ದೂರ ಉಳಿದ ಬಿಜೆಪಿ ಸಂಸದ, ಶಾಸಕ

ಬೆಳಗಾವಿ: ಬಿಜೆಪಿಯ ಸಂಸದ ಸುರೇಶ ಅಂಗಡಿ ಹಾಗೂ ಶಾಸಕ ಸಂಜಯ ಅಂಗಡಿ ಇಲ್ಲಿನ ಮಹಾನಗರ ಪಾಲಿಕೆಯಲ್ಲಿ ಬುಧವಾರ ನಡೆದ ಮೇಯರ್‌ ಹಾಗೂ ಉಪಮೇಯರ್‌ ಚುನಾವಣೆಯಲ್ಲಿ ಭಾಗವಹಿಸಿದೆ ಕನ್ನಡಿಗರ ಕೆಂಗಣ್ಣಿಗೆ ಗುರಿಯಾದರು. ಜಿಲ್ಲಾಧಿಕಾರಿಯೂ ಆಗಿರುವ ಪ್ರಾದೇಶಿಕ ಆಯುಕ್ತ ಎನ್‌. ಜಯರಾಮ್‌ ಅವರ ಅಧ್ಯಕ್ಷತೆಯಲ್ಲಿ ಚುನಾವಣಾ ಪ್ರಕ್ರಿಯೆ ನಡೆಯಿತು.

ಬೆಳಿಗ್ಗೆ 10ರಿಂದ 11ರವರೆಗೆ ನಾಮಪತ್ರ ಸಲ್ಲಿಕೆಗೆ ಅವಕಾಶ ನೀಡಲಾಗಿತ್ತು. ಹೆಚ್ಚುವರಿ ಜಿಲ್ಲಾಧಿಕಾರಿ ಸುರೇಶ ಇಟ್ನಾಳ ಅವರಿಗೆ ಸದಸ್ಯರು ನಾಮಪತ್ರ ಸಲ್ಲಿಸಿದ್ದರು. ನಿಗದಿಯಂತೆ ಮಧ್ಯಾಹ್ನ 1ಕ್ಕೆ ಸಭಾಂಗಣ ಪ್ರವೇಶಿಸಿದ ಪ್ರಾದೇಶಿಕ ಆಯುಕ್ತರು, ಸಮಯ ಮೀರಿದರೂ ಕೋರಂಗೆ ಬೇಕಾಗುವಷ್ಟು ಸದಸ್ಯರು ಹಾಜರಿಲ್ಲದೆ ಇದ್ದುದ್ದರಿಂದ 10 ನಿಮಿಷಸಭೆ ಮುಂದೂಡಿದರು.

ಈ ನಡುವೆ, ‘ನಿಗದಿಗಿಂತ ಐದು ನಿಮಿಷ ತಡವಾಗಿರುವುದರಿಂದ ಸಭಾಂಗಣದ ಬಾಗಿಲು ಮುಚ್ಚಬೇಕು. ಬೇರೆ ಸದಸ್ಯರು ಒಳಬರಲು ಅವಕಾಶ ನೀಡಬಾರದು’ ಎಂದು ಕನ್ನಡಿಗ ಸದಸ್ಯ ರಮೇಶ ಸೊಂಟಕ್ಕಿ ಕೋರಿದರು. ಇದಕ್ಕೆ ಜಿಲ್ಲಾಧಿಕಾರಿ ಸೊಪ್ಪು ಹಾಕಲಿಲ್ಲ. 10 ನಿಮಿಷ ಸಭೆ ಮುಂದೂಡಿ ಕೊಠಡಿಗೆ ತೆರಳಿದರು. ಅವರು ಹೊರ ಹೋಗುತ್ತಿದ್ದಂತೆಯೇ, ಸದಸ್ಯರು ಒಳಪ್ರವೇಶಿಸಿದರು!

ಹೀಗಿತ್ತು ಪ್ರಕ್ರಿಯೆ: ಬಿಸಿಎ ಮಹಿಳೆಗೆ ಮೀಸಲಾಗಿದ್ದ ಮೇಯರ್‌ ಸ್ಥಾನಕ್ಕೆ ಎಂಇಎಸ್‌ ಬೆಂಬಲಿತರಾದ ಮೀನಾಕ್ಷಿ ಚಿಗರೆ (48ನೇ ವಾರ್ಡ್‌), ಸಂಜೋತಾ ಬಾಂದೇಕರ (36), ಮಧುಶ್ರೀ ಪೂಜಾರಿ (47), ಜಿಲ್ಲಾ ಉಸ್ತುವಾರಿ ಸಚಿವ ರಮೇಶ ಜಾರಕಿಹೊಳಿ ಬಣದಿಂದ ಜಯಶ್ರೀ ಮಾಳಗಿ (47) ಹಾಗೂ ಶಾಸಕ ಸತೀಶ ಜಾರಕಿಹೊಳಿ ಬಣದಿಂದ ಪುಷ್ಪಾ ಪರ್ವತರಾವ (53) ನಾಮಪತ್ರ ಸಲ್ಲಿಸಿದ್ದರು.

ಇವರಲ್ಲಿ ಎಂಇಎಸ್‌ ಬಣದ ಮೀನಾಕ್ಷಿ ಚಿಗರೆ ಹಾಗೂ ಮಧುಶ್ರೀ ಪೂಜಾರಿ ಉಮೇದುವಾರಿಕೆ ಹಿಂಪಡೆದರು. ಅಂತಿಮವಾಗಿ ಮೂವರು ಕಣದಲ್ಲಿದ್ದುದ್ದರಿಂದ ಚುನಾವಣೆ ನಡೆಯಿತು. ಸದಸ್ಯರು ಕೈ ಎತ್ತುವ ಮೂಲಕ ಮುಕ್ತ ಮತದಾನ ಮಾಡಿದರು.

ಚಲಾವಣೆಯಾದ 59 ಮತಗಳಲ್ಲಿ, ಸಂಜೋತಾ ಬಾಂದೇಕರ 32, ಜಯಶ್ರೀ ಮಾಳಗಿ 17 ಹಾಗೂ ಪುಷ್ಪಾ ಪರ್ವತರಾವ 10 ಮತ ಪಡೆದರು. ಮೇಯರ್‌ ಆಗಿ ಸಂಜೋತಾ ಆಯ್ಕೆಯಾಗಿದ್ದಾರೆ ಎಂದು ಚುನಾವಣಾಧಿಕಾರಿ ಘೋಷಿಸಿದರು.

ಉಪಮೇಯರ್‌ ಸ್ಥಾನಕ್ಕೆ ಎಂಇಎಸ್‌ ಬೆಂಬಲಿತ ಮೋಹನ ಬಾಂದೂರಗೆ (4ನೇ ವಾರ್ಡ್‌), ನಾಗೇಶ ಮಂಡೋಳ್ಕರ (49), ರಮೇಶ ಜಾರಕಿಹೊಳಿ ಬಣದ ಮುಜಾಮಿಲ್‌ ಡೋಣಿ (35) ಮತ್ತು ಸತೀಶ ಜಾರಕಿಹೊಳಿ ಬಣದ ಫಹೀಮ್‌ ನಾಯಕವಾಡಿ (55) ಕಣದಲ್ಲಿದ್ದರು. ಈ ಪೈಕಿ ಎಂಇಎಸ್‌ ಬೆಂಬಲಿತ ಮೋಹನ ಬಾಂದೂರಗೆ ನಾಮಪತ್ರ ವಾಪಸ್‌ ಪಡೆದರು. ನಂತರ ನಡೆದ ಚುನಾವಣೆಯಲ್ಲಿ ನಾಗೇಶ ಮಂಡೋಳ್ಕರ 32, ಮುಜಾಮಿಲ್‌ 17 ಹಾಗೂ ಫಹೀಮ್‌ 10 ಮತ ಗಳಿಸಿದರು.

ವಿಜೇತರನ್ನು ಪ್ರಾದೇಶಿಕ ಆಯುಕ್ತ ಎನ್‌. ಜಯರಾಮ್‌, ಪಾಲಿಕೆ ಆಯುಕ್ತ ಶಶಿಧರ ಕುರೇರ ಪುಷ್ಪಗುಚ್ಛ ನೀಡಿ ಅಭಿನಂದಿಸಿದರು. ಹೆಚ್ಚುವರಿ ಜಿಲ್ಲಾಧಿಕಾರಿ ಸುರೇಶ ಇಟ್ನಾಳ ಭಾಗವಹಿಸಿದ್ದರು.

ಪಾಲಿಕೆಯೊಳಗೆ ಅಭಿವೃದ್ಧಿಗಷ್ಟೇ ಆದ್ಯತೆ: ಮಹಾನಗರಪಾಲಿಕೆಯಲ್ಲಿ ಅಭಿವೃದ್ಧಿಗಷ್ಟೇ ಆದ್ಯತೆ ನೀಡಲಾಗುವುದು. ಗಡಿ ಹಾಗೂ ಭಾಷೆಯ ವಿಚಾರವನ್ನೇನಿದ್ದರೂ  ಹೊರಗಡೆ ಇಟ್ಟುಕೊಳ್ಳುತ್ತೇವೆ ಎಂದು ಎಂಇಎಸ್‌ ಬೆಂಬಲಿತ, ಪಕ್ಷೇತರ ಶಾಸಕ ಸಂಭಾಜಿ ಪಾಟೀಲ ಹೇಳಿದರು.
ಪತ್ರಕರ್ತರೊಂದಿಗೆ ಮಾತನಾಡಿದ ಅವರು, ‘ಎಂಇಎಸ್‌ನಲ್ಲಿ ಒಡಕಿರಲಿಲ್ಲ. ಎಲ್ಲರೂ ಒಟ್ಟಾಗಿ ಮೇಯರ್‌ ಆಯ್ಕೆ ಮಾಡಿದ್ದೇವೆ. ನಗರದ ಅಭಿವೃದ್ಧಿಗೆ ವಿಶೇಷ ಅನುದಾನ ನೀಡುವಂತೆ ಕೋರಲು ಮುಖ್ಯಮಂತ್ರಿ ಬಳಿಗೆ ಮೇಯರ್‌ ನೇತೃತ್ವದಲ್ಲಿ ನಿಯೋಗ ತೆರಳಲಾಗುವುದು. ನಗರದ ಹಿತಕ್ಕಾಗಿ ಎಲ್ಲರೂ ಒಂದಾಗುತ್ತೇವೆ’ ಎಂದರು.