ಚೇತರಿಕೆ ಕಂಡ ಹುಣಸೆಹಣ್ಣಿನ ಧಾರಣೆ

ಮೈಸೂರು: ಸತತ ಬೆಲೆ ಕುಸಿತದಿಂದ ನೆಲಕಚ್ಚಿದ್ದ ಹುಣಸೆಹಣ್ಣಿನ ದರದಲ್ಲಿ ಚೇತರಿಕೆ ಕಂಡುಬಂದಿದೆ. ತಿಂಗಳ ಆರಂಭದಲ್ಲಿ ಕ್ವಿಂಟಲ್‌ಗೆ ಇಲ್ಲಿನ ಎಪಿಎಂಸಿ ಸಗಟು ಮಾರುಕಟ್ಟೆಯಲ್ಲಿ ₹ 6,704 ಇದ್ದದ್ದು, ಇದೀಗ 7,467ಕ್ಕೆ ಏರಿಕೆಯಾಗಿದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ದರ ಕಡಿಮೆ ಇದ್ದರೂ, ಈ ವರ್ಷದ ಉತ್ತಮ ದರ ಇದಾಗಿದೆ.

ಬೀನ್ಸ್ ದರ ಏರಿಕೆ ಮುಂದುವರಿದಿದ್ದು, ಕಳೆದ ವಾರ ಕೆ.ಜಿ.ಗೆ ಸಗಟು ಧಾರಣೆ ₹ 49 ಇದ್ದದ್ದು, ಇದೀಗ ₹ 65ನ್ನು ತಲುಪಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿ.ಗೆ ₹ 80ರಿಂದ ₹ 90ರವರೆಗೂ ಮಾರಾಟವಾಗುತ್ತಿದೆ.

ಕ್ಯಾರೆಟ್ ದರವೂ ಏರಿಕೆಯಾಗುತ್ತಿದ್ದು, ಸಗಟು ಧಾರಣೆ ಕೆ.ಜಿ.ಗೆ ₹ 16ರಿಂದ ₹ 21ಕ್ಕೆ  ಹೆಚ್ಚಿದೆ. ಬೀಟ್ರೂಟ್‌ ದರವೂ ₹ 14ರಿಂದ ₹ 19ಕ್ಕೆ ಏರಿಕೆಯಾಗಿದೆ.

ಟೊಮೆಟೊ ಧಾರಣೆಯಲ್ಲಿ ಅಲ್ಪ ಇಳಿಕೆಯಾಗಿದೆ. ಕೆ.ಜಿ.ಗೆ ₹ 18.50ಯಿಂದ ₹ 16ಕ್ಕೆ ಇಳಿಕೆಯಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಇದು ಕೆ.ಜಿ.ಗೆ ₹ 20ಕ್ಕೆ ಮಾರಾಟವಾಗುತ್ತಿದೆ. ದಪ್ಪಮೆಣಸಿನಕಾಯಿ ದರ ಕೆ.ಜಿ.ಗೆ ₹ 32ರಿಂದ ₹ 26ಕ್ಕೆ, ನುಗ್ಗೆಕಾಯಿ ₹ 19ರಿಂದ ₹ 16ಕ್ಕೆ ಇಳಿಕೆಯಾಗಿದೆ.

ಒಣಮೆಣಸಿನಕಾಯಿ ದರದಲ್ಲಿ ಏರಿಳಿತ: ಒಣಮೆಣಸಿನಕಾಯಿ ದರ ಏರಿಳಿತದ ಹಾದಿಯಲ್ಲಿದೆ. ತಿಂಗಳ ಆರಂಭದಲ್ಲಿ ಕ್ವಿಂಟಲ್‌ಗೆ ಇದರ ಸಗಟು ಧಾರಣೆ ₹ 3,734 ಇತ್ತು. ಮಾರ್ಚ್ 14ರಂದು ₹ 6,150ಕ್ಕೆ ಏರಿತು. 15ರಂದು ₹ 10 ಸಾವಿರ ತಲುಪಿತು. ಎರಡೇ ದಿನದಲ್ಲಿ ₹ 2,804ಕ್ಕೆ ಕುಸಿಯಿತು.

ಉತ್ತರ ಕರ್ನಾಟಕದಲ್ಲಿ ಸಾಕಷ್ಟು ಬೆಳೆಯಲಾಗಿರುವ ಒಣಮೆಣಸಿನಕಾಯಿ ಅಲ್ಲಿಂದ ಇಲ್ಲಿಗೆ ಆವಕವಾಗುತ್ತಿದೆ. ಮಾರುಕಟ್ಟೆಗೆ ಹೆಚ್ಚು ಬಂದ ದಿನ ಬೆಲೆ ಕುಸಿಯುತ್ತದೆ. ಬೇರೆ ದಿನಗಳಲ್ಲಿ ಉತ್ತಮ ದರಕ್ಕೆ ಮಾರಾಟವಾಗುತ್ತಿದೆ ಎಂದು ಎಪಿಎಂಸಿ ಮಾರುಕಟ್ಟೆಯ ವರ್ತಕ ಸ್ವಾಮಿ ತಿಳಿಸಿದರು.

ಕೋಳಿಮೊಟ್ಟೆ, ಮಾಂಸ ಏರಿಕೆ: ಕೋಳಿಮೊಟ್ಟೆ ಒಂದಕ್ಕೆ ₹ 3.37ರಿಂದ ₹ 3.51ಕ್ಕೆ ಅಲ್ಪ ಏರಿಕೆಯಾಗಿದೆ. ಬ್ರಾಯ್ಲರ್ ಕೋಳಿ ಮಾಂಸ ₹ 69ರಿಂದ ₹ 66ಕ್ಕೆ ಇಳಿಕೆಯಾಗಿದ್ದರೆ, ಕಲ್ ಬರ್ಡ್ ₹ 92ರಿಂದ ₹ 118ಕ್ಕೆ ಹೆಚ್ಚಿದೆ.

ಧಾನ್ಯಗಳ ಪೈಕಿ ವಿವಿಧ ತಳಿಗಳ ಅಕ್ಕಿ ದರ ಏರಿಕೆ ಮುಂದುವರಿದಿದೆ. ಸದ್ಯ, ಉತ್ತಮ ಗುಣಮಟ್ಟದ ಅಕ್ಕಿ ಕ್ವಿಂಟಲ್‌ಗೆ ₹ 5,100, ಮಧ್ಯಮ ಗುಣಮಟ್ಟದ ಅಕ್ಕಿ ₹ 3,700 ಇದೆ. ಉದ್ದಿನಬೇಳೆ ₹ 94ರಿಂದ ₹ 90ಕ್ಕೆ, ಕಡಲೆಬೇಳೆ ₹ 67ರಿಂದ 60ಕ್ಕೆ ಅಲ್ಪ ಇಳಿಕೆಯಾಗಿದೆ. ಕಡಲೆಕಾಳು ₹ 60ರಿಂದ ₹ 65ಕ್ಕೆ ಏರಿಕೆಯಾಗಿದೆ.

ಮೂರು ವರ್ಷಕ್ಕೆ ಹುಣಸೆ ಫಸಲು!: ಚಿಂತಾಮಣಿ ಕೃಷಿ ಸಂಶೋಧನಾ ಕೇಂದ್ರವು ‘ಜಿಕೆವಿಕೆ– 1’ ಎಂಬ ಹೈಬ್ರಿಡ್ ತಳಿಯನ್ನು ಸಂಶೋಧಿಸಿದೆ. ಇದು ಕೇವಲ ಮೂರೇ ವರ್ಷಕ್ಕೆ ಫಸಲು ನೀಡುತ್ತದೆ.