯಿ ನೆಪ ಮಾತ್ರಕ್ಕೆ ಒಟ್ಟಿಗೆ ಇದ್ದಾರೆ. ಆದರೆ, ಆಕೆಯ ಆಂತರ್ಯದಲ್ಲಿ ನೋವು, ಸಂದೇಹ, ಭಯ, ಆತಂಕ ಮಡುಗಟ್ಟಿವೆ. ಮದುವೆಯಾದರೆ ತನ್ನ ಸಾಂಸಾರಿಕ ಜೀವನವೂ ತಂದೆ–ತಾಯಿಯ ರೀತಿಯಲ್ಲಿ ಸಂಕಷ್ಟಗಳಿಂದಲೇ ಕೂಡಿರಬಹುದು ಎಂಬ ಭಯ ಆಕೆಯನ್ನು ಕಾಡುತ್ತಿದೆ. ಹೀಗಾಗಿ ಮದುವೆಗೆ ಒಲ್ಲೆ ಎನ್ನುತ್ತಿದ್ದಾಳೆ’ ಎಂದು ಬಿನೋ ಥಾಮಸ್‌ ಈ ಸಮಸ್ಯೆಯ ಆಯಾಮಗಳನ್ನು ವಿವರಿಸುತ್ತಾರೆ. ಇಂಥ ಹಲವು ಉದಾಹರಣೆಗಳನ್ನು ಅವರಿಲ್ಲಿ ಹಂಚಿಕೊಂಡಿದ್ದಾರೆ.

 

‘ಬಿ.ಟೆಕ್‌. ಮಾಡಿರುವ ಯುವಕ–ಯುವತಿಗೆ ವಿವಾಹ ನಿಶ್ಚಯವಾಗಿದೆ. ಮದುವೆಗೆ ಮೂರು ವಾರಗಳಿವೆ. ಆದರೆ, ಯುವಕನ ಸ್ವಭಾವದ ಬಗ್ಗೆ ಯುವತಿಗೆ ಆಕ್ಷೇಪವಿತ್ತು. ಆತನಿಗೆ ದೃಢ ನಿರ್ಧಾರ ತೆಗೆದುಕೊಳ್ಳುವ ಸಾಮರ್ಥ್ಯವಿಲ್ಲ. ಯಾವುದೇ ಕೆಲಸವನ್ನು ಬೇಗ ಮಾಡಿ ಮುಗಿಸುವುದಿಲ್ಲ. ಇದೇ ನನ್ನ ಚಿಂತೆಗೆ ಕಾರಣ ಎಂದು ಯುವತಿ ತನ್ನ ಸಮಸ್ಯೆಯನ್ನು ಹೇಳಿಕೊಂಡಳು’ ಎಂದರು.

 

‘ವ್ಯಕ್ತಿಗತ ಸ್ವಭಾವಗಳನ್ನು ಸಂಪೂರ್ಣವಾಗಿ ಬದಲಿಸಿಕೊಳ್ಳಲು ಸಾಧ್ಯವಿಲ್ಲ. ಸ್ವಭಾವ ಬದಲಿಸಿಕೊಳ್ಳುವಂತೆ ಒತ್ತಡ ಹೇರುವುದೂ ಸರಿಯಲ್ಲ. ಇದರಿಂದ ಅನುಕೂಲಕ್ಕಿಂತ ಅಪಾಯವೇ ಹೆಚ್ಚು. ದೃಢ ನಿರ್ಧಾರ ತೆಗೆದುಕೊಳ್ಳಲು ಬೇಕಾದ ಅಂಶಗಳ ಬಗ್ಗೆ ಮನವರಿಕೆ ಮಾಡಿಕೊಡಬೇಕು. ಅವರಲ್ಲಿ ಆತ್ಮವಿಶ್ವಾಸ ತುಂಬುವ ಮೂಲಕ ಪರಿವರ್ತನೆ ತರಲು ಸಾಧ್ಯವಿದೆ ಎಂದು ಯುವತಿಗೆ ಸಲಹೆ ನೀಡಿದೆ’ ಎಂದರು.

 

‘ಎರಡು ವರ್ಷಗಳಿಂದ ಲಿವಿಂಗ್‌ ಟುಗೆದರ್‌ ಜೀವನವನ್ನು ನಡೆಸುತ್ತಿರುವ ಯುವಕ–ಯುವತಿ ಸಲಹೆ ಕೇಳಿಕೊಂಡು ಬಂದಿದ್ದರು. ಆಕೆಗೆ ಆತನನ್ನು ಮದುವೆಯಾಗಬೇಕೆಂಬ ಆಸೆ. ಆದರೆ, ಆತನಿಗೆ ಮದುವೆ ಇಷ್ಟವಿಲ್ಲ. ಈಗಿರುವ ಜೀವನವೇ ಸಾಕು ಎಂಬ ನಿರ್ಧಾರಕ್ಕೆ ಆತ ಬಂದಿದ್ದಾನೆ. ಇದು ಅವರಿಬ್ಬರ ನಡುವೆ ಭಿನ್ನಾಭಿಪ್ರಾಯಕ್ಕೆ ಕಾರಣವಾಗಿತ್ತು’ ಎಂದು ಮತ್ತೊಂದು ಉದಾಹರಣೆಯನ್ನು ನೀಡಿದರು.

 

‘ಸಂಬಂಧಗಳು ನಂಬಿಕೆ, ಪ್ರಾಮಾಣಿಕತೆಯ ಮೇಲೆ ನಿಂತಿರುತ್ತವೆ.  ಭಿನ್ನ ಅಭಿಪ್ರಾಯಗಳಿದ್ದಾಗ ಪರಸ್ಪರ ಅರ್ಥ ಮಾಡಿಕೊಂಡು ಬಾಳಬೇಕು. ಇಲ್ಲವಾದರೆ, ಸಂಬಂಧಗಳಿಗೆ ಬೆಲೆಯೇ ಇಲ್ಲವಾಗುತ್ತದೆ’ ಎಂಬ ಕಿವಿಮಾತನ್ನೂ ಡಾ. ಬಿನೋ ಥಾಮಸ್‌ ಹೇಳಿದರು.

 

**

 

**