ಸಾಗುವಳಿದಾರರ ಸಹಕಾರ ಅಗತ್ಯ

ಮಾಗಡಿ: ಭೂರಹಿತ ಕೃಷಿಕರು ಸರ್ಕಾರಿ ಗೋಮಾಳದಲ್ಲಿ ಸಾಗುವಳಿ ಮಾಡುತ್ತಿದ್ದ ಬಗರ್ ಹುಕುಂ ಜಮೀನನ್ನು ಸರ್ವೆಕಾರ್ಯ ನಡೆಸಲು ಅಧಿಕಾರಿಗಳು ಬಂದಾಗ ಬಗರ್‌ ಹುಕುಂ ಸಾಗುವಳಿದಾರರು ಸ್ಥಳದಲ್ಲಿದ್ದು, ಅಧಿಕಾರಿಗಳಿಗೆ ಸಹಕಾರ ನೀಡಬೇಕು ಎಂದು ಶಾಸಕ ಎಚ್.ಸಿ.ಬಾಲಕೃಷ್ಣ ತಿಳಿಸಿದರು.

ತಹಶೀಲ್ದಾರ್‌ ಕಚೇರಿಯ ಸಭಾಂಗಣದಲ್ಲಿ  ಶುಕ್ರವಾರ ನಡೆದ ಬಗರ್ ಹುಕುಂ  ಸಮಿತಿ  ಸಭೆಯಲ್ಲಿ ಬಗರ್ ಹುಕುಂ ಸಾಗುವಳಿದಾರರಿಂದ ಮನವಿ ಸ್ವೀಕರಿಸಿ  ಅವರು ಮಾತನಾಡಿದರು.

ತಾಲ್ಲೂಕಿನ ಕುದೂರು, ಮಾಡಬಾಳ್, ತಿಪ್ಪಸಂದ್ರ, ಕಸಬ ಹೋಬಳಿಗಳಲ್ಲಿ ಬಗರ್ ಹುಕುಂ ಸಾಗುವಳಿಯ ಹಕ್ಕುಪತ್ರ ಪಡೆಯಲು 6 ಸಾವಿರ ಸಾಗುವಳಿದಾರರು ಭೂಮಿ ಸಕ್ರಮಗೊಳಿಸುವಂತೆ ಅರ್ಜಿ ಸಲ್ಲಿಸಿದ್ದಾರೆ. ಮೊದಲು ಕುದೂರು ಹೋಬಳಿಯಲ್ಲಿ ಬಗರ್‌ ಹುಕುಂ ಸಾಗುವಳಿ ಮಾಡಿರುವವರ ಭೂಮಿಯನ್ನು ಸರ್ವೆ ಮಾಡಿಸಲು 8 ಜನ ಭೂಮಾಪನಾಧಿಕಾರಿಗಳು ಕಂದಾಯ ಇಲಾಖೆ ಅಧಿಕಾರಿಗಳೊಂದಿಗೆ ತೆರಳಿ ಸ್ಥಳ ಪರಿಶೀಲನೆ ನಡೆಸಲಿದ್ದಾರೆ.