248 ಸೆಕ್ಯುರಿಟಿ ಏಜೆನ್ಸಿಗಳು ಅನಧಿಕೃತ!

ಬೆಂಗಳೂರು: ರಾಜ್ಯದ ಖಾಸಗಿ ಹಾಗೂ ಸರ್ಕಾರೇತರ ವಲಯದಲ್ಲಿ ಭದ್ರತೆ ಜವಾಬ್ದಾರಿ ವಹಿಸಿಕೊಂಡಿರುವ  ಸೆಕ್ಯುರಿಟಿ ಏಜೆನ್ಸಿಗಳ ಪೈಕಿ 248 ಏಜೆನ್ಸಿಗಳು ಅನಧಿಕೃತವಾಗಿವೆ.

ಎಟಿಎಂ ಘಟಕಗಳಿಗೆ ಹಣ ತುಂಬುವ, ಅಪರಾಧ ಹಿನ್ನೆಲೆಯುಳ್ಳ ಹಾಗೂ ಅನುಮಾನಾಸ್ಪದ ಭದ್ರತಾ ಸಿಬ್ಬಂದಿ ಬಗ್ಗೆ ಆಂತರಿಕ ಭದ್ರತಾ ವಿಭಾಗದ (ಐಎಸ್‌ಡಿ) ಅಧಿಕಾರಿಗಳು ಮಾಹಿತಿ ಸಂಗ್ರಹಿಸುತ್ತಿದ್ದಾರೆ. ಇದುವರೆಗಿನ ಮಾಹಿತಿ ಪ್ರಕಾರ ರಾಜ್ಯದಲ್ಲಿ ಅನಧಿಕೃತ ಏಜೆನ್ಸಿಗಳಿರುವುದು ಗೊತ್ತಾಗಿದೆ.

‘ಖಾಸಗಿ ಉದ್ಯಮ, ಕಚೇರಿ, ಅಪಾರ್ಟ್‌ಮೆಂಟ್‌ ಸಮುಚ್ಚಯ, ಶಾಲೆ–ಕಾಲೇಜು, ಮಾಲ್‌, ಸರ್ಕಾರೇತರ ಸಂಸ್ಥೆಗಳು, ಬ್ಯಾಂಕ್‌ಗಳಲ್ಲಿ ಲಕ್ಷಾಂತರ ಭದ್ರತಾ ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ಅವರ ಪೂರ್ವಾಪರ ತಿಳಿದುಕೊಳ್ಳುತ್ತಿದ್ದೇವೆ. ಕೆಲ ಸಿಬ್ಬಂದಿಯನ್ನು ನೇಮಕ ಮಾಡಿಕೊಂಡ ಏಜೆನ್ಸಿಗಳೇ ಅನಧಿಕೃತವಾಗಿವೆ’ ಎಂದು ಐಎಸ್‌ಡಿಯ ಹಿರಿಯ ಅಧಿಕಾರಿಯೊಬ್ಬರು ‘ಪ್ರಜಾವಾಣಿ’ಗೆ ತಿಳಿಸಿದರು.

‘ದಾಖಲೆ ಪ್ರಕಾರ ರಾಜ್ಯದಲ್ಲಿ 1,463 ಏಜೆನ್ಸಿಗಳು ನೋಂದಣಿಯಾಗಿವೆ. ಅವುಗಳ ಪೈಕಿ 200 ಏಜೆನ್ಸಿಗಳ ಪರವಾನಗಿ ಅವಧಿ 2016ರಲ್ಲಿ ಮುಕ್ತಾಯವಾಗಿದ್ದು, ಅವುಗಳು ಇದುವರೆಗೂ ನವೀಕರಣ ಮಾಡಿಸಿಕೊಂಡಿಲ್ಲ. ಜತೆಗೆ 48 ಏಜೆನ್ಸಿಗಳು ನೋಂದಣಿಯನ್ನೇ ಮಾಡಿಸಿಲ್ಲ. ಅವೆಲ್ಲವನ್ನೂ ಅನಧಿಕೃತ ಎಂದು ಪರಿಗಣಿಸಿ ಅವುಗಳ ವಿರುದ್ಧ ಕ್ರಮ ಕೈಗೊಳ್ಳಲು ಚಿಂತನೆ ನಡೆಸಿದ್ದೇವೆ’ ಎಂದು ವಿವರಿಸಿದರು.

ಅಪರಾಧ ಘಟಿಸಿದರೆ ಪತ್ತೆ ಕಷ್ಟ: ‘ಅನಧಿಕೃತ ಸೆಕ್ಯುರಿಟಿ ಏಜೆನ್ಸಿಗಳ ಮೂಲಕ 30 ಸಾವಿರಕ್ಕೂ ಹೆಚ್ಚು ಭದ್ರತಾ ಸಿಬ್ಬಂದಿ ಕೆಲಸ ಮಾಡುತ್ತಿದ್ದಾರೆ. ಅವರ ಪೂರ್ವಾಪರ ಮಾಹಿತಿ ಯಾರಿಗೂ ಗೊತ್ತಿಲ್ಲ. ಏಜೆನ್ಸಿಗಳು ಆ ಬಗ್ಗೆ ತಲೆಕೆಡಿಸಿಕೊಂಡಿಲ್ಲ’ ಎಂದು ಅಧಿಕಾರಿ ತಿಳಿಸಿದರು.

‘ಇಂಥ ಏಜೆನ್ಸಿಗಳ ಸಿಬ್ಬಂದಿಯು ಅಪರಾಧ ಕೃತ್ಯಗಳಲ್ಲಿ ತೊಡಗಿಸಿಕೊಂಡರೆ ಅವರನ್ನು ಪತ್ತೆ ಹಚ್ಚುವುದು ಕಷ್ಟ. ಅವರ ವಿಳಾಸಗಳೂ ನಕಲಿಯಾಗಿರುತ್ತವೆ. ಅಂಥ ಹಲವು ಪ್ರಕರಣಗಳು ಇಂದಿಗೂ ತನಿಖೆ ಹಂತದಲ್ಲಿವೆ’ ಎಂದು ಹೇಳಿದರು.

ಐಎಸ್‌ಡಿ ಅಧಿಕಾರಿಗಳ ಹಿಂದೇಟು: ‘ಈಗಾಗಲೇ ನೋಂದಣಿಯಾಗಿರುವ 200 ಏಜೆನ್ಸಿಗಳು ಅಧಿಕೃತವಾಗಿವೆ. ಏಜೆನ್ಸಿಯ ಮಾಲೀಕರು ಎಲ್ಲ ದಾಖಲೆಗಳನ್ನು ಕೊಟ್ಟರೂ ನವೀಕರಣ ಮಾಡಿಕೊಡಲು ಅಧಿಕಾರಿಗಳು ಹಿಂದೇಟು ಹಾಕುತ್ತಿದ್ದಾರೆ’ ಎಂದು ಕರ್ನಾಟಕ ಸೆಕ್ಯುರಿಟಿ ಏಜೆನ್ಸಿ ಮಾಲೀಕರ ಒಕ್ಕೂಟದ ಅಧ್ಯಕ್ಷ ಬಿ.ಎಂ. ಶಶಿಧರ್ ದೂರಿದರು.

‘ಭದ್ರತಾ ಸಿಬ್ಬಂದಿಯ ವೈದ್ಯಕೀಯ ಪ್ರಮಾಣ ಪತ್ರ, ಪೊಲೀಸರ ಪರಿಶೀಲನಾ ಪತ್ರ ಸೇರಿ ಸುಮಾರು 2 ಸಾವಿರ ಪುಟಗಳ ಅರ್ಜಿಯನ್ನು ಐಎಸ್‌ಡಿ ಅಧಿಕಾರಿಗಳಿಗೆ ಕೊಟ್ಟಿದ್ದೇವೆ. ವರ್ಷವಾದರೂ ನವೀಕರಣವಾಗಿಲ್ಲ.’

‘ಅರ್ಜಿ ತಿರಸ್ಕರಿಸಿದ್ದರೆ 30 ದಿನದೊಳಗೆ ಕಾರಣ ಸಮೇತ ಸ್ವೀಕೃತಿ ಪತ್ರ ಕೊಡಬೇಕು. ಅದ್ಯಾವುದನ್ನೂ ಅಧಿಕಾರಿಗಳು ಮಾಡುತ್ತಿಲ್ಲ’ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

‘ಆಯಾ ಠಾಣೆಗಳ ಇನ್‌ಸ್ಪೆಕ್ಟರ್‌ಗಳು ಏಜೆನ್ಸಿಗಳ ಬಗ್ಗೆ ಮಾಹಿತಿ ಪಡೆಯಲು ಬರುತ್ತಾರೆ. ತಮಗೆ ಸಂಬಂಧವಿಲ್ಲದ ಭವಿಷ್ಯ ನಿಧಿ ಹಾಗೂ ಆದಾಯ ತೆರಿಗೆ ದಾಖಲೆ ಕೇಳುತ್ತಾರೆ’ ಎಂದು ಶಶಿಧರ್‌ ಆರೋಪಿಸಿದರು.

‘ಕೆಲ ಏಜೆನ್ಸಿಗಳು ಅನಧಿಕೃತವಾಗಿ ಕೆಲಸ ಮಾಡುತ್ತಿವೆ. ಅವುಗಳ ವಿರುದ್ಧ ಪೊಲೀಸರು ಯಾವುದೇ ಕ್ರಮ ಕೈಗೊಳ್ಳುತ್ತಿಲ್ಲ. ನಮಗೆ ಕಾನೂನುಬದ್ಧವಾಗಿ  ಸೇವೆ ಮುಂದುವರಿಸಲು ಅವಕಾಶವನ್ನೂ ನೀಡುತ್ತಿಲ್ಲ.’

‘ಗೃಹ ಸಚಿವ, ಕಾರ್ಮಿಕ ಸಚಿವ  ಹಾಗೂ ಐಎಸ್‌ಡಿ ಮುಖ್ಯಸ್ಥರಿಗೆ 10ಕ್ಕೂ ಹೆಚ್ಚು ಬಾರಿ ಮನವಿ ಸಲ್ಲಿಸಿದ್ದೇವೆ.  ಅವರ ಪೈಕಿ ಗೃಹ ಸಚಿವರು ಮಾತ್ರ ಆದಷ್ಟು ಬೇಗ ಸಮಸ್ಯೆ ಬಗೆಹರಿಸುವ ಭರವಸೆ ನೀಡಿದ್ದಾರೆ’ ಎಂದು ತಿಳಿಸಿದರು.