ಮುಂಬೈ: ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ (ಬಿಎಸ್‌ಇ) ಮೂರು ತಿಂಗಳ ಬಳಿಕ ಗರಿಷ್ಠ ಕುಸಿತ ಕಂಡಿದೆ. ಬುಧವಾರ 318 ಅಂಶ ಇಳಿಕೆ ಕಂಡು, 29,168 ಅಂಶಗಳಲ್ಲಿ ವಹಿವಾಟು ಅಂತ್ಯವಾಗಿದೆ.
ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ (ಎನ್‌ಎಸ್‌ಇ) ನಿಫ್ಟಿ 91 ಅಂಶ ಇಳಿಕೆ ಕಂಡು, 9,030 ಅಂಶಗಳಲ್ಲಿ ವಹಿವಾಟು ಅಂತ್ಯವಾಗಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಆರ್ಥಿಕ ನೀತಿ ಅನುಷ್ಠಾನದ ಬಗ್ಗೆ ಹೂಡಿಕೆದಾರರಲ್ಲಿ ಅನುಮಾನ ಮೂಡಿದೆ. ಜತೆಗೆ ಉತ್ತರ ಕೊರಿಯಾದ ಪರಮಾಣು ಪರೀಕ್ಷೆ ವಿಫಲವಾಗಿರುವುದು ಜಾಗತಿಕ ಮಟ್ಟದಲ್ಲಿ ನಕಾರಾತ್ಮಕ ಭಾವನೆ ಮೂಡಿಸಿತು.
ಈ ಕಾರಣಗಳಿಂದ ದೇಶದ ಷೇರುಪೇಟೆಗಳಲ್ಲಿ ಲಾಭ ಗಳಿಕೆ ಉದ್ದೇಶದ ವಹಿವಾಟು ನಡೆದು ಸೂಚ್ಯಂಕಗಳು ಇಳಿಕೆ ಕಾಣುವಂತಾಯಿತು ಎಂದು ಪರಿಣತರು ಹೇಳಿದ್ದಾರೆ. ಗ್ರಾಹಕ ಬಳಕೆಯ ವಸ್ತುಗಳು, ಲೋಹ, ಬ್ಯಾಂಕ್‌ ಷೇರುಗಳು ಕುಸಿದಿವೆ.
