ಬ್ಯಾಂಕುಗಳಿಂದ ಕತ್ತರಿ

ಇತ್ತೀಚೆಗೆ ಬಿಡುಗಡೆಯಾದ ಸಾರ್ವಜನಿಕ ಲೆಕ್ಕಪತ್ರ ಸಮಿತಿಯ ವರದಿ ಪ್ರಕಾರ, ದೇಶದ ಎಲ್ಲಾ ಬ್ಯಾಂಕುಗಳಲ್ಲಿ ಅನುತ್ಪಾದಕ ಆಸ್ತಿ ಲಕ್ಷಾಂತರ ಕೋಟಿ ಇದ್ದು, ಇದರಲ್ಲಿ ಕಾರ್ಪೊರೇಟ್ ಕಂಪೆನಿಗಳಿಗೆ ನೀಡಿರುವ ಸಾಲದ ಪ್ರಮಾಣವೇ ಹೆಚ್ಚಾಗಿದೆ.

ಇಂತಹವರಿಂದ ಕಟ್ಟುನಿಟ್ಟಾಗಿ ಸಾಲ ವಸೂಲಿ ಮಾಡಲಾಗದ ಬ್ಯಾಂಕುಗಳು ನಮ್ಮಂತಹ ಮಧ್ಯಮ ವರ್ಗದ ಗ್ರಾಹಕರ ಮೇಲೆ ಅನವಶ್ಯಕವಾಗಿ ಸೇವಾಶುಲ್ಕ ಹೇರುತ್ತಿರುವುದು ನಾಚಿಕೆಗೇಡು.

ಈ ಪರಿಸ್ಥಿತಿ ನೋಡಿ ವೀರೇಂದ್ರ ಸೆಹ್ವಾಗ್ ಅವರು ಮಾಡಿದ ಟ್ವೀಟ್‌ ನೆನಪಾಗುತ್ತದೆ– ‘ವಿಜಯ್ ಮಲ್ಯ ಅವರೇ, ದಯವಿಟ್ಟು ಬೇಗ ದೇಶಕ್ಕೆ ಹಿಂತಿರುಗಿ ನಿಮ್ಮ ಸಾಲ ತೀರಿಸಿ. ಇಲ್ಲದಿದ್ದರೆ ಬ್ಯಾಂಕುಗಳು ಸೇವಾ ಶುಲ್ಕ ಹೆಚ್ಚಿಸುವ ಮೂಲಕ ನಮ್ಮಿಂದ ಆ ಹಣವನ್ನು ವಸೂಲು ಮಾಡುತ್ತವೆ’.

ಇದು ವ್ಯಂಗ್ಯ ಎನಿಸಿದರೂ ವಾಸ್ತವ. ಪ್ರಧಾನಿ ಈ ವಿಷಯದಲ್ಲಿ ಮಧ್ಯಪ್ರವೇಶಿಸಿ ಅನವಶ್ಯಕ ಹೊರೆ ನಿಲ್ಲಿಸಬೇಕು. ಎಲ್ಲರನ್ನೂ ಒಳಗೊಂಡಿರುವ ಬ್ಯಾಂಕಿಂಗ್ ವ್ಯವಸ್ಥೆಗೆ ಶಕ್ತಿ ತುಂಬಿ ದೇಶದ ಅರ್ಥವ್ಯವಸ್ಥೆಯನ್ನು ಬಲಪಡಿಸಬೇಕು.
-ಸಿ.ಜಿ.ವೆಂಕಟೇಶ್ವರ, ಗೌರಿಬಿದನೂರು