ಪತ್ರಿಕೆಗಳನ್ನು ಓದುವಾಗ ಮತ್ತು ವಿಶೇಷವಾಗಿ ಟಿ.ವಿ ನೋಡುವಾಗ ಈ ಪದದ ಪ್ರಯೋಗವನ್ನು ಗಮನಿಸಿ ನನ್ನ ಮಕ್ಕಳು ಒಂದು ರೀತಿಯ ಅವಮಾನ ಮತ್ತು ಅಸಹಾಯಕತೆಯಿಂದ ನನ್ನ ಕಡೆ ನೋಡುತ್ತವೆ. ಆಗ ನನಗಾಗುವ ಯಾತನೆಯನ್ನು ಹೇಗೆ ವ್ಯಕ್ತಪಡಿಸಲಿ?
ದೊಂಬರು ಎನ್ನುವ ಒಂದು ಸಮುದಾಯ ತನ್ನ ಸ್ವಾಭಿಮಾನದ ಬದುಕಿಗಾಗಿ ಕಷ್ಟಕರವೂ ಅಪಾಯಕಾರಿಯೂ ಆದ ಕಲೆಯನ್ನು ಪರಿಶ್ರಮದಿಂದ ಸಾಧಿಸಿ, ಅದರ ಮುಖಾಂತರ ಮನರಂಜನೆ ನೀಡಿ ನಾಲ್ಕು ಪುಡಿಗಾಸನ್ನು ಸಂಪಾದಿಸಿ, ಕಡು ಕಷ್ಟದ ಜೀವನ ನಡೆಸುವುದು ನಾಗರಿಕ ಸಮಾಜಕ್ಕೆ ತಮಾಷೆ, ವ್ಯಂಗ್ಯದ ವಿಚಾರವೇ?
ನಮ್ಮ ನಿವೇದನೆ ಇಷ್ಟೆ: ಕತ್ತೆ ಎಂದು ಬೈದರೆ ಒಂದು ಅಮಾಯಕ ಪ್ರಾಣಿಗೆ ಮಾಡುವ ಅವಮಾನ ಎಂದು ಪ್ರಾಣಿ ಸ್ವಾಭಿಮಾನವನ್ನು ರಕ್ಷಿಸಲು ಹೋರಾಡುವ ಈ ನಾಗರಿಕ ಸಮಾಜದಲ್ಲಿ, ಒಂದು ಸಮುದಾಯದ ಹೊಟ್ಟೆಪಾಡಿನ ಬದುಕನ್ನು ಅವಮಾನಿಸುವ ಭಾಷೆಯನ್ನು ಬಳಸುವುದು ಬೇಡ.