ಚಳಿಗಾಲಕ್ಕೆ ಆರೋಗ್ಯ ಮಾರ್ಗದರ್ಶಿ

ಈ ಕಾಲದಲ್ಲಿ ಸೇವಿಸುವ ಆಹಾರವು ಸ್ನಿಗ್ಧಾಂಶವನ್ನು ಅಧಿಕವಾಗಿ ಹೊಂದಿರುವುದಲ್ಲದೇ ಗುಣ ಸ್ವಭಾವದಲ್ಲಿಯೂ ಉಷ್ಣತೆಯನ್ನು ಹೊಂದುವ ಕಾರಣ ದೇಹಬಲವನ್ನೂ, ಆರೋಗ್ಯವನ್ನೂ ವೃದ್ಧಿಸುತ್ತದೆ. ಆದರೆ ಕಫ ದೋಷ ಪ್ರಕೋಪಕ್ಕೆ ಕಾರಣವಾಗುವ ಆಹಾರ, ವಿಹಾರಗಳನ್ನು ಅನುಸರಿಸುವುದರಿಂದ ಶೀತ, ಕೆಮ್ಮು, ಅತಿನಿದ್ರತೆ, ಅಗ್ನಿಮಾಂದ್ಯತೆ, ಉಬ್ಬಸದಂತಹ ಸಮಸ್ಯೆಗಳು ಉಲ್ಬಣಗೊಳ್ಳುತ್ತವೆ.

ಆಹಾರ: ಬೆಳಿಗ್ಗೆ ಎದ್ದು ನಿತ್ಯಕರ್ಮಗಳನ್ನು ಪೂರೈಸಿದ ಬಳಿಕ ಬಾದಾಮಿ ಹಾಲು, ಸಿಹಿ ತಿನಿಸು (ಮಿತವಾಗಿ)ಗಳನ್ನು ಸೇವಿಸಬಹುದು. ಹೊಸಕ್ಕಿ ಊಟ, ಮೊಸರನ್ನ, ಸಿಹಿ, ಹುಳಿ ರಸ ಪ್ರಧಾನವಾಗಿರುವ ಪದಾರ್ಥಗಳು, ಪಾಯಸ, ಸಿಹಿ, ಖಾರ ಪೊಂಗಲ್, ಎಳ್ಳಿನ ಚಿಗಳಿ, ಎಳ್ಳುಂಡೆ, ಬೆಲ್ಲ ಮುಂತಾದವುಗಳ ಹಿತಮಿತವಾದ ಸೇವನೆ ಒಳಿತು.

ಖರ್ಜೂರ, ದ್ರಾಕ್ಷಿ, ಬಾದಾಮಿ, ಗೋಡಂಬಿ, ಅಂಜೂರ ಮುಂತಾದ ಒಣಹಣ್ಣುಗಳು, ನೆಲ್ಲಿಕಾಯಿ, ಕಿತ್ತಳೆ, ದಾಳಿಂಬೆ ಮೊದಲಾದ ಹಣ್ಣುಗಳ ಬಳಕೆ, ಊಟದಲ್ಲಿ ಎರಡು ಚಮಚ ತುಪ್ಪ, ದೋಸೆ, ಇಡ್ಲಿಗೆ ಬೆಣ್ಣೆಯನ್ನು ಸವರಿ ಮಕ್ಕಳಿಗೆ ನೀಡಿದಲ್ಲಿ, ದೈಹಿಕ ಹಾಗೂ ಬೌದ್ಧಿಕ ಬೆಳವಣಿಗೆಗೆ ಸಹಕಾರಿ. ಧಾನ್ಯಗಳಲ್ಲಿ ಗೋಧಿ, ಜೋಳ, ಉದ್ದು; ಮಾಂಸಾಹಾರಿಗಳಾದರೆ, ಮೀನು, ಕೋಳಿ, ಮೊಲ, ಆಡು ಮುಂತಾದ ವು ಗಳನ್ನು ಸೇವಿಸಬಹುದು.

ಗೋವಿನ ಉತ್ಪನ್ನಗಳಾದ ಹಾಲು, ಮೊಸರು, ಸಿಹಿತಿನಿಸುಗಳಾದ ಖೀರು, ಪೇಡಾ, ಶ್ರೀಖಂಡ, ಪನೀರ್, ಗಿಣ್ಣು ಇತ್ಯಾದಿ, ಕಬ್ಬಿನ ಹಾಲು, ಬಿಸಿನೀರಿನ ಸೇವನೆ ಉತ್ತಮ. 

ಹೀಗೆ ಮಾಡಿ: ತಲೆಗೆ ಎಳ್ಳೆಣ್ಣೆ ಅಥವಾ ತೆಂಗಿನೆಣ್ಣೆಯನ್ನು ಹಚ್ಚಿ, ಇಡೀ ದೇಹಕ್ಕೆ ಕೊಂಚ ಬಿಸಿ ಮಾಡಿದ ಎಳ್ಳೆಣ್ಣೆಯ ಅಭ್ಯಂಜನವನ್ನು ಮಾಡುವುದರಿಂದ ಚರ್ಮ ಒಣಗುವಿಕೆ, ಒಡೆಯುವಿಕೆ, ಸುಕ್ಕುಗುಟ್ಟುವುದು ದೂರವಾಗುತ್ತದೆ ಮಾತ್ರವಲ್ಲದೇ ದೇಹದ ಎಲ್ಲಾ ಅಂಗಾಂಗಗಳಿಗೂ ರಕ್ತ ಸಂಚಾರ ಹೆಚ್ಚಿ ಹೃದಯದ ಆರೋಗ್ಯವನ್ನೂ ಕಾಪಾಡುತ್ತದೆ. ನಿಯಮಿತವಾದ ವ್ಯಾಯಾಮವು ಆಲಸ್ಯವನ್ನು ದೂರಗೊಳಿಸಿ ಲವಲವಿಕೆಯಿಂದಿರಲು ಸಹಕಾರಿ.

ಬಿಸಿನೀರಿನ ಸ್ನಾನವು ದೇಹದ ಜಡತೆಯನ್ನು ನಿವಾರಿಸುತ್ತದೆ. ಆದರೆ ತಲೆಗೆ ಉಗುರು ಬೆಚ್ಚಗಿನ ನೀರನ್ನು ಬಳಸಬೇಕು. ಶೌಚಕರ್ಮಗಳಿಗೂ ಬಿಸಿನೀರಿನ ಬಳಕೆ ಉತ್ತಮ. ಮುಂಜಾನೆಯ ವಾಕಿಂಗ್, ಪ್ರಯಾಣ ಇತ್ಯಾದಿ ಸಂದರ್ಭಗಳಲ್ಲಿ ಉಣ್ಣೆಯಿಂದ ತಯಾರಿಸಿದ ವಸ್ತ್ರ ಧಾರಣೆ, ಶಯನಕ್ಕೆ ದಪ್ಪನೆಯ ಬ್ಲಾಂಕೆಟಗಳನ್ನು ಹೊದಿಕೆಗಳಾಗಿ ಬಳಸುವುದು ಉತ್ತಮ.

ವರ್ಜಿಸಬೇಕಾದುದು: ಹಗಲು ನಿದ್ರೆ, ಖಾರ, ಕಹಿ, ಒಗರು ಪ್ರಧಾನವಾದ ಆಹಾರ, ಅತಿಯಾದ ಕಾಫಿ, ಚಹಾ ಸೇವನೆ, ತಣ್ಣೀರಿನ ಸ್ನಾನ- ಪಾನ, ತಂಪು ಪಾನೀಯ, ಐಸ್ ಕ್ರೀಂ, ಚಳಿಗಾಳಿಗೆ ಮೈ ಒಡ್ಡುವುದು.

ಕೇವಲ ಚೆನ್ನಾಗಿ ತಿನ್ನುವುದು ಮಾತ್ರವಲ್ಲದೇ ಚೆನ್ನಾಗಿ ದುಡಿಯುವುದರ ಮೂಲಕ ಕಾಲದ ಉತ್ತಮ ಸದುಪಯೋಗ ಪಡೆಯಬಹುದು ಅಲ್ಲದೇ ಉತ್ತಮ ಆರೋಗ್ಯವನ್ನು ಪಡೆಯಬಹುದಾಗಿದೆ.
-ಎನ್. ಸ್ವಾತಿ ಉಡುಪಿ