ಫಲಪುಷ್ಪ ಪ್ರದರ್ಶನದಲ್ಲಿ ‘ವಂಡರ್ ವುಮೆನ್’!

ರಾಜ್ಯ ಮತ್ತು ರಾಷ್ಟ್ರಮಟ್ಟದಲ್ಲಿ ಸಾಧನೆ ಮಾಡಿದ ಮಹಿಳೆಯರಾದ ಸಿಂಧು, ದೀಪಾ ಮಲ್ಲಿಕ್, ಪರಿಸರ ಪ್ರೇಮಿ ಸಾಲು ಮರದ ತಿಮ್ಮಕ್ಕ, ಭಾರತದ ಪ್ರಥಮ ಮಹಿಳಾ ಪ್ರಧಾನಿ, ಮುಖ್ಯಮಂತ್ರಿ, ವಿಶ್ವಸುಂದರಿ, ಭುವನಸುಂದರಿ ಹೀಗೆ ಎಲ್ಲವೂ ಮಹಿಳೆಯರಿಗೆ ಮೀಸಲಾಗುವಂಥ ವರ್ಣರಂಜಿತ ಕಲಾಕೃತಿಗಳು ರಾರಾಜಿಸಲಿವೆ.

ಮಹಿಳೆಯನ್ನು ಗೌರವಿಸಿ: ಈ ಬಾರಿಯ ಪ್ರದರ್ಶನದಲ್ಲಿ ಮಹಿಳೆಯರಿಗೆ ಹೆಚ್ಚು ಪ್ರಾಧಾನ್ಯತೆ ನೀಡಲಾಗಿದೆ. ಪ್ರಕೃತಿ, ಭೂಮಿ, ನೀರು, ಭಾರತ ಮಾತೆ, ಕನ್ನಡಾಂಬೆ, ತಾಯಿ ಸೇರಿದಂತೆ ದೇಸೀ ಸಂಸ್ಕೃತಿಯಲ್ಲಿ ಮಹಿಳೆಯರಿಗೆ ವಿಶೇಷವಾದ ಗೌರವ ನೀಡಲಾಗಿದೆ. ಹೆಣ್ಣನ್ನೂ ಎಲ್ಲರೂ ಪೂಜ್ಯ ಭಾವನೆ
ಯಿಂದ ಕಾಣಬೇಕು ಎಂಬ ಸಂದೇಶವನ್ನು ಪ್ರದರ್ಶನದ ಮೂಲಕ ನೀಡುವ ಉದ್ದೇಶ ತೋಟಗಾರಿಕೆ ಇಲಾಖೆ ಅಧಿಕಾರಿಗಳಾದ್ದಾಗಿದೆ.

ಪ್ರಸ್ತುತ ದಿನಗಳಲ್ಲಿ ಹೆಣ್ಣಿನ ಮೇಲೆ ನಡೆಯುತ್ತಿರುವ ಶೋಷಣೆ, ದೌರ್ಜನ್ಯ ವಿರುದ್ಧ ಜಾಗೃತಿ ಮೂಡಿಸಲು ವಿಶೇಷವಾಗಿರುವ ಕಲಾಕೃತಿಗಳನ್ನು ಇಡಲಾಗುತ್ತಿದೆ. ಅದರಲ್ಲಿ ಹೋರಾಟಗಾರ್ತಿಯಾಗಿ ‘ವಂಡರ್ ವುಮೆನ್’ ಮಾದರಿ ಆಕರ್ಷಣೆಯ ಕೇಂದ್ರ ಬಿಂದುವಾಗಲಿದೆ. ಹೆಣ್ಣನ್ನು ನೋಡುವ ನೋಟ ಭಾವನಾತ್ಮಕ ಮತ್ತು ಅಂತರಾಳವಾಗಿ ಬದಲಾಗಬೇಕು.

ಶೋಷಣೆ ನಿಲ್ಲಬೇಕು, ಸಮಾನತೆ ನೀಡಬೇಕು. ಮಹಿಳೆಯಿಂದ ಸಾಧ್ಯವಾದುದು ಯಾವುದೂ ಇಲ್ಲ. ಮನಸ್ಸು ಮಾಡಿದರೆ, ಏನು ಬೇಕಾದರೂ ಮಾಡಬಲ್ಲಳು ಎಂಬುದನ್ನು ಪ್ರದರ್ಶನದಲ್ಲಿ ತೋರಿಸುವ ಉದ್ದೇಶವಿದೆ ಎಂದು ಇಲಾಖೆಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ಮಾಹಿತಿ ನೀಡಿದರು.

60ಕ್ಕೂ ಅಧಿಕ ಬಗೆಯ ಹೂಗಳು:  ವಿವಿಧ ಪುಷ್ಪ ಜೋಡಣೆಗಳಿಗೆ ಹಲವು ಬಗೆಯ ವಿಶೇಷ ಹೂಗಳನ್ನು ಬಳಸುತ್ತಿರುವುದರ ಜತೆಗೆ ಕುಂಡದಲ್ಲಿ ಬೆಳೆದ ಚಿತ್ತಾಕರ್ಷಕ ವರ್ಣಗಳಿಂದ ಕೂಡಿದ 60ಕ್ಕೂ ಹೆಚ್ಚು ಬಗೆಯ ವಾರ್ಷಿಕ ಹೂಗಳು ಪುಷ್ಪ ರಸಿಕರಿಗೆ ಮುದ ನೀಡಲಿವೆ.

ಪ್ರಮುಖವಾಗಿ ನಾಲ್ಕು ವರ್ಣಗಳಲ್ಲಿ ಪೆಂಟಾಸ್, 13 ಬಣ್ಣಗಳಲ್ಲಿ ಆಟ್‌ಮಿನಿಯಾಸ್ ನೋಡುವ ಸದವಕಾಶ ಪುಷ್ಪ ಪ್ರಿಯರಿಗೆ ದೊರೆಯಲಿದೆ, ಆರ್ಕಿಡ್ಸ್, ಆಂಥೋರಿಯಂ, ಕಾರ್ನೇಶನ್, ಕಾಕ್ಸ್ ಕೂಂಬ್, ಸೆಲೋಶಿಯಾ, ಪ್ಲಾಕ್ಸ್, ಡೇಲಿಯಾ, ಸಾಲ್ವಿಯಾ, ಚೆಂಡು ಹೂ, ಪೆಟೂನಿಯಾ, ಆಂಟಿರಿನಮ್,  ಕಾಸ್‌ಮಾಸ್, ನಷ್ಟ್ಯೋಷಿಯಾ, ಬಾಲ್ಸಂ, ಹಾಲಿಹಾಕ್, ಹೈಪೋಮಿಯಾ, ಸ್ವೀಟ್ ವಿಲಿಯಮ್ಸ್, ಗಜೋನಿಯಾ, ಡಯಾಂತಸ್, ಗೈಲಾರ್ಡಿಯಾ ಬಳಸಿಕೊಳ್ಳಲಾಗಿದೆ.