ಸಾಹಿತಿಗಳಲ್ಲಿ ಹೆಚ್ಚಿದ ಗುಂಪುಗಾರಿಕೆ; ವಿಷಾದ

ಭಾರತೀನಗರ (ಭಾರತೀ ವೇದಿಕೆ): ವಿಶಾಲ, ನಿರ್ಮತ್ಸರ, ನಿಸ್ವಾರ್ಥ ಮನೋಭಾವ ಇಂದಿನ ಸಾಹಿತಿಗಳಲ್ಲಿ ಕಾಣುತ್ತಿಲ್ಲ ಎಂದು ಸಮ್ಮೇಳನಾಧ್ಯಕ್ಷ ಡಾ.ಅರ್ಜುನಪುರಿ ಅಪ್ಪಾಜೀಗೌಡ ಅಭಿಪ್ರಾಯಪಟ್ಟರು.

ಇಲ್ಲಿನ ಭಾರತೀ ಕಾಲೇಜಿನ ಆವರಣದಲ್ಲಿ ಮಂಗಳವಾರ ನಡೆದ ಮದ್ದೂರು ತಾಲ್ಲೂಕು 6ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಸಾಹಿತ್ಯ ಓದಿದರೆ ಮನಸು ಅರಳು ತ್ತದೆ ಎಂಬ ಭಾವನೆ ಹುಸಿಯಾಗಿದೆ. ಇಂದು ಸಾಹಿತಿಗಳಲ್ಲಿ ಬಲ, ಎಡ, ಮಧ್ಯಮ ಪಂಥೀಯ ಗುಂಪುಗಾರಿಕೆ ಹೆಚ್ಚಿದ್ದು, ಸಾಹಿತ್ಯ ಅರಳುವ ಬದಲು ಕೊನರುತ್ತಿದೆ ಎಂದು ವಿಷಾದ ವ್ಯಕ್ತಪಡಿಸಿದರು.

ಸ್ವಾತಂತ್ರ್ಯದ ಬಳಿಕ ಸಿರಿವಂತರ ಬಡವರ ನಡುವಿನ ಅಂತರ ಹೆಚ್ಚಿದೆ. ದೇಶದ ಜನಸಂಖ್ಯೆಯಲ್ಲಿ ಶೇ 1ರಷ್ಟರ ಶ್ರೀಮಂತರ ಬಳಿ ಶೆ 58.4 ಸಂಪತ್ತು ಸೇರಿದೆ. ಶೇ 51.6ರಷ್ಟು ಸಂಪತ್ತು ಶೇ 99ರಷ್ಟು ಜನರ ಬಳಿ ಇದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಜಾತೀಯತೆ ವಿಷ ವೃಕ್ಷ ಮೇರೆ ಮೀರಿ ಬೆಳೆದಿದೆ. ಜನರಲ್ಲಿ ಹಣ ಮಾಡುವ ಹಪಾಹಪಿತನ ಹೆಚ್ಚಿದ್ದು, ಪ್ರತಿಯೊಬ್ಬ ಪೋಷಕರಲ್ಲೂ ಮಕ್ಕಳು ವೈದ್ಯರು, ಎಂಜಿನಿಯರ್ ಆಗಬೇಕು, ಐಟಿ– ಬಿಟಿ ಓದಿ ಲಕ್ಷ ಲಕ್ಷ ಸಂಪಾದಿಸಬೇಕೆಂಬ ಹಂಬಲಿಕೆ ಹೆಚ್ಚಿದೆ ಎಂದರು.

ಇಂದಿನ ಯುವ ಬರಹಗಾರರು ಪ್ರಸ್ತುತ ಸಮಕಾಲಿನ ಸಮಸ್ಯೆಗಳತ್ತ ಬೆಳಕು ಚೆಲ್ಲಬೇಕಿದೆ. ಅನ್ಯಭಾಷಿಗರ ಬೀಡಾದ ರಾಜ್ಯದ ರಾಜಧಾನಿಯನ್ನು ಕನ್ನಡದ ರಾಜಧಾನಿ ಮಾಡುವ ಅಗತ್ಯವಿದೆ. ಗಡಿ ನಾಡುಗಳಲ್ಲಿ ಕನ್ನಡ ಭಾಷೆಯ ಕಂಪು ಉಳಿಸಿಕೊಂಡು ಕನ್ನಡಿಗರು ಬುದ್ಧ, ಬಸವ, ಗಾಂಧಿ, ಅಂಬೇಡ್ಕರ್, ಕುವೆಂಪು ದಾರಿಯಲ್ಲಿ ಜ್ಯಾತ್ಯತೀತರಾಗಿ ಮುನ್ನಡೆಯಬೇಕಿದೆ ಎಂದು ಕರೆ ನೀಡಿದರು.

ದೇಶದಲ್ಲಿರು ಸ್ವಯಂ ಸೇವಾ ಸಂಸ್ಥೆಗಳು ಬಹುತೇಕ ರಾಜಕಾರಣಿಗಳು ಹಾಗೂ ನಿವೃತ್ತ ಐಎಎಸ್‌ ಅಧಿಕಾರಿಗಳ ಕೈಲಿವೆ. ವಿದೇಶಿ ಹಣ ಸೇರಿದಂತೆ ತಮ್ಮ ಬಳಿ ಇರುವ ಕಪ್ಪು ಹಣವನ್ನು ಬಿಳಿ ಮಾಡಿರುವುದರಲ್ಲೇ ಮುಳುಗಿವೆ. ಸ್ವಾತಂತ್ರ್ಯ ಬಂದು 7 ದಶಕ ಕಳೆದರೂ ಗುಡಿಸಲುರಹಿತ ರಾಜ್ಯ ಸೃಷ್ಟಿಯಾಗಿಲ್ಲ. ಜನರು ಬಿಪಿಎಲ್ ಪಡಿತರಚೀಟಿಗೆ  ಹತೋರೆಯುವುದರಲ್ಲೇ ತೃಪ್ತಿ ಹೊಂದು ತ್ತಿದ್ದಾರೆ ಎಂದು ಹೇಳಿದರು.

ಮದ್ದೂರು ತಾಲ್ಲೂಕು ಸಾಹಿತ್ಯ ಕ್ಷೇತ್ರ, ಸ್ವಾತಂತ್ರ್ಯ ಚಳವಳಿ ಸೇರಿದಂತೆ ರೈತ ಚಳವಳಿಗೂ ಹೆಸರಾಗಿರುವ ತಾಲ್ಲೂಕು ಸಾಹಿತ್ಯ ಸಂಸ್ಕೃತಿ ನೆಲೆಬೀಡಾ ಗಿದೆ. ಯುವ ಜನರು ಸಾಹಿತ್ಯ, ಸಂಸ್ಕೃತಿ ಗೌರವಿಸಿ ಆಧರಿಸುವ ಗುಣ ಬೆಳೆಸಿಕೊಳ್ಳ ಬೇಕು ಎಂದು ಸಲಹೆ ನೀಡಿದರು.