ಹೋಳಿ: ಇರಲಿ ಕಣ್ಣಿನ ಬಗೆಗೂ ಕಾಳಜಿ

ಜೊತೆಗೆ ಕಾರ್ನಿಯಾದ ಮೇಲೆ ಗಾಯಗಳು ಉಂಟಾಗಬಹುದು; ಅದರಲ್ಲಿರುವ ರಾಸಾಯನಿಕ ವಸ್ತುವಿನಿಂದ ಸುಟ್ಟಗಾಯಗಳಾಗಬಹುದು. ಇದರಿಂದ ಕಣ್ಣಿನ ಸೋಂಕಾಗಿ ತಾತ್ಕಾಲಿಕ ಕುರುಡುತನ, ಕಣ್ಣಿನ ಕೆರಳುವಿಕೆ, ಕಣ್ಣು ಕೆಂಪಾಗುವುದು, ಕಣ್ಣಿನ ಅಲರ್ಜಿ ಉಂಟಾಗುವ ಜೊತೆಗೆ ಮೊಂಡುಗಾಯಗಳಾಗಬಹುದು. ಇದು ಮುಂದೆ ದೃಷ್ಟಿನಾಶಕ್ಕೂ ಕಾರಣವಾಗಬಹುದು.

ಆದುದರಿಂದ, ಕೃತಕ ರಾಸಾಯನಿಕ ವಸ್ತುವಿನಿಂದ ಮಾಡಿದ ಬಣ್ಣಗಳ ಹೊರತಾಗಿ, ನೈಸರ್ಗಿಕವಾಗಿ ದೊರೆಯುವಂತಹ ಹೂ–ಹಣ್ಣುಗಳಿಂದ ತಯಾರಿಸಿದ ಬಣ್ಣವನ್ನು ಉಪಯೋಗಿಸಿ. ಉದಾಹರಣೆಗೆ: ಗುಲಾಬಿಹೂವಿನಿಂದ, ದಾಸವಾಳ, ಪಾಲಾಕ್ ಸೊಪ್ಪು, ಬೀಟರೂಟ್, ಗುಲ್‌ಮೊಹರ್, ಮದರಂಗಿ ಇತ್ಯಾದಿ ಇಂತಹ ನೈಸರ್ಗಿಕ ಬಣ್ಣಗಳು. ಇವು ನೀರಿನಿಂದ ತೊಳೆಯುವುದಕ್ಕೆ ಸುಲಭ ಮತ್ತು ಕಣ್ಣಿಗೆ ಅಪಾಯಗಳನ್ನುಂಟುಮಾಡುವುದಿಲ್ಲ.

ನೀರಿನ ಚೆಂಡಾಟದಿಂದ (Water ba**oon) ಕಣ್ಣಿನ ಮೇಲೆ ಮೊಂಡಗಾಯಗಳಾಗಬಹುದು. ಮಿಣಿ ಮಿಣಿ ಹೊಳೆಯುವ ಕಾಗೆ ಬಂಗಾರದ ಕಣಗಳುಳ್ಳ (ಮೈಕಾ) ಬಣ್ಣದಿಂದ ಕಣ್ಣಿನ ಪಾರದರ್ಶಕ ಪಟಲಕ್ಕೆ ಸವೆತ ಉಂಟಾಗುತ್ತದೆ (Abrasion).

ಹೋಳಿ ಆಡುವ ಸಂದರ್ಭದಲ್ಲಿ ಸಂಪರ್ಕ ಮಸೂರ (ಕಾಂಟಾಕ್ಟ್ ಲೆನ್ಸ್) ಉಪಯೋಗಿಸುವವರು, ತಾತ್ಕಾಲಿಕವಾಗಿ ಅವುಗಳನ್ನು ಉಪಯೋಗಿಸದೆ ಇರುವುದು ಒಳ್ಳೆಯದು. ಅವುಗಳನ್ನು ಉಪಯೋಗಿಸಿದಾಗ ಕಣ್ಣು ಹಾಗೂ ಕಾಂಟ್ಯಾಕ್ಟ್ ಲೆನ್ಸ್ ಮಧ್ಯೆ ಬಣ್ಣಗಳು ಸೇರಿಕೊಂಡು, ಹೊರ ಬರಲು ಸಾಧ್ಯವಾಗದೆ ಕಣ್ಣಿಗೆ  ಹಾಗೂ ದೃಷ್ಟಿಗೆ ಹೆಚ್ಚಿನ ಹಾನಿಯುಂಟಾಗಬಹುದು.

ಹೋಳಿಯಲ್ಲಿ ಕಣ್ಣಿನ ಕಾಳಜಿ ಮಾಡಿ
*ಯಾವಾಗಲು ಕಣ್ಣಿಗೆ ರಕ್ಷಣೆಗೆ, ರಕ್ಷಣಾತ್ಮಕ ನೇತ್ರತೊಡುಗೆಗಳನ್ನು ಅಥವಾ ಸನ್ ಗ್ಲಾಸಸ್ ಹಾಕಿಕೊಂಡು ಹೋಳಿ ಆಚರಿಸುವುದು.
*ನಿಮ್ಮ ತಲೆಕೂದಲುಗಳನ್ನು ಒಟ್ಟಿಗೆ ಜೋಡಿಸಿ ಕಟ್ಟಿಕೊಂಡು ಅಥವಾ ತಲೆಗೆ ಟೊಪ್ಪಿಹಾಕಿಕೊಂಡು ಹೋಳಿಬಣ್ಣದ ಆಟವಾಡಬಹುದು. ಇಲ್ಲದೆ ಇದ್ದಲ್ಲಿ ತಲೆ ಮೇಲೆ ಬೀಳುವಂತಹ ಬಣ್ಣದ ನೀರು, ಕಣ್ಣಿಗೂ ಹೋಗಬಹುದು.
*ಕಣ್ಣಿನ ಸುತ್ತಲು ದಪ್ಪನೆಯ ಪದರವಾಗಿ ಕೊಬ್ಬರಿಯೆಣ್ಣೆ ಅಥವಾ ಯಾವುದರೂ ಕ್ರೀಮ್ ಹೆಚ್ಚಬೇಕು. ಇದರಿಂದ ಆಟವಾಡಿದ ನಂತರ, ಕಣ್ಣಿನ ಸುತ್ತಲೂ ಅಂಟಿಕೊಂಡಿರುವ ಬಣ್ಣವನ್ನು ತೆಗೆಯಲು ಸುಲಭವಾಗುತ್ತದೆ.
*ಬಣ್ಣದ ಆಟ ಆಡುವಾಗ, ನಿಮ್ಮ ಸಹವರ್ತಿಗಳಿಗೆ ಮುಖಕ್ಕೆ ಬಣ್ಣ ಹಚ್ಚಬಾರದು ಎಂದು ತಿಳಿಸುವುದು ಒಳಿತು. ಇಲ್ಲದಿದಲ್ಲಿ ಕಣ್ಣಿನ ಹತ್ತಿರವಂತೂ ಹಚ್ಚಬಾರದು.
*ಆಟದ ನಂತರ, ಮುಖಕ್ಕಾಗಿರುವ ಬಣ್ಣವನ್ನು ತೆಗೆಯುವಾಗ ಸ್ನಾನ ಮಾಡುವ ಸಂದರ್ಭದಲ್ಲಿ ಗಟ್ಟಿಯಾಗಿ ಕಣ್ಣು ಮುಚ್ಚಿ, ತಲೆ ಹಾಗೂ ಮುಖವನ್ನು ತೊಳೆಯಬೇಕು.
*ಆಡುವ ಸಂದರ್ಭದಲ್ಲಿ ಒದ್ದೆಯಾದ ನೆಲದ ಮೇಲೆ ಆಡಬಾರದು.
*ಮಕ್ಕಳು ಹೋಳಿಹಬ್ಬದಾಟವಾಡುವ ಸಂದರ್ಭದಲ್ಲಿ ನೀರಿನ ಬಲೂನ್‌ನಲ್ಲಿ ಆಡುವುದನ್ನು ತಪ್ಪಿಸಬೇಕು. ನೀರಿನ ಬಲೂನ್‌ನಿಂದ ಕಣ್ಣಿಗೆ ಅಪಘಾತವಾದರೆ ಕಣ್ಣಿನ ಮೊಂಡೇಟಿನಿಂದಾಗಿ ಅಕ್ಷಿಪಟಲ ಕಳೆದುಕೊಂಡು ಕುರುಡಾಗಬಹುದು.
*ಮಕ್ಕಳಿಗೆ ಪಿಚಕಾರಿಯಲ್ಲಿ ಸುರಕ್ಷಿತವಾಗಿ ಆಡುವ ವಿಧಾನವನ್ನು ಕಲಿಸಬೇಕು. ಪಿಚಕಾರಿಯಿಂದ, ಮುಖಕ್ಕೆ ಅಥವಾ ಕಣ್ಣಿಗೆ ಬಣ್ಣದ ನೀರನ್ನು ಸಿಂಪಡಿಸಬಾರದು. ಹಲವು ಕಡೆಗಳಲ್ಲಿ ದೊಡ್ಡ ಡ್ರಮ್‌ನಲ್ಲಿ ಬಣ್ಣದ ನೀರನ್ನು ತುಂಬಿಟ್ಟು, ಅದನ್ನು ಇತರರ ಮೈಗೆ ಎರಚುವ ಅಭ್ಯಾಸವಿರುತ್ತದೆ. ಇದು ತುಂಬಾ ಅಪಾಯಕಾರಿಯಾಗಿದ್ದು ಇದನ್ನು ಪ್ರೋತ್ಸಾಹಿಸಬಾರದು.
*ಬಣ್ಣವೇನಾದರೂ ಕಣ್ಣಿನೊಳಗೆ ಹೋದಲ್ಲಿ ಕಣ್ಣನ್ನು ಸಾಕಷ್ಟು ಶುದ್ಧವಾದ ನೀರಿನಲ್ಲಿ ತೊಳೆಯಬೇಕು. ಕಣ್ಣನ್ನು ಉಜ್ಜಬಾರದು.ಕಣ್ಣನ್ನು ಗಟ್ಟಿಯಾಗಿ ಕೈಯಲ್ಲಿ ಒತ್ತಿ ಇಟ್ಟುಕೊಳ್ಳಬಾರದು. ಬಟ್ಟೆಯನ್ನು ಕಟ್ಟುವುದು ಅಥವಾ ಬ್ಯಾಂಡೇಜ್ ಹಾಕಬಾರದು. ಇದರ ಬದಲು ಐಸ್‌ಕ್ರೀಂ ಕಪ್ಪನ್ನು ಕಣ್ಣಿನ ಮೇಲಿಟ್ಟು ಸೆಲ್ಲೋಟೇಪ್ ಹಾಕಿ ಅಂಟಿಸಬಹುದು.
ದೃಷ್ಟಿಯಲ್ಲಿ ಏರುಪೇರಾಗಿದ್ದರೆ, ಕಣ್ಣಿನಲ್ಲಿ ತೀವ್ರತರ ನೋವು ಇದ್ದರೆ ಅಥವಾ ಕಣ್ಣು ತುಂಬಾ ಕೆಂಪಾಗಿದ್ದರೆ ಕೂಡಲೇ ನೇತ್ರತಜ್ಞರ ಹತ್ತಿರ ಚಿಕಿತ್ಸೆ ಮಾಡಿಸಬೇಕು. ಯಾವುದೇ ರೀತಿಯ ಕಣ್ಣಿನ ಅಪಘಾತಗಳನ್ನು ಕಡೆಗಣಿಸಬಾರದು.
-ಡಾ. ಕುಮಾರಸ್ವಾಮಿ (ಲೇಖಕರು ನೇತ್ರತಜ್ಞ)