ಮೊದಲ ಓದು

 

ಸಂಕಲನಕ್ಕೆ ಹೆಸರು ಕೊಟ್ಟ ‘ಎಲ್ಲಾದರೂ ಬದುಕಿರು ಗೆಳೆಯಾ’ ಎಂಬ ಕತೆ ಕಳೆದುಹೋದ ಗೆಳೆಯನನ್ನು ಹುಡುಕುವುದಾಗಿದೆ. ಪರದೇಶದಲ್ಲಿ ನೌಕರಿಯಲ್ಲಿರುವ ಗೆಳೆಯ ಚಂದ್ರು ಕಣ್ಮರೆಯಾದ ಶೇಖರನನ್ನು ಹುಡುಕಲು ಸ್ವದೇಶಕ್ಕೆ ಬರುತ್ತಾನೆ.

 

ಗೆಳೆಯನ ಬದುಕಿನ ಕುರಿತ ವಿವರಗಳು ಸಿಗುತ್ತವೆಯೇ ಹೊರತು ಅವನು ಸಿಗುವುದಿಲ್ಲ. ಈ ಕತೆ ಅವರ ಬರವಣಿಗೆಯ ಕ್ರಮವನ್ನು ತೋರುತ್ತದೆ. ಮತ್ತು ಸಂಕಲನದ ಮಹತ್ವ, ವಿಶಿಷ್ಟ ಕಥೆಯಾಗಿದೆ.
 

ಮಾಲತಿಯವರ ಕತೆಗಳು ಮನುಷ್ಯನ ಹಲಬಗೆಯ ಹುಡುಕಾಟಗಳಾಗಿ ಪ್ರಕಟಗೊಳ್ಳುತ್ತವೆ. ಅದು ಕತೆಗಾರ್ತಿಯ ಹುಡುಕಾಟವೂ ಹೌದು. ‘ಹೊಳೆಯಿತೊಂದು ಬೆಳಕಿನ ಕಿರಣ’ ಕತೆ ವಿಜಯ ಇನಾಮದಾರ ಎಂಬ ಲೇಖಕನ ಬರವಣಿಗೆಯ ಹುಡುಕಾಟದ ಕತೆ.

 

ಆ ಲೇಖಕ ಕಾದಂಬರಿ ಬರೆಯಲು ತಟ್ಟನೆ ಸ್ಫೂರ್ತಿ ಪಡೆದುಕೊಳ್ಳುವ, ತನ್ನ ಬರವಣಿಗೆಯನ್ನು ಮತ್ತೆ ಕಂಡುಕೊಳ್ಳುವ ವಸ್ತು ಅದರದ್ದು. ಉತ್ತರ ಕರ್ನಾಟಕ ಭಾಷೆ, ಸರಳ ನಿರೂಪಣೆ ಇಲ್ಲಿನ ಕತೆಗಳಿಗೆ ಹೊಸ ಬಗೆಯ ಆವರಣವನ್ನು ಕೊಟ್ಟಿವೆ.

 

ಎಲ್ಲಾದರೂ ಬದುಕಿರು ಗೆಳೆಯಾ
(ಕಥೆಗಳು)
ಲೇ: ಮಾಲತಿ ಪಟ್ಟಣಶೆಟ್ಟಿ
ಪ್ರಕಾಶನ: ಲಡಾಯಿ ಪ್ರಕಾಶನ, ನಂ 21, ಪ್ರಸಾದ ಹಾಸ್ಟೇಲ್‌, ಗದಗ –582 101

ಪುಟ: 96
ಬೆ: ₹ 80

 

***

ಯಕ್ಷಗಾನ ಕವಿ ಕೆಂಪಣ್ಣ ಗೌಡ ಕವಿಯ ಮೂರು ಕಾವ್ಯಗಳಾದ ‘ಕರಿರಾಯ ಚರಿತ್ರೆ’, ‘ನಳ ಚರಿತ್ರೆ’, ‘ಶನಿಮಹಾತ್ಮೆ’ಗಳನ್ನು ಹಿರಿಯ ವಿದ್ವಾಂಸ ಹ.ಕ. ರಾಜೇಗೌಡ ಸಂಪಾದಿಸಿ ಕೊಟ್ಟಿದ್ದಾರೆ.

ಜನಪದ ಮೂಲದ ಕಾವ್ಯಗಳನ್ನು ಆಧರಿಸಿ ಯಕ್ಷಗಾನದ ದೇಸಿಶೈಲಿಯಲ್ಲಿ ರಚಿತವಾದ ಈ ಕಾವ್ಯಗಳ ಗಮಕಕ್ಕೆ ಅಪಾರ ಕೇಳುಗರಿದ್ದರು. ಗ್ರಾಮ್ಯ ಭಾಷೆ, ನುಡಿಗಟ್ಟು, ಜನಪದ ಪರಿಸರವನ್ನು ಬಳಸಿ ಕೆಂಪಣ್ಣ ಗೌಡ ಬರೆದಿರುವ ಈ ಕಾವ್ಯಗಳು ಭಾಷೆಯ ದೃಷ್ಟಿಯಿಂದಲೂ ಅಭ್ಯಾಸಕ್ಕೆ ಅರ್ಹವಾಗಿವೆ.