ಪಾರ್ಕಿಂಗ್‌ ಅವ್ಯವಸ್ಥೆ: ಸಂಚಾರಕ್ಕೆ ಅಡ್ಡಿ

 

ನಗರದ ಮಧ್ಯಭಾಗದಲ್ಲಿ ವಿಸ್ತರಣೆ­ಗೊಂಡ ರಸ್ತೆಯಲ್ಲಿ ಒಮ್ಮೆ ಸಂಚರಿಸಿದರೆ ಚಕ್ಕನೆ ಗೋಚರಿಸು­ವುದು ರಸ್ತೆಗಳ ಇಕ್ಕೆಲಗಳಲ್ಲಿರುವ ವಾಹನಗಳ ಪಾರ್ಕಿಂಗ್‌ ದುರವಸ್ಥೆ. ಚಿಕ್ಕ ಮತ್ತು ಕೈಗಾಡಿ ವ್ಯಾಪಾರಸ್ಥರು ಪಾದಚಾರಿ ಮಾರ್ಗವನ್ನು ಅತಿಕ್ರಮಣ ಮಾಡಿ­ದ್ದಲ್ಲದೇ, ನಡುರಸ್ತೆಯಲ್ಲಿ ವ್ಯಾಪಾರಕ್ಕೆ ಇಳಿದಿದ್ದಾರೆ. ನಿರಂತರ­ವಾಗಿ ಹೆಚ್ಚು­ತ್ತಿರುವ ಜನಸಂಖ್ಯೆ ಹಾಗೂ ವಾಹನಗಳಿಂದಾಗಿ ದಟ್ಟನೆ ಹೆಚ್ಚಾಗಿ, ಸಂಚಾರಕ್ಕೆ ಅಡಚಣೆ ಉಂಟಾಗಿದೆ.  

 

ಈ ಮೊದಲು ರಸ್ತೆಯ ಒಂದೇ ಕಡೆ ವಾಹನ ಪಾರ್ಕಿಂಗ್‌ ವ್ಯವಸ್ಥೆ ಇತ್ತು. ಈಗ ರಸ್ತೆ ಅಗಲಗೊಂಡ ಬಳಿಕ ಎರಡೂ ಕಡೆಗಳಲ್ಲಿ ಪಾರ್ಕಿಂಗ್‌ ವ್ಯವಸ್ಥೆ ಮಾಡಿರು­ವು­ದರಿಂದ ಜನಸಂಚಾರಕ್ಕೆ ರಸ್ತೆಯು ಮತ್ತೆ ಕಿರಿದಾಗಿದೆ. 

 

ಕಾಕತಿವೇಸ್‌, ಶನಿವಾರ ಕೂಟ, ಗಣಪತಿ ಗಲ್ಲಿ, ಖಡೇಬಜಾರ್‌, ಕಿರ್ಲೋಸ್ಕರ ರಸ್ತೆ, ಮಾರುತಿ ಗಲ್ಲಿ, ಮೇದಾರ ಗಲ್ಲಿ, ಕಡೋಲ್ಕರ ಗಲ್ಲಿ, ನರಗುಂದಕರ ಭಾವೆ ಚೌಕ್‌, ಅನಂತಶಯನ ಗಲ್ಲಿ, ಕುಲಕರ್ಣಿ ಗಲ್ಲಿ, ಪಾಟೀಲಗಲ್ಲಿ, ಶಿವಾಜಿ ರಸ್ತೆ, ಮಠಗಲ್ಲಿ, ಪಿಂಪಳಕಟ್ಟಿ, ಫೋರ್ಟ್‌ ರೋಡ್‌, ಎಸ್‌ಪಿಎಂ ರಸ್ತೆ, ಕಾಲೇಜು ರಸ್ತೆ ಸೇರಿ ಮಧ್ಯ ಭಾಗದಲ್ಲಿ ರಸ್ತೆ ಅಗಲ­ಗೊಂಡಷ್ಟೂ ಪಾರ್ಕಿಂಗ್‌ ಸಮಸ್ಯೆ ತಪ್ಪಿಲ್ಲ. ಕೈಗಾಡಿ ವ್ಯಾಪಾರಸ್ಥರು ರಸ್ತೆ ಮಧ್ಯದಲ್ಲಿಯೇ  ಚಾಚಿಕೊಂಡಿದ್ದಾರೆ. 

 

ಅಂಗಡಿಗಳ ಮಾಲೀಕರಿಗೆ ಗ್ರಾಹ­ಕರು ಬೇಕು. ಆದರೆ, ಗ್ರಾಹಕರ ವಾಹನ ಹಾಗೂ ಲಗೇಜ್‌ಗಳು ಬೇಡ. ಮಾಲೀ­ಕರ ಇಂಥ ಗ್ರಾಹಕ ವಿರೋಧಿ ಧೋರಣೆಯಿಂದ ನಗರ ಮಧ್ಯದ ಮಾರುಕಟ್ಟೆ ಭಾಗ ವಾಹನದಟ್ಟಣೆ ಸ್ಥಳವಾಗಿ ಪರಿಣಮಿಸಿದೆ. 

 

ಪೊಲೀಸರ ವೈಫಲ್ಯ: ‘ನಗರದಲ್ಲಿಯ ಸಂಚಾರ ವ್ಯವಸ್ಥೆಯನ್ನು ಸರಿಪಡಿಸ­ಬೇಕಾದ ಪೊಲೀಸ್‌ ವ್ಯವಸ್ಥೆಯ ವೈಫಲ್ಯ ಹಾಗೂ ಕಟ್ಟಡಗಳ ನೆಲಮಾಳಗೆ ತೆರವುಗೊಳಿಸದ ಮಹಾನಗರ ಪಾಲಿಕೆಯ ವೈಫಲ್ಯವೇ ಇಂಥ ಸಮಸ್ಯೆಗೆ ಕಾರಣವಾಗಿದೆ‘ ಎಂದು ನಾಗರೀಕ ಶ್ರೀನಿವಾಸ ತಾಳೂಕರ ಅಭಿಪ್ರಾಯ ವ್ಯಕ್ತಪಡಿಸಿದರು.

 

**

 

**