ಆಗ್ನೇಯ ಶಿಕ್ಷಕರ ಕ್ಷೇತ್ರದಿಂದ ವಿಧಾನ ಪರಿಷತ್ತಿಗೆ ನಡೆದ ಉಪ ಚುನಾವಣೆಯಲ್ಲಿ 1,237 ಮತಗಳು ತಿರಸ್ಕೃತಗೊಂಡಿವೆ (ಪ್ರ.ವಾ., ಫೆ. 8). ಅಂದರೆ ಶಿಕ್ಷಕರಿಗೂ ಮತದಾನದ ಹಕ್ಕು ಚಲಾಯಿಸುವ ಪ್ರಕ್ರಿಯೆ ಬಗ್ಗೆ ಅರಿವಿಲ್ಲ ಎಂದಾಯಿತು!
ಶಿಕ್ಷಕರೇ ಹೀಗೆ ಮತ ಹಾಕುವ ವಿಷಯದಲ್ಲಿ ದೊಡ್ಡ ಸಂಖ್ಯೆಯಲ್ಲಿ ತಪ್ಪು ಮಾಡಿದಾಗ ಇನ್ನು ಜನಸಾಮಾನ್ಯರಿಂದ ತಪ್ಪಾಗುವುದು ಸಹಜ. ಅನಕ್ಷರಸ್ಥರು ಕೂಡ ಮತದಾನ ಮಾಡುವಾಗ ಎಚ್ಚರಿಕೆ ವಹಿಸುತ್ತಾರೆ. ಇನ್ನು ಭವಿಷ್ಯದ ಪ್ರಜೆಗಳನ್ನು ರೂಪಿಸುವ ವರ್ಗವೇ ತಪ್ಪು ಮಾಡಿದರೆ ಹೇಗೆ? ಇದು ಶಿಕ್ಷಕರ ಅಸಡ್ಡೆಯೋ ಬೇಜವಾಬ್ದಾರಿಯೋ ಎಂಬ ಅನುಮಾನ ಕಾಡದೇ ಇರದು.
ಮತದಾನದ ಪ್ರಕ್ರಿಯೆಯನ್ನು ಪ್ರಜಾಪ್ರಭುತ್ವದ ಮಹಾಹಬ್ಬ ಎಂದೇ ಬಣ್ಣಿಸಲಾಗುತ್ತದೆ. ಹೀಗಾಗಿ ಸರ್ಕಾರ ಶಿಕ್ಷಕರಿಗೆ ಸೂಕ್ತ ರೀತಿಯಲ್ಲಿ ಮತದಾನ ಮಾಡುವ ಪಾಠ ಹೇಳಿಕೊಡಬೇಕು.
ದೇವೇಶ ಸೂರಗುಪ್ಪ, ಸಾಗರ
