ಕನಸಿನ ತೋಟಕ್ಕೆ ನೀರೆರೆದು...

ಬೆಳೆಯುವುದು ಹೇಗೆ?
ತಾರಸಿಯಲ್ಲಿ ಮನೆಗೆ ಬೇಕಾಗುವ ನಾನಾ ಬಗೆಯ ತರಕಾರಿಗಳು, ಸೊಪ್ಪು ಬೆಳೆಯಬಹುದು. ಅಷ್ಟೇ ಅಲ್ಲ ಕೆಲ ಔಷಧೀಯ ಸಸ್ಯಗಳನ್ನೂ ಬೆಳೆಯಬಹುದು. ಕೆಲವರು ಪಪ್ಪಾಯಿ, ಸಪೋಟ, ಪೇರಲ, ಸೇಬು ಹಣ್ಣುಗಳನ್ನು ಬೆಳೆಯುವ ಪರಿಪಾಠ ಬೆಳೆಸಿ ಕೊಂಡಿದ್ದಾರೆ.

ಗ್ರೋ ಬ್ಯಾಗ್ ಅಥವಾ ಕುಂಡಗಳಲ್ಲಿ ಸಾವಯವ ಗೊಬ್ಬರ ಭರಿತ ಮಣ್ಣನ್ನು ತುಂಬಿ, ಬೀಜ ನಾಟಿ ಮಾಡಬೇಕು.  ಪ್ರತಿನಿತ್ಯ ಅಗತ್ಯವಿರುವಷ್ಟು ಮಾತ್ರ ನೀರುಣಿಸಬೇಕು. ಬೀಜ ಮೊಳಕೆಯೊಡೆದು ಗಿಡವಾಗಿ ಬೆಳೆಯುವ ವಿವಿಧ ಹಂತದ ಬೆಳವಣಿಗೆಯ ಬಗ್ಗೆ ನಿಗಾ ವಹಿಸಿ, ರೋಗಬಾಧೆ ಕಾಡಿದಾಗ ಔಷಧೋಪಚಾರ ಮಾಡುವುದು ಒಳಿತು.

ಲಾಲ್‌ಬಾಗ್‌ನ ತೋಟಗಾರಿಕಾ ಇಲಾಖೆಯಲ್ಲಿ ಕುಂಡಗಳು, ವಿವಿಧ ನಮೂನೆಯ ತರಕಾರಿ ಬೀಜಗಳು, ಕೆಂಪು ಮಣ್ಣು ಮತ್ತು ಗೊಬ್ಬರಭರತಿ ಮಣ್ಣು ಕೈಗೆಟುಕುವ ದರದಲ್ಲಿ ದೊರೆಯುತ್ತದೆ. ಅಷ್ಟೇ ಅಲ್ಲ ಆಗಾಗ ಅಲ್ಲಿ ಕೈತೋಟ ಕುರಿತ ಕಾರ್ಯಾಗಾರ ಮತ್ತು ಪ್ರಾತ್ಯಕ್ಷಿಕೆಗಳೂ ಕ ನಡೆಯುತ್ತವೆ. ಆಸಕ್ತರು ಹೆಚ್ಚಿನ ಮಾಹಿತಿಗೆ ತೋಟಗಾರಿಕೆ ಇಲಾಖೆಯನ್ನು ಸಂಪರ್ಕಿಸಬಹುದು.

ತೋಟವ ಮಾಡಿ, ಮನವ ಅರಳಿಸಿ
ನಗರದಲ್ಲಿ ಇತ್ತೀಚೆಗೆ ಟೆರೇಸ್ ಗಾರ್ಡನ್ ದೊಡ್ಡದೊಂದು ಟ್ರೆಂಡ್ ಆಗಿ ಬೆಳೆದಿದೆ. ಧ್ಯಾನ, ಯೋಗಕ್ಕಿಂತ ನಗರ ಕೃಷಿಯ ಧ್ಯಾನದಿಂದ ಆಗುವ ಪ್ರಯೋಜನಗಳು ಹಲವು ಎನ್ನುತ್ತಾರೆ ಡ್ರೀಂ ಗಾರ್ಡನ್‌ನ ರೂವಾರಿ ಅಶೋಕ್ ಕುಮಾರ್ ಕೆ.ಸಿ.

‘ನಮ್ಮ  ಸಂಸ್ಥೆಯಿಂದ ಕೈತೋಟ ಕೃಷಿ ಬಗ್ಗೆ ನಿರಂತರವಾಗಿ ಕಾರ್ಯಾಗಾರ, ಪ್ರಾತ್ಯಕ್ಷಿಕೆ ಮಾಡುತ್ತೇವೆ. ಇದುವರೆಗೆ 209 ಕಾರ್ಯಾಗಾರಗಳನ್ನು ಮಾಡಿದ್ದೇವೆ. ನಗರದಲ್ಲೇ ಸುಮಾರು 3 ಸಾವಿರ ಮನೆಗಳಲ್ಲಿ ತಾರಸಿ ತೋಟಗಳಿವೆ. ಅವುಗಳಿಗೆಲ್ಲಾ ಮನೆಯಲ್ಲೇ ತಯಾರಾಗುವ ತ್ಯಾಜ್ಯಗೊಬ್ಬರ ಬಳಸಲಾಗುತ್ತಿದೆ. ಇದರಿಂದ  ವರ್ಷಕ್ಕೆ ಸುಮಾರು 60 ಲಕ್ಷ ಟನ್‌ನಷ್ಟು ತ್ಯಾಜ್ಯ ಗೊಬ್ಬರವಾಗಿ ಸದುಪಯೋಗವಾಗುತ್ತಿದೆ. ಮಹಾನಗರ ಕಸ ವಿಲೇವಾರಿ ಸಮಸ್ಯೆಗೆ ಸುಲಭವಾಗಿ ಪರಿಹಾರ ದೊರೆಯುತ್ತದೆ’ ಎನ್ನುತ್ತಾರೆ ಅವರು.

ಮಾಹಿತಿಗೆ facebook.com/itsmydreamgarden, ಅಥವಾ ಮೊಬೈಲ್‌– 7676021777 ನೋಡಿ.