ಜಲ್ಲಿಕಟ್ಟು ಕ್ರೀಡೆ ನಿಯಂತ್ರಣ ತನ್ನಿ

ಜಲ್ಲಿಕಟ್ಟು ನಡೆಸಲು ಅವಕಾಶ ನೀಡಬೇಕೆಂದು ಒತ್ತಾಯಿಸಿ ತಮಿಳುನಾಡಿನಲ್ಲಿ  ಜನರು ನಡೆಸಿದ ಪ್ರತಿಭಟನೆಗಳು ಸ್ವಯಂಪ್ರೇರಿತವಾಗಿದ್ದವು. ಗೂಳಿಯನ್ನು ಪಳಗಿಸುವ ಈ ಗ್ರಾಮೀಣ ಕ್ರೀಡೆಯ ಮೇಲಿನ ನಿಷೇಧವನ್ನು ತೆರವುಗೊಳಿಸಬೇಕೆಂದು ಚೆನ್ನೈನ ಮರೀನಾ ಬೀಚ್ ಸೇರಿದಂತೆ ತಮಿಳುನಾಡಿನ ಹಲವೆಡೆ ಸುಮಾರು ಒಂದು ವಾರ ಕಾಲ ನಡೆದ ಪ್ರದರ್ಶನಗಳಲ್ಲಿ ಸಾಗರೋಪಾದಿಯಲ್ಲಿ  ಜನರು ಸಮಾವೇಶಗೊಂಡಿದ್ದರು.   ತಮಿಳು ಹೆಮ್ಮೆ, ತಮಿಳು ಅಸ್ಮಿತೆ ಹಾಗೂ ತಮಿಳು ಸಂಸ್ಕೃತಿಯ ಹೆಸರಲ್ಲಿ  ವಿದ್ಯಾರ್ಥಿಗಳು ಹಾಗೂ ಯುವಜನರು ಅಪಾರ ಸಂಖ್ಯೆಯಲ್ಲಿ ಒಗ್ಗೂಡಿ ಕೆಲವೆಡೆ ಅಹೋರಾತ್ರಿ ನಡೆಸಿದ ಪ್ರದರ್ಶನಗಳು  ಆಂದೋಲನದ ರೂಪ ಪಡೆದವು.  ರಾಷ್ಟ್ರದ ಗಮನ ಸೆಳೆದವು.   ತಮಿಳುನಾಡಿನ ರಾಜಕೀಯ ನಾಯಕರು, ಸಿನಿಮಾ ತಾರೆಯರು ಸೇರಿದಂತೆ ಹಲವು ಖ್ಯಾತನಾಮರೂ ತಮಿಳು ಅಸ್ಮಿತೆಯನ್ನು ಪ್ರತಿಪಾದಿಸುವ ಈ ಹೋರಾಟಕ್ಕೆ ಬೆಂಬಲ ನೀಡಿದರು. ಇಂತಹ ಸಂದರ್ಭದಲ್ಲಿ   ತಮಿಳುನಾಡು ಸರ್ಕಾರಕ್ಕೆ ಹೆಚ್ಚಿನ ರಾಜಕೀಯ ಆಯ್ಕೆಗಳು ಇರಲಿಲ್ಲ.  ಪೊಂಗಲ್ ಹಬ್ಬದ ಸಂದರ್ಭದಲ್ಲಿ ತಮಿಳುನಾಡಿನ ಸಾಂಸ್ಕೃತಿಕ ಪರಂಪರೆಯ ಅಂಗವಾಗಿ ಸಾವಿರಾರು ವರ್ಷಗಳಿಂದ ನಡೆಸಿಕೊಂಡು ಬಂದಿದ್ದ ಗೂಳಿ ಪಳಗಿಸುವ ಈ ಕ್ರೀಡೆಯ  ಕುರಿತಂತೆ ಜನರ ಭಾವನೆಗಳು ಉಕ್ಕಿ ಹರಿದಾಗ ಸುಗ್ರೀವಾಜ್ಞೆ ಹೊರಡಿಸುವುದು ತಮಿಳುನಾಡು ಸರ್ಕಾರಕ್ಕೆ ಅನಿವಾರ್ಯವಾಗಿದ್ದೂ ನಿಜ.