ಹೂಜಿ ಆಕಾರದ ಅತ್ಯಾಕರ್ಷಕ ಬಣ್ಣಗಳ ಎಲೆಗಳಿಂದ ಕೂಡಿರುವ ಈ ಸಸ್ಯಗಳನ್ನು ನೋಡಿದರೆ ವಾಹ್ ಎನ್ನುವ ಉದ್ಗಾರ ತಾನೇ ತಾನಾಗಿ ಬರುವಂತಿದೆ. ಈ ಎಲೆಗಳ ಮೇಲೆ ಕೂರುವ ಕ್ರಿಮಿಕೀಟಗಳನ್ನು ಇವು ಕ್ಷಣಾರ್ಧದಲ್ಲಿ ನುಂಗಿ ಜೀರ್ಣಿಸಿಕೊಂಡುಬಿಡುತ್ತವೆ ಎಂದು ತಿಳಿದರೆ ಆಶ್ಚರ್ಯವಾಗುತ್ತದೆ.
ಆಸ್ಟ್ರೇಲಿಯಾದ ನೈರುತ್ಯ ಭಾಗದಲ್ಲಿರುವ ಸಿಲ್ವರ್ ಕೋಸ್ಟ್ ಲೈನ್ನಲ್ಲಿ ಕಂಡುಬರುವ ಈ ಮಾಂಸಾಹಾರಿ ಸಸ್ಯಗಳ ಹೆಸರು, ಆಕಾರಕ್ಕೆ ತಕ್ಕಂತೆ ‘ಆಸ್ಟ್ರೇಲಿಯನ್ ಫಿಚರ್ (ಹೂಜಿ) ಸಸ್ಯ’.
ಹೂಜಿ ಮಾದರಿಯಲ್ಲಿರುವ ಎಲೆಗಳು ಸಹಜವಾಗಿಯೇ ತನ್ನ ಶಿಕಾರಿಗಳನ್ನು ಒಳಗೆ ಎಳೆದುಕೊಳ್ಳಲು ಅನುಕೂಲವಾಗುವಂತೆ ಇರುತ್ತವೆ. ನ್ಯೂಯಾರ್ಕ್ನ ಬಫಲೊ ವಿಶ್ವವಿದ್ಯಾಲಯದ ವಿಜ್ಞಾನಿಗಳು ನಡೆಸಿದ ಅಧ್ಯಯನದಲ್ಲಿ ಈ ಮಾಂಸಾಹಾರಿ ಸಸ್ಯಗಳ ಮಾಹಿತಿ ತಿಳಿದುಬಂದಿದೆ.
ಪೋಷಕಾಂಶಕ್ಕಾಗಿ ಶಿಕಾರಿ
ಪೋಷಕಾಂಶಗಳು ಕಡಿಮೆ ಇರುವ ಮಣ್ಣಿನಲ್ಲಿ ಬೆಳೆಯುವ ಈ ಸಸ್ಯಗಳು, ಕೊರತೆ ನೀಗಿಕೊಳ್ಳಲು ಪರ್ಯಾಯ ಮಾರ್ಗ ಕಂಡುಕೊಂಡಿದೆ. ಕ್ರಿಮಿಕೀಟಗಳನ್ನು ಶಿಕಾರಿ ಮಾಡುವ ಸಸ್ಯಗಳು, ಈ ಮೂಲಕ ತಮ್ಮಲ್ಲಿ ಕೊರತೆಯಾಗಿರುವ ಸಾರಜನಕ ಹಾಗೂ ರಂಜಕದ ಅಂಶಗಳನ್ನು ಸಂಗ್ರಹಿಸುತ್ತವೆ.
ಸಂಚುಕೋರ ಸಸ್ಯ
ಈ ಸಸ್ಯಗಳಲ್ಲಿ ಎರಡು ರೀತಿಯ ಎಲೆಗಳಿವೆ. ಹೂಜಿ ಆಕಾರದ ಎಲೆಗಳು ಕ್ರಿಮಿಕೀಟಗಳನ್ನು ನುಂಗುತ್ತವೆ. ಇಂತಹ ಕ್ರಿಮಿಕೀಟಗಳನ್ನು ತನ್ನತ್ತ ಸೆಳೆಯಲು ಸಿಹಿಯಾದ ದ್ರವ ಉತ್ಪತ್ತಿ ಮಾಡುವ ಪ್ರತ್ಯೇಕ ಎಲೆಗಳನ್ನೂ ಹೊಂದಿವೆ.
ಸಿಹಿಯಾದ ದ್ರವದ ಜತೆಗೆ ಮೇಣದ ರೀತಿಯ ಅಂಶವನ್ನೂ ಉತ್ಪತ್ತಿ ಮಾಡುವ ಜೀವಕೋಶಗಳೂ ಈ ಎಲೆಗಳಲ್ಲಿ ಇರುತ್ತವೆ. ಮೇಣದ ರೀತಿಯ ದ್ರವದಿಂದಾಗಿ ಕ್ರಿಮಿಕೀಟಗಳು ಹೂಜಿ ಆಕಾರದ ಎಲೆಗಳಿಂದ ತಪ್ಪಿಸಿಕೊಳ್ಳುವುದು ಅಸಾಧ್ಯವಾಗುತ್ತದೆ.