‘ಸಾಂಪ್ರದಾಯಿಕ ಕೃಷಿಯಿಂದ ಅನುಕೂಲವಾಗದು’

ಬೆಳಗಾವಿ: ಸಾವಯವ ಹಾಗೂ ಸಾಂಪ್ರದಾಯಿಕ ಕೃಷಿಗೆ ವ್ಯತ್ಯಾಸವಿದೆ. ರೈತರು ಇದನ್ನು ಅರಿತು ಸಾಂಪ್ರದಾಯಿಕ ಪದ್ಧತಿಯಿಂದ ಹೊರಬರಬೇಕು. ಜಾಣ್ಮೆಯಿಂದ ಕೃಷಿ ಮಾಡುವುದು ಇಂದಿನ ಅಗತ್ಯವಾಗಿದೆ ಎಂದು ಕೃಷಿ ಇಲಾಖೆ ಜಂಟಿ ನಿರ್ದೇಶಕ ವೆಂಕಟರಾಮರೆಡ್ಡಿ ಪಾಟೀಲ ಇಲ್ಲಿ ಸಲಹೆ ನೀಡಿದರು.

ಇಫ್ಕೋ (ಇಂಡಿಯನ್ ಫಾರ್ಮರ್ಸ್‌ ಫರ್ಟಿಲೈಸರ್ಸ್‌ ಕೋ– ಆಪರೇಟಿವ್ ಕಂಪೆನಿ) ತನ್ನ ಭಾರತೀಯ ಸಹಕಾರಿ ಡಿಜಿಟಲ್ ವೇದಿಕೆ ವತಿಯಿಂದ ನಗರದ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯ ಹೊಸ ಕಾಯಿಪಲ್ಲೆ ಮಾರುಕಟ್ಟೆ ಸಮೀಪ ಬುಧವಾರ ಆರಂಭಿಸಿದ ‘ಇಪ್ಕೋ ಬಜಾರ್, ಕಿಸಾನ್ ಸುವಿಧಾ ಕೇಂದ್ರ’ದ ಉದ್ಘಾಟನಾ ಸಮಾರಂಭದಲ್ಲಿ ಅವರು ಮಾತನಾಡಿದರು.

‘ಪ್ರಸ್ತುತ ಸ್ಥಿತಿಯಲ್ಲಿ ಸಾಂಪ್ರದಾಯಿ ಕೃಷಿಯಿಂದ ಅನುಕೂಲವಾಗುವುದಿಲ್ಲ. ಹಿಂದೆ ದಡ್ಡನಿದ್ದರೆ ಕೃಷಿಗೆ ಹಾಕು ಎನ್ನುತ್ತಿದ್ದರು. ಆದರೆ, ಇಂದು ಜಾಣನಾಗಿದ್ದರೆ ಕೃಷಿಗೆ ಬರಬೇಕು. ದಡ್ಡರಿಗೆ ಇಲ್ಲಿ ಜಾಗವಿಲ್ಲ. ಪ್ರಸ್ತುತ ಮಾರುಕಟ್ಟೆಯನ್ನು ಅರಿತು, ಎಲ್ಲಿ ಮಾರಿದರೆ ಹೆಚ್ಚಿನ ಬೆಲೆ ಸಿಗುತ್ತದೆ, ಯಾವ ರೀತಿಯ ಕೃಷಿ ಮಾಡಬೇಕು ಎನ್ನುವ ಜ್ಞಾನವಿರಬೇಕಾಗುತ್ತದೆ’ ಎಂದು ತಿಳಿಸಿದರು.

ಶೇ 70ರಷ್ಟು ಸಂಶೋಧನೆ ಲ್ಯಾಬ್‌ನಲ್ಲೇ ಇದೆ:‘ಸಮೀಕ್ಷೆಯ ಪ್ರಕಾರ, ಸಂಶೋಧನೆಯ ಪ್ರಯೋಜನ ಜಮೀನುಗಳಿಗೆ ಶೇ 30ರಷ್ಟು ಮಾತ್ರವೇ ತಲುಪಿದೆ. ಶೇ 70ರಷ್ಟು ಇನ್ನೂ ಪ್ರಯೋಗಾಲಯದಲ್ಲಿಯೇ ಇದೆ. ವಿಸ್ತರಣಾ ಕಾರ್ಯ ಸಮರ್ಪಕವಾಗಿ ನಡೆದಿರುವುದು ಇದಕ್ಕೆ. ಇದರ ಭಾಗವಾಗಿ ಸರ್ಕಾರದ ಸೂಚನೆ ಮೇರೆಗೆ ಕಿಸಾನ್‌ ಸುವಿಧಾ ಕೇಂದ್ರಗಳನ್ನು ತೆರೆಯಲಾಗುತ್ತಿದೆ. ರೈತರಿಗೆ ಮಾಹಿತಿಕೊಡಲಾಗುತ್ತಿದೆ’ ಎಂದು ಹೇಳಿದರು.

ಇಫ್ಕೋ ರಾಜ್ಯ ಮಾರುಕಟ್ಟೆ ವ್ಯವಸ್ಥಾಪಕ ಸಿ.ಎಸ್. ಪಾಟೀಲ ಮಾತನಾಡಿ, ‘1967ರಲ್ಲಿ 50 ವರ್ಷಗಳ ಹಿಂದೆ 57 ಸಹಕಾರಿ ಸಂಘಗಳ₹6 ಲಕ್ಷ ಷೇರು ಬಂಡವಾಳದೊಂದಿಗೆ ಆರಂಭವಾದ ಇಫ್ಕೋ ಪ್ರಸ್ತುತ 36,000 ಸಹಕಾರಿ ಸಂಘಗಳ ಷೇರು ಬಂಡವಾಳವನ್ನು ಹೊಂದಿದೆ. ಸಹಕಾರ ರಂಗದಲ್ಲಿ ಕೆಲಸ ಮಾಡುತ್ತಿರುವುದರಿಂದ ಇಷ್ಟು ಬೃಹತ್ತಾಗಿ ಬೆಳೆದಿದೆ. ರೈತರು, ಸಹಕಾರಿಗಳು ಇಫ್ಕೋದಿಂದ ರಸಗೊಬ್ಬರ, ಔಷಧಿ ಮೊದಲಾದ ಕೃಷಿ ಪರಿಕರಗಳನ್ನು ಖರೀದಿಸುತ್ತಿದ್ದಾರೆ’ ಎಂದು ತಿಳಿಸಿದರು.

ವೈಜ್ಞಾನಿಕವಾಗಿ ಬಳಸುತ್ತಿದ್ದೇವೆಯೇ?: ‘ದೇಶದಲ್ಲಿ ರೈತರು ವಾರ್ಷಿಕ 400 ಟನ್‌ನಷ್ಟು ರಸಗೊಬ್ಬರ ಬಳಸುತ್ತಾರೆ. ಇಫ್ಕೋದಿಂದ ಸಿದ್ಧಪಡಿಸಿದ 85 ಲಕ್ಷ ಟನ್‌ ಹಾಗೂ ಆಮದು ಮಾಡಿಕೊಂಡ 50 ಟನ್ ಸೇರಿ ಒಟ್ಟು 135 ಲಕ್ಷ ಟನ್‌ನಷ್ಟು ಗೊಬ್ಬರವನ್ನು ರೈತರಿಗೆ ಒದಗಿಸಲಾಗುತ್ತಿದೆ.