ವಾರಕ್ಕೆ ಸಾಕಾಗುವಷ್ಟು ಮಾತ್ರ ನೀರು!

 

ನವನಗರದ 64 ಸೆಕ್ಟರ್‌ಗಳ 55 ಸಾವಿರ ಜನಸಂಖ್ಯೆ ಇದ್ದು, ಪ್ರತಿ ನಿತ್ಯ 1.35 ಲಕ್ಷ ಲೀಟರ್‌ ನೀರಿನ ಬೇಡಿಕೆ ಇದೆ. ಸದ್ಯ ಈಗ ವಾರಕ್ಕೆ ಎರಡು ಬಾರಿ ನೀರು ಕೊಡಲಾಗುತ್ತಿದ್ದರೂ ರಾಜೀವ್‌ಗಾಂಧಿ ನಗರ, ವಾಂಬೆ ಕಾಲೊನಿ ಸೇರಿದಂತೆ ಕೆಲವೊಂದು ಸೆಕ್ಟರ್‌ಗಳಲ್ಲಿ ಬೇಡಿಕೆ ಪ್ರಮಾಣದಷ್ಟು ನೀರು ಸಿಗುತ್ತಿಲ್ಲ. 

 

ಬ್ಯಾರೇಜ್‌ಗೆ ನೀರು ಮುಟ್ಟುತ್ತಿಲ್ಲ: ಬ್ಯಾರೇಜ್‌ನಲ್ಲಿ ಈಗ ಶೇಖರಣೆಯಾಗಿರುವ ನೀರು ಇನ್ನೊಂದು ವಾರದ ಬಳಕೆಗೆ ಮಾತ್ರ ಸಾಕಾಗುವುದರಿಂದ ಹಿಡಕಲ್ ಜಲಾಶಯದಿಂದ ಹೆಚ್ಚಿನ ಪ್ರಮಾಣದ ನೀರು ಹರಿಸುವಂತೆ ಬಾಗಲಕೋಟೆ ಪಟ್ಟಣ ಅಭಿವೃದ್ಧಿ ಪ್ರಾಧಿಕಾರ (ಬಿಟಿಡಿಎ) ಬೆಳಗಾವಿಯ ಪ್ರಾದೇಶಿಕ ಆಯುಕ್ತರ ಮೊರೆ ಹೋಗಿತ್ತು. ಅದರಂತೆ ನದಿಗೆ ನೀರು ಹರಿಸಿದ್ದರೂ ಈಗ ಹರಿವಿನ ಪ್ರಮಾಣ ನೋಡಿದರೆ ಅದು ಬ್ಯಾರೇಜ್ ತಲುಪುವುದು ಕಷ್ಟ ಎಂದು ಹೇಳಲಾಗುತ್ತಿದೆ.

 

ಸದ್ಯ ಹಿಡಕಲ್ ಜಲಾಶಯದಿಂದ ನದಿಗೆ 1500 ಕ್ಯುಸೆಕ್ಸ್ ನೀರು ಬಿಡುಗಡೆ ಮಾಡಿದೆ. ಮುಧೋಳ ನಗರ ಹಾಗೂ ಘಟಪ್ರಭಾ ದಂಡೆಯ ಹಳ್ಳಿಗಳ ಜನ–ಜಾನುವಾರುಗಳಿಗೆ ಕುಡಿಯುವ ನೀರಿನ ಬಳಕೆಯ ಜೊತೆಗೆ ರೈತರು ಆ ನೀರನ್ನು ಬ್ಯಾರೇಜ್‌ಗಳಲ್ಲಿ ಸಂಗ್ರಹಿಸಿ ನೀರಾವರಿ ಪಂಪ್‌ಸೆಟ್‌ಗಳಿಗೆ ಬಳಕೆ ಮಾಡಿಕೊಳ್ಳುತ್ತಿರುವುದರಿಂದ ಅದು ಆನದಿನ್ನಿ ಬ್ಯಾರೇಜ್ ತಲುಪುವುದು ಕಷ್ಟ ಎಂದು ಸ್ವತಃ ಬಿಟಿಡಿಎ ಅಧಿಕಾರಿಗಳೇ ಅನುಮಾನ ವ್ಯಕ್ತಪಡಿಸುತ್ತಾರೆ.

 

‘ಜಲಾಶಯದಿಂದ ಬಿಟ್ಟಿರುವ ನೀರು ಸೋಮವಾರ ಇಂಗಳಗಿ ತಲುಪಿದೆ ಎಂಬ ಮಾಹಿತಿ ಇದೆ. ಆನದಿನ್ನಿ ಬ್ಯಾರೇಜ್‌ ತಲುಪಬೇಕಾದರೆ ಇನ್ನೂ ಎಂಟು ಬ್ಯಾರೇಜ್‌ಗಳನ್ನು ದಾಟಿ 65 ಕಿ.ಮೀನಷ್ಟು ದೂರ ಹರಿದುಬರಬೇಕಿದೆ. ರೈತರ ಸಹಕಾರ ನೀಡಿ ಬ್ಯಾರೇಜ್‌ಗಳ ಗೇಟ್‌ ತೆಗೆದರೆ ಅನುಕೂಲ ಇಲ್ಲಿದಿದ್ದರೆ ಅದು ನಮ್ಮ ಬಳಕೆಗೆ ಸಿಗುತ್ತದೆ ಎಂಬ ನಿರೀಕ್ಷೆ ಕಷ್ಟ’ ಎಂದು ಬಿಟಿಡಿಎ ಕುಡಿಯುವ ನೀರು ಪೂರೈಕೆ ವಿಭಾಗದ ಎಂಜಿನಿಯರ್ ಎನ್.ಸಿ. ಹಲಗತ್ತಿ ಹೇಳುತ್ತಾರೆ. ಆನದಿನ್ನಿ ಬ್ಯಾರೇಜ್‌ನಿಂದ ನೀರು ಕೊಡುವ ಜೊತೆಗೆ ನವನಗರ ಭಾಗದಲ್ಲಿ ಇರುವ 52 ಕೊಳವೆಬಾವಿಗಳನ್ನೂ ಬಳಕೆ ಮಾಡಿಕೊಂಡು ನೀರಿನ ಬೇಡಿಕೆ ಈಡೇರಿಸಲು ಸಿದ್ಧತೆ ನಡೆಸಲಾಗಿದೆ ಎಂದರು.

 

ಹೆಚ್ಚಿನ ನೀರಿಗೆ ಮನವಿ: ‘ಬಾಗಲಕೋಟೆಯ ನವನಗರ, ಕಲಾದಗಿಯ ಕುಡಿಯುವ ನೀರು ಪೂರೈಕೆಗೆ ಹಿಡಕಲ್ ಜಲಾಶಯದಿಂದ ಘಟಪ್ರಭಾ ನದಿಗೆ ಈಗ ಹರಿಸುತ್ತಿರುವ ನೀರಿನ ಪ್ರಮಾಣ ಸಾಕಾಗುವುದಿಲ್ಲ. ಇನ್ನಷ್ಟು ಹೆಚ್ಚಿಸುವಂತೆ ಪ್ರಾದೇಶಿಕ ಆಯುಕ್ತರಿಗೆ ಪತ್ರ ಬರೆಯಲಾಗಿದೆ ಎಂದು ಬಿಟಿಡಿಎ ಅಧ್ಯಕ್ಷ ಎ.ಡಿ.ಮೊಕಾಶಿ ಹೇಳುತ್ತಾರೆ.

 

**

ನೀರಿನ  ಘಟಕಕ್ಕೂ  ಬಾಯಾರಿಕೆ!

 

**

 

**