‘ವೈಮಾನಿಕ ಲೋಕ’ದಲ್ಲಿ ದೇಸಿ ಪಾರುಪತ್ಯ

ಸೂಪರ್‌ ಸಾನಿಕ್‌ ಲಘು ಯುದ್ಧ ವಿಮಾನಗಳು ಶರವೇಗದಲ್ಲಿ ಸಾಗುತ್ತಾ ಪ್ರದರ್ಶಿಸಿದ ಪಟ್ಟುಗಳು ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿದವು.

 

ಸಂಪೂರ್ಣ ದೇಸಿ ತಂತ್ರಜ್ಞಾನವನ್ನು ಆಧರಿಸಿ ರೂಪುಗೊಂಡ ಲಘು ಯುದ್ಧ ವಿಮಾನ ‘ತೇಜಸ್‌’  ಕಿವಿಗಡಚಿಕ್ಕುವಂತೆ ಸದ್ದು ಮಾಡುತ್ತಾ ಅರೆಕ್ಷಣದಲ್ಲಿ ನಭದೆತ್ತರಕ್ಕೆ ಹಾರಿತು. ಒಮ್ಮೆ ಶರವೇಗದಲ್ಲಿ ಸಾಗಿ, ಮಗದೊಮ್ಮೆ ನಿಧಾನವಾಗಿ ಸಾಗುತ್ತಾ, ಬುಡಮೇಲಾಗಿ ಚಲಿಸುತ್ತಾ, ಬಿಳಿ ಮೋಡಗಳ ನಡುವೆ ಮರೆಯಾಗಿ, ಆಗಸದಲ್ಲೇ ಉರುಳು ಸೇವೆ ಮಾಡುತ್ತಾ ಈ ವಿಮಾನ ಪ್ರದರ್ಶಿಸಿದ ಕರಾಮತ್ತು ಪ್ರೇಕ್ಷಕರ ಎದೆ ಝಲ್‌ ಎನ್ನುವಂತೆ ಮಾಡಿತು.  

 

ರಷ್ಯಾ ನಿರ್ಮಿತ ಸುಖೋಯ್‌, ಸ್ವೀಡನ್‌ನ  ಗ್ರಿಪೆನ್‌, ಹಾಗೂ ಫ್ರಾನ್ಸ್‌ನ ರಫೇಲ್‌ ವಿಮಾನಗಳು ಭಾರಿ ಸದ್ದು ಮೊಳಗಿಸುತ್ತಾ, ಶರವೇಗದಲ್ಲಿ ಸಾಗುತ್ತಾ ಪ್ರದರ್ಶಿಸಿದ ಕಸರತ್ತುಗಳು   ಚೇತೋಹಾರಿಯಾಗಿದ್ದವು. 

 

ಒಮ್ಮೆಲೇ ರಾಕೆಟ್‌ನಂತೆ ಎತ್ತರಕ್ಕೆ ಚಲಿಸಿ ಏಕಾಏಕಿ ಕೆಳಕ್ಕೆ ಹಾರಿ,  ತಕ್ಷಣ ಗಿರಕಿ ಹೊಡೆಯುತ್ತಾ ಕೆಳಕ್ಕೆ ಹಾರಿ, ಇನ್ನೊಮ್ಮೆ ತಲೆ ಕೆಳಗಾಗಿ ಚಲಿಸುವ ಮೂಲಕ ವೈವಿಧ್ಯಮಯ ಚಿತ್ರ ಬಿಡಿಸಿದ ಈ ವಿಮಾನಗಳು ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿದವು.

ರಂಗುರಂಗಿನ ಸಾರಂಗಗಳ ನರ್ತನ: ಭಾರತೀಯ ವಾಯುಪಡೆಯ ಸಾರಂಗ್‌ ತಂಡದ ಹೆಲಿಕಾಪ್ಟರ್‌ಗಳ ರಂಗಿನಾಟ ಚಿತ್ತಾಕರ್ಷಕವಾಗಿತ್ತು. ನಾಲ್ಕು ವರ್ಣರಂಜಿತ ಹೆಲಿಕಾಪ್ಟರ್‌ಗಳು ಒಮ್ಮೆ ಸಾಲಾಗಿ ಸಾಗಿ, ಮಗದೊಮ್ಮೆ ಜೋಡಿಯಾಗಿ ವಿರುದ್ಧ ದಿಕ್ಕಿನಲ್ಲಿ ಸಾಗಿ ಕೌತುಕ ಸೃಷ್ಟಿಸಿದವು. 

 

ತಿರಂಗದ ರಂಗವಲ್ಲಿ: ಆಗಸದಲ್ಲಿ ಕೇಸರಿ ಬಿಳಿ ಹಸಿರು ಬಣ್ಣದ ಹೊಗೆಯುಗುಳುತ್ತಾ ಸಾಗಿದ ಸ್ಕ್ಯಾಂಡಿನೇವಿಯನ್‌ ಏರೋಬ್ಯಾಟಿಕ್ಸ್‌ ತಂಡದ ವಿಮಾನಗಳು ಆಗಸದಲ್ಲಿ ತಿರಂಗದ ರಂಗವಲ್ಲಿಯನ್ನೂ ಬರೆದವು.  

 

ಉದ್ಘಾಟನೆ ವೇಳೆ ಕೈಕೊಟ್ಟ ವಿದ್ಯುತ್‌

ವೈಮಾನಿಕ ಪ್ರದರ್ಶನದ ಉದ್ಘಾಟನಾ ಸಮಾರಂಭ ನಡೆಯುತ್ತಿದ್ದಾಗ ವಿದ್ಯುತ್‌ ಪೂರೈಕೆ ಸ್ಥಗಿತಗೊಂಡಿತು. 51 ದೇಶಗಳ ಪ್ರತಿನಿಧಿಗಳು ಭಾಗವಹಿಸಿದ್ದ  ಈ ಕಾರ್ಯಕ್ರಮದಲ್ಲಿ  ಉಂಟಾದ ಈ ಲೋಪ ಪೂರ್ವಸಿದ್ಧತೆಯ  ಕೊರತೆಯನ್ನು ಜಾಹೀರು ಮಾಡಿತು.  ಕಾರ್ಯಕ್ರಮ ಆರಂಭವಾಗುತ್ತಲೇ ಮೈಕ್‌ ವ್ಯವಸ್ಥೆಯೂ ಕೈಕೊಟ್ಟಿತು. ರಕ್ಷಣಾ ಸಚಿವರ ಸಮ್ಮುಖದಲ್ಲೇ ಎದುರಾದ ಅನಿರೀಕ್ಷಿತ ಬೆಳವಣಿಗೆಯಿಂದಾಗಿ, ಕಾರ್ಯಕ್ರಮದ ಉಸ್ತುವಾರಿ ಹೊತ್ತ ಅಧಿಕಾರಿಗಳು ಗಲಿಬಿಲಿಗೊಳಗಾದರು.