ನಿವೃತ್ತ ಪ್ರಾಧ್ಯಾಪಕನ ಮನೆಅಂಗಳ ಸಸ್ಯಕಾಶಿ

ಹುಮನಾಬಾದ್: ಹಳ್ಳಿಖೇಡ(ಬಿ) ಗ್ರಾಮದ ನಿವೃತ್ತ ಪ್ರಾಧ್ಯಾಪಕ ಸುರೇಂದ್ರ ಸಂಗಪ್ಪ ಹೊಡ್ಮನಿ ಅವರು ತಮ್ಮ ಮನೆ ಅಂಗಳವನ್ನೇ ವಿವಿಧ ಹೂವು, ಹಣ್ಣು, ಔಷಧಿ ಗಿಡಗಳ ತೋಟವನ್ನಾಗಿಸಿದ್ದಾರೆ.

90X120 ಅಳತೆ ನಿವೇಶನದಲ್ಲಿ ಮನೆ ಕಟ್ಟಿದ್ದು ಕೇವಲ 30X40ಅಳತೆಯಲ್ಲಿ ಮಾತ್ರ. ಉಳಿದ 60X80ಅಳತೆ ನಿವೇಶನ ಸಂಪೂರ್ಣ ತೋಟಗಾರಿಕೆಗೆ ಮೀಸಲಿಟ್ಟಿದ್ದಾರೆ. ಇದರಲ್ಲಿ ತರಕಾರಿ, ಹೂ, ವಿವಿಧ ಹಣ್ಣು, ಮನೆ ಅಂದ ಹೆಚ್ಚಿಸುವ  ಗಿಡಗಳನ್ನು ನೋಡಿದರೆ ಸಸ್ಯ ಸಂಗ್ರಹಾಲಯದ ಅನುಭವ ನೀಡುತ್ತದೆ.  

101ಕ್ಕೂ ಅಧಿಕ ತಳಿ:  ಮಲ್ಲಿಗೆ, ನಾಗಮಲ್ಲಿಗೆ, ಮೈಸೂರು ಮಲ್ಲಿಗೆ, ಸಣ್ಣ ಮಲ್ಲಿಗೆ, ಸದಾ ಮಲ್ಲಿಗೆ, ಜಾಜಿ ಮಲ್ಲಿಗೆ, ದಾಸವಾಳ, ಕನಕಾಂಬರ, ಬ್ರಹ್ಮಕಮಲ, ಕೃಷ್ಣ ಕಮಲ, ಸಂಪಿಗೆ, ಕಾಕಡಾ ಹೀಗೆ ಒಂದೇ ಎರಡೇ.... ಹೇಳುತ್ತ ಹೋದರೇ ವಿವಿಧ ಜಾತಿ ಹೂವಿನ ಗಿಡಗಳ ಹೆಸರಿನ ಸಾಲು ಬೆಳೆಯುತ್ತದೆ. ಹೀಗೆ ಬೆಳೆದ ಗಿಡಗಳು ಸುವಾಸನೆ , ಆಕರ್ಷಣೆ ಹೆಚ್ಚಿಸಿವೆ.

ತರಕಾರಿಗಳಲ್ಲಿ ಹೀರೇಕಾಯಿ, ತುಪ್ಪದ ಹೀರೇಕಾಯಿ, ಹಾಗಲಕಾಯಿ, ಶಾವಿ ಪಲ್ಲೆ, ಪುದಿನಾ, ನೆಲ್ಲಿಕಾಯಿ, ನುಗ್ಗೆಕಾಯಿ , ನಿಂಬೆ ಒಳಗೊಂಡಂತೆ ನಿತ್ಯ ಬಳಕೆಗೆ ಬೇಕಾಗುವ ವಿವಿಧ ತರಕಾರಿಗಳು.  ಹಣ್ಣಿಗಳಲ್ಲಿ ಅಂಜೂರ,  ಪೇರಲ(ಜಾಪಳ). ಸಪೊಟಾ, ದಾಳಿಂಬೆ, ಮಾವು, ತೆಂಗು, ಸೀತಾಫಲ ಇತ್ಯಾದಿ.

ಔಷಧಿ ಸಸ್ಯಗಳಾದ ಅಂಬೃತ ಬಳ್ಳಿ, ಕರಿಬೇವು, ಹೆಬ್ಬೇವು, ಔಡಲ ಹೀಗೆ ಈ ಪಟ್ಟಿ ಬೆಳೆಯುತ್ತದೆ. ಪ್ರವಾಸಕ್ಕೆ ಹೋದಾಗ ಕಾಣುವ ಹೊಸ ಗಿಡಗಳನ್ನು ತಂದು ಮನೆಯಲ್ಲಿ ನೆಡುವುದು ಇವರ ಹವ್ಯಾಸ. 

ಸಾಹಿತ್ಯ ಕೃಷಿ: ಪರಿಸರದಷ್ಟೇ ಸಾಹಿತ್ಯ ಕೃಷಿಯ ಬಗ್ಗೆಯೂ ಅಪಾರ ಆಸಕ್ತಿ ಹೊಂದಿರುವ ಹೊಡ್ಮನಿ ತಮ್ಮ ಇಳಿವಯಸ್ಸಲ್ಲೂ ಪ್ರೀತಿ, ಪ್ರೇಮ ವಿಷಯ ಅತ್ಯಂತ ಅರ್ಥಪೂರ್ಣ ವಿಶ್ಲೇಷಿಸುತ್ತಾರೆ.