3 ತಿಂಗಳು, 3 ಅಪಘಾತ, ಮೂವರ ಸಾವು

ಚಿತ್ರದುರ್ಗ: ನಗರದಲ್ಲಿ ಚತುಷ್ಪಥ ಹೆದ್ದಾರಿ ನಿರ್ಮಾಣವಾದಾಗಿನಿಂದ ಹೌಸಿಂಗ್‌ಬೋರ್ಡ್‌ ಕಾಲೊನಿ ಮತ್ತು ಕೆಳಗೋಟೆ ನಡುವಿನ ಹೆದ್ದಾರಿಯಲ್ಲಿ ಅಪಘಾತಗಳ ಸಂಖ್ಯೆ ಏರುತ್ತಲೇ ಇದೆ. ಆದರೂ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವ ಯಾವ ಪ್ರಯತ್ನಗಳೂ ಆಗಿಲ್ಲ.

ಅಪಘಾತ ಸಂಭವಿಸಿದಾಗ ಜನರು ಪ್ರತಿಭಟನೆ ನಡೆಸಿ, ಮೇಲ್ಸೇತುವೆ ಅಥವಾ ಅಂಡರ್‌ಪಾಸ್‌ ನಿರ್ಮಿಸಲು ಒತ್ತಾಯಿಸುತ್ತಾರೆ. ಪ್ರತಿಭಟನೆಯಲ್ಲಿ ಕೆಲವರನ್ನು ಪೊಲೀಸರು ಬಂಧಿಸಿ ಬಿಡುಗಡೆ ಮಾಡುತ್ತಾರೆ. ಮುಂದಿನ ಅಪಘಾತ ಸಂಭವಿಸುವವರೆಗೂ ವಿಷಯ ತಣ್ಣಗಾಗುತ್ತದೆ.

ಕಳೆದ ಮೂರು ತಿಂಗಳಲ್ಲಿ ಮೂವರು ಇದೇ ಜಾಗದಲ್ಲಿ ಇಂಥದ್ದೇ ಅಪಘಾತಗಳಲ್ಲಿ ಮೃತಪಟ್ಟಿದ್ದಾರೆ. ಶುಕ್ರವಾರ ರಾತ್ರಿ ನರ್ಸ್ ದುರ್ಗಮ್ಮ (45) ಅಪಘಾತದಲ್ಲಿ ಮೃತಪಟ್ಟಿದ್ದಾರೆ. ‘ಸಂಪ್ರದಾಯ’ವೆಂಬಂತೆ ಶನಿವಾರ ನಾಗರಿಕರು ಪ್ರತಿಭಟನೆ ಮಾಡಿದರು. ಪೊಲೀಸರು ಒಂದಷ್ಟು ಮಂದಿಯನ್ನು ಬಂಧಿಸಿ ಬಿಡುಗಡೆ ಮಾಡಿದರು.

ಕೆಳಗೋಟೆ ಮತ್ತು ಹೌಸಿಂಗ್‌ ಬೋರ್ಡ್‌ ಕಾಲೊನಿಗಳು ಅವಳಿ ಬಡಾವಣೆಗಳಿದ್ದಂತೆ. ಎರಡೂ ಕಡೆಯಿಂದ ಜನ ದಿನವಿಡೀ ಓಡಾಡುತ್ತಿ
ರುತ್ತಾರೆ. ಅದರಲ್ಲೂ ಆಸ್ಪತ್ರೆ, ಶಾಲೆ, ಕಾಲೇಜು ಹಾಸ್ಟೆಲ್‌ಗಳಿರುವುದರಿಂದ ಸಂಚಾರ ದಟ್ಟಣೆ ಇರುತ್ತದೆ.

ಹೌಸಿಂಗ್‌ ಬೋರ್ಡ್‌ ಕಾಲೊನಿಯಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕವಿಲ್ಲ. ನೀರಿಗೆಂದು ಹೆದ್ದಾರಿ ದಾಟಿ ಕೆಳಗೋಟೆಗೆ ಬರುತ್ತಾರೆ. ಹೆದ್ದಾರಿ ನಡುವೆ ಅಂಡರ್‌ಪಾಸ್‌ ತುಸು ದೂರದಲ್ಲಿದೆ. ಬೈಕ್ ಇದ್ದವರಷ್ಟೇ ಅದನ್ನು ಬಳಸುತ್ತಾರೆ. ವೃದ್ಧರು, ಆಸ್ಪತ್ರೆ ಸಿಬ್ಬಂದಿ ಹೆದ್ದಾರಿ ದಾಟಿ, ವಿಭಜಕದ ಸಂದು
ಗಳಲ್ಲಿ ತೂರಿಕೊಂಡೇ ಸಂಚರಿಸುತ್ತಾರೆ. ಇಂಥ ವೇಳೆಯಲ್ಲೇ ಅಪಘಾತಕ್ಕೀಡಾಗುತ್ತಾರೆ ಎಂಬುದು ನಾಗರಿಕರ ವಿಶ್ಲೇಷಣೆ.

ಆರಂಭದಿಂದಲೂ ಬೇಡಿಕೆ: ಚತುಷ್ಪಥ ಹೆದ್ದಾರಿ ನಿರ್ಮಾಣವಾದಾಗಿನಿಂದ ಈ ಜಾಗದಲ್ಲಿ ಅಂಡರ್‌ಪಾಸ್‌ ನಿರ್ಮಾಣಕ್ಕೆ ಜನ ಪದೇ ಪದೇ ಬೇಡಿಕೆ ಇಟ್ಟಿದ್ದಾರೆ.

‘ಇಷ್ಟಾದರೂ ಕೆಳಸೇತುವೆ ನಿರ್ಮಾಣಕ್ಕೆ ಸರ್ಕಾರಗಳು ಮುಂದಾಗಲಿಲ್ಲ. ಅಪಘಾತ, ಸಾವಿನ ಸಂಖ್ಯೆ ತಗ್ಗಿಲ್ಲ’ ಎಂದು ಹೌಸಿಂಗ್ ಬೋರ್ಡ್  ಬಡಾವಣೆಯ ಪ್ರಕಾಶ್, ಬಸವರಾಜು, ಆಟೊ ಡ್ರೈವರ್‌ಗಳು, ಹೋಟೆಲ್‌ನವರು ಬೇಸರ ವ್ಯಕ್ತಪಡಿಸುತ್ತಾರೆ.

ಮೂರು ವರ್ಷಗಳ ಹಿಂದೆ ಹೀಗೆ ಅಪಘಾತ ಸಂಭವಿಸಿದಾಗ, ನಾಗರಿಕರು ಪ್ರತಿಭಟನೆ ನಡೆಸಿದರು. ಜನರ ಒತ್ತಡಕ್ಕೆ ಮಣಿದು ಕಬ್ಬಿಣದ ಸ್ಕೈವಾಕ್‌ ನಿರ್ಮಾಣಕ್ಕೆ ತಳಹದಿ ಹಾಕಿ, ಕಬ್ಬಿಣದ ಸರಳುಗಳನ್ನು ಹಾಗೆ ಉಳಿಸಿದ್ದಾಯಿತು. ಆದರೆ, ಕಾಮಗಾರಿ ನನೆಗುದಿಗೆ ಬಿತ್ತು. ‘ಈಗ ಬಾಯ್ದೆರೆದು ಕೊಂಡಿರುವ ಕಬ್ಬಿಣದ ಸರಳುಗಳು ಸರ್ವೀಸ್ ರಸ್ತೆ ಸವಾರರನ್ನು ಅಪಾಯಕ್ಕಾಗಿ ಆಹ್ವಾನಿಸುತ್ತಿವೆ.

ಚಳ್ಳಕೆರೆ, ಶಾಲೆ, ಆಸ್ಪತ್ರೆ ಕಡೆಗೆ ಸಾಗುವ ಖಾಸಗಿ ಬಸ್‌ಗಳು, ಲಾರಿಗಳು, ಆಂಬುಲೆನ್ಸ್­ಗಳು ಇದರ ಪಕ್ಕದಲ್ಲೇ ಸಾಗಬೇಕು. ತುಸು ಅಲುಗಿದರೂ ಸರಳುಗಳ ಮೇಲೆ ಉರುಳಿ ದೊಡ್ಡ ದುರಂತ ಸಂಭವಿಸು­ತ್ತದೆ’ ಎಂದು ಘಟನೆಗಳನ್ನು ನಿತ್ಯ ನೋಡುವವರು  ‘ಪ್ರಜಾವಾಣಿ’ ಜತೆ  ಹಂಚಿಕೊಂಡರು.