ಕಾಂಗ್ರೆಸ್–ಬಿಜೆಪಿ ಘರ್ಷಣೆ: ಪೊಲೀಸರ ಲಾಠಿ ಪ್ರಹಾರ

 

ಕಾಂಗ್ರೆಸ್‌ ಬೆಂಬಲಿತ ಸದಸ್ಯರನ್ನು ವಿರೋಧ ಪಕ್ಷದವರು ಅಪಹರಿಸಿದ್ದು ಚುನಾವಣೆ ಮುಂದೂಡಬೇಕು ಎಂದು ಒತ್ತಾಯಿಸಿ ಕಾಂಗ್ರೆಸ್‌ ಕಾರ್ಯಕರ್ತರು ಎಪಿಎಂಸಿ ಆವರಣದಲ್ಲಿ ಪ್ರತಿಭಟನೆ ನಡೆಸಿದರು.

 

ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಬಿಜೆಪಿ ಕಾರ್ಯಕರ್ತರು ನಾವು ಯಾರನ್ನೂ ಅಪಹರಿಸಿಲ್ಲ. ಸಲ್ಲದ ಆರೋಪ ಹೊರಿಸಿ, ಕಾಂಗ್ರೆಸ್‌ ಕಾರ್ಯಕರ್ತರು ಚುನಾವಣೆ ಪ್ರಕ್ರಿಯೆಯಲ್ಲಿ ಗೊಂದಲ ಮೂಡಿಸುವ ಕೆಲಸ ಮಾಡುತ್ತಿದ್ದಾರೆ ಎಂದು ಬಿಜೆಪಿ ಕಾರ್ಯಕರ್ತರೂ ಪ್ರತಿಭಟನೆಗೆ ಇಳಿದರು. ಇದರಿಂದ ಚುನಾವಣೆ ನಡೆಯುವ ಸ್ಥಳದಲ್ಲಿ ಬಿಗುವಿನ ವಾತಾವರಣ ಸೃಷ್ಠಿಯಾಯಿತು.

 

ಗೊಂದಲದ ಕಾರಣ: ಸರ್ಕಾರದ ನಾಮ ನಿರ್ದೇಶಿತ 3 ಸದಸ್ಯರು ಸೇರಿ ಎಪಿಎಂಸಿಯಲ್ಲಿ ಒಟ್ಟು 16 ಸದಸ್ಯರಿದ್ದರು.  ಕಾಂಗ್ರೆಸ್‌ ಬೆಂಬಲಿತ 10 ಸದಸ್ಯರಿದ್ದು, ಕಳೆದ ಎರಡು ದಿನದಿಂದ ಪಕ್ಷದಲ್ಲಿ ನಡೆದ ಆಂತರಿಕ ಬದಲಾವಣೆಗಳಿಂದ ಸೋಮವಾರ ಕಾಂಗ್ರೆಸ್‌ ಬೆಂಬಲಿತ ಮಾರಿಕುಪ್ಪಂ ಕ್ಷೇತ್ರದ ಚಂಗಾರೆಡ್ಡಿ, ಬೇತಮಂಗಲ ಕ್ಷೇತ್ರದ ರಾಮಚಂದ್ರಪ್ಪ ಬಿಜೆಪಿ ಪಾಳಯದಲ್ಲಿ ಗುರುತಿಸಿಕೊಂಡರು. ಅಲ್ಲದೆ ಬಿಜೆಪಿ ಬೆಂಬಲಿತರಾಗಿ ಚಂಗಾರೆಡ್ಡಿ ಅಧ್ಯಕ್ಷ ಸ್ಥಾನ, ರಾಮಚಂದ್ರಪ್ಪ ಉಪಾಧ್ಯಕ್ಷ ಸ್ಥಾನಕ್ಕೆ ನಾಮಪತ್ರ ಸಲ್ಲಿಸಿದ್ದು, ಚುನಾವಣೆ ಸಮಯದಲ್ಲಿ ಬಿಜೆಪಿ ಬೆಂಬಲಿತ 8 ಸದಸ್ಯರು ಹಾಜರಿದ್ದರು. ಚುನಾವಣೆ ಮುಂದೂಡಬಾರದು ಎಂದು ಒತ್ತಾಯಿಸಿದರು.

 

ಇದೇ ಸಂದರ್ಭ ಘಟನೆ ಬಗ್ಗೆ ಪೊಲೀಸರಿಂದ ಮಾಹಿತಿ ಪಡೆದ ಚುನಾವಣಾಧಿಕಾರಿ ಎಲ್‌.ಸತ್ಯ ಪ್ರಕಾಶ್‌ ಚುನಾವಣೆ ದಿನಾಂಕವನ್ನು 23 ಕ್ಕೆ ಮುಂದೂಡ ಲಾಗಿದೆ ಎಂದು ಪ್ರಕಟಿಸಿ ಸಭಾಂಗಣದ ಹಿಂದಿನ ಬಾಗಿಲಿಂದ ಹೊರನಡೆದರು. ಚುನಾವಣೆ ಅಧಿಕಾರಿಗಳ ಈ ಕ್ರಮ ಖಂಡಿಸಿ ಬಿಜೆಪಿ ಕಾರ್ಯಕರ್ತರು ಪ್ರತಿಭಟನೆ ನಡೆಸಿದರು. ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಬಿಜೆಪಿ ಹಾಗೂ ಕಾಂಗ್ರೆಸ್‌ ಕಾರ್ಯಕರ್ತರ ಮಧ್ಯೆ ಮಾತಿನ ಚಕಮಕಿ ನಡೆಯಿತು. ಪೊಲೀಸರ ಸಮ್ಮುಖದಲ್ಲಿಯೇ ಮಾರಾಮಾರಿ, ಎಳೆದಾಟ ನಡೆದು ಬಿಗುವಿನ ವಾತಾವರಣ ಸೃಷ್ಟಿಯಾಯಿತು. ಪರಿಸ್ಥಿತಿ ನಿಯಂತ್ರಿಸಲು ಪೊಲೀಸರು ಲಘು ಲಾಠಿ ಪ್ರಹಾರ ನಡೆಸಿದರು. 

 

ಬಿಜೆಪಿ ಮಾಜಿ ಶಾಸಕರಾದ ಬಿ.ಪಿ,ವೆಂಕಟಮುನಿಯಪ್ಪ, ಎಂ.ನಾರಾಯಣಸ್ವಾಮಿ, ತಾಲ್ಲೂಕು ಪಂಚಾಯಿತಿ ಸದಸ್ಯ ಮಾರ್ಕಂಡೇಗೌಡ, ಕಾಂಗ್ರೆಸ್‌ ಘಟಕ ಅಧ್ಯಕ್ಷ ಕೆ.ಚಂದ್ರಾರೆಡ್ಡಿ ಘಟನೆಗೆ ಸಾಕ್ಷಿಯಾದರು.

 

**

ತಹಶೀಲ್ದಾರ್ ಅಮಾನತುಗೊಳಿಸಿ, ಜಿಲ್ಲಾಧಿಕಾರಿ ಚುನಾವಣೆ ನಡೆಸಿ