ಅಚಾನಕ್ಕಾಗಿ ಎದುರಾಗುವ ಅವಳು
ಇವಳು ಸುಲಭವಾಗಿ ದಕ್ಕುವುದಿಲ್ಲ
ಸಿಕ್ಕರೆ ಎದೆಯ ಕವಾಟಗಳಲ್ಲಿ ಮಿಂಚುಹುಳಗಳ ಸುರಿಯುತ್ತಾಳೆ
ವಿಷಾದಗಳ ಗುತ್ತಿಗೆ ಪಡಕೊಂಡ ನನ್ನಂತವನ ಹುಟ್ಟಿಗೆ
ಇವಳು ಬೊಗಸೆ ಹಿಡಿವಾಗಲೆಲ್ಲ
ಬೆರಳಸಂಧಿಗಳಲ್ಲೇ ಬದುಕ ಜಾಲಾಡುತ್ತಾಳೆ
ಅವಳು ಕೇರುವ ತತ್ವದ ಮೊರದಲ್ಲಿ
ಹಾರಿಬೀಳುವ ಹುಸಿಗಳು
ಅಂತರಂಗಕ್ಕೆ ಹಾಕಿದ ಪ್ರಶ್ನೆಯ ಗಾಳದಲ್ಲಿ
ಕಕ್ಕಾಬಿಕ್ಕಿ ಸಿಕ್ಕಿಬೀಳುತ್ತವೆ ಮತಿಗೆಟ್ಟ ನಿಲುವುಗಳು
ಶಂಕೆಗಳಿಗೆ ಇವಳು ಕಟ್ಟುವ ಗೋರಿ
ಬೇರುಗಳ ಬಿಗಿತಕ್ಕೆ ಬಿರುಕು ಬಿಡುವುದಿಲ್ಲ
ಇವಳು ಉತ್ತರಗಳಿಂದ ಹಾಕುವ ಕಗ್ಗಂಟಿನಾಚೆ
ತೆಪರು ಪ್ರಶ್ನೆಗಳು ಮೂಗು ತೂರಿಸುವುದಿಲ್ಲ
ಇವಳು ಸುಲಭವಾಗಿ ಒಪ್ಪುವುದಿಲ್ಲ
ಕಣ್ಣುಗಳಲ್ಲೇ ಬೀರಿದ ಸಾಕ್ಷಾತ್ಕಾರದ ಪ್ರಭೆ ಮೊನಚು
ಕಟ್ಟಿದ ಹಿಮಖೇದಗಳನ್ನು ಕರಗಿಸುತ್ತಿದೆ
ಸಪಾಟಾಗಿ ಕತ್ತರಿಸುವ ಕೊಂಕು ಮುಳ್ಳ ಬೇಲಿಯ
ಮಟ್ಟಸವಾಗಿ ಸವರಿ ಹೊರಡುವ ಕಟು ಕೊಡಲಿಯಂತೆ
ಧುತ್ತನೆ ಮಾತಿಗೆ ನಿಲ್ಲುವಾಗೆಲ್ಲ ಸಿದ್ಧವಾಗಿರಬೇಕು
ಬೆತ್ತಲೆಯಾಗುವುದಕ್ಕೆ ಮತ್ತು ಕತ್ತಲ ಕಳೆದುಕೊಳ್ಳುವುದಕೆ
ಸಲೀಸಾಗಿ ಕಳಚಿಸಲು ಶುರುವಿಡುವ ಮಾಯೆ ಒಂದೊಂದೇ?
ಮೋಹದ ಪರಿಮಳ ಸವರಿಕೊಂಡ ದ್ರವದೊಳಗೆ ಹರಿವ
ಕಹಿಚಲನೆ ನುಡಿವ ಲಲನೆ
ಸುಮ್ಮನೆ ನಿಂತುಬಿಡಬೇಕಷ್ಟೆ ಪ್ರಶ್ನೆಯ ಸುರಿಮಳೆಗೆ
ಅಥವ ನಿಜದ ಮೊನಚು ಬಾಣಗಳಿಗೆ ಮೈಯೊಡ್ಡಿ
ಅಡ್ದಾದಿಡ್ಡಿ ಹರಿವ ಗರಗಸದ ಊಳು ಉರಿ ಉಳಿಪೆಟ್ಟು
ನಿಷ್ಕರುಣಿ ಇವಳು
ನೆಲವು ಪಕ್ಕಾಗುತಿದೆ ನೋಡಿ
ಗಂಧ ಫಲ ಪುಷ್ಪಗಳಿಗೆ
ಒಳಗನ್ನು ತೊಳೆದು ಹೋಗುವ ಇಂತಹವಳನ್ನು ನೀವೂ ಕಾಣಬೇಕು
ಇವಳೆಂಬ ನೇಗಿಲನ್ನು ಒಮ್ಮೆ ಒಳಗಿಳಿಸಿಕೊಳ್ಳಬೇಕು
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.