ತೋಟಗಾರಿಕೆ ವಿ. ವಿಯಲ್ಲಿ ಬಾಯಾರಿಕೆ ನೀಗಿಸಿದ ‘ವ್ಯರ್ಥ’ ನೀರು

ಬಾಗಲಕೋಟೆ: ಮಳೆಕೊಯ್ಲು ಹಾಗೂ ವ್ಯರ್ಥ ನೀರು ಪುನರ್ಬಳಕೆ ತಾಂತ್ರಿಕತೆ ಅಳವಡಿಕೆಯಿಂದ ಕ್ಯಾಂಪಸ್‌ನ ನೀರಿನ ಬೇಡಿಕೆ ಈಡೇರಿಸಿಕೊಳ್ಳುವಲ್ಲಿ ತೋಟ­ಗಾ­ರಿಕೆ ವಿಶ್ವವಿದ್ಯಾಲಯ ಯಶಸ್ವಿ­ಯಾಗಿದೆ.

ವಿವಿಯ ಜಲಯಜ್ಞದಿಂದಾಗಿ ನಿತ್ಯ ಐದು ಲಕ್ಷ ಲೀಟರ್ ನೀರು ಕ್ಯಾಂಪಸ್‌ ಬಳಕೆಗೆ ಸಿಗುತ್ತಿದೆ. 150 ಎಕರೆ ಪ್ರದೇಶ­ದಲ್ಲಿನ ಉದ್ಯಾನ, ಕೈ ತೋಟಗಳು, ಪ್ರಾಯೋಗಿಕ ತಾಕುಗಳಲ್ಲಿನ ಹಣ್ಣು, ತರಕಾರಿ ಹಾಗೂ ಸುಗಂಧ ದ್ರವ್ಯದ ಗಿಡಗಳು ಬಿರು ಬೇಸಿಗೆಯಲ್ಲೂ ಹಸಿರಿ­ನಿಂದ ನಳನಳಿಸುತ್ತಿವೆ. ಒಂದೂವರೆ ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು, ಶಿಕ್ಷಕರು ಹಾಗೂ ಸಿಬ್ಬಂದಿಯ ದೈನಂದಿನ ಅಗತ್ಯ ಈ ನೀರು ಪೂರೈಸುತ್ತಿದೆ.

ಎರಡು ಕೆರೆಗಳ ನಿರ್ಮಾಣ: ಕ್ಯಾಂಪಸ್‌­ನಲ್ಲಿ ನೀರು ಸಂಗ್ರಹಿಸಲು ವಿವಿ ಆವರಣ­ದಲ್ಲಿಯೇ  60x60 ಹಾಗೂ 65x90 ಮೀಟರ್ ವಿಸ್ತೀರ್ಣದ ಎರಡು ಕೆರೆ ನಿರ್ಮಿಸಲಾಗಿದೆ. ಅದರಲ್ಲಿ ಒಂದು 65 ಲಕ್ಷ ಲೀ., ಮತ್ತೊಂದು 1.5 ಕೋಟಿ ಲೀ. ನೀರು ಸಂಗ್ರಹಣೆ ಸಾಮರ್ಥ್ಯ ಹೊಂದಿದೆ.

ಮಳೆ ಕೊಯ್ಲು: ವಿಶ್ವವಿದ್ಯಾಲಯದ ಆವರಣ, ಹಿಂಭಾಗದ ಗುಡ್ಡ, ನವನಗರ ಯುನಿಟ್‌ 2ರಲ್ಲಿ ಸುರಿದು ಹರಿದು ಹೋಗುತ್ತಿದ್ದ ಮಳೆಯ ನೀರು ವ್ಯರ್ಥ­ವಾಗದಂತೆ ಕಾಲುವೆ ಮೂಲಕ ಕೆರೆಗೆ ಹರಿಸಲಾಗುತ್ತಿದೆ.

ನೀರಿನ ಪುನರ್ಬಳಕೆ: ವಿವಿ ಕ್ಯಾಂಪಸ್‌ ಬಳಿಯ ಸೀಮಿಕೇರಿಯಲ್ಲಿ ಬಾಗಲ­ಕೋಟೆ ಪಟ್ಟಣ ಅಭಿವೃದ್ಧಿ ಪ್ರಾಧಿಕಾರದ (ಬಿಟಿಡಿಎ) ಜಲ ಶುದ್ಧೀಕರಣ ಘಟಕ ಇದೆ. ಘಟಪ್ರಭಾ ನದಿ ನೀರನ್ನು ಅಲ್ಲಿ ಸಂಗ್ರಹಿಸಿ, ಶುದ್ಧೀಕರಿಸಲಾಗುತ್ತದೆ.