ಮಲೆನಾಡಿನಲ್ಲೇ ನೀರಿಗೆ ತತ್ವಾರ

ಸಕಲೇಶಪುರ: ಎತ್ತಿನಹೊಳೆ ತಿರುವು ಯೋಜನೆ ಮೂಲಕ ಬಯಲು ಸೀಮೆ ಬಾಯಾರಿಕೆ ಇಂಗಿಸುವ ಮಲೆನಾಡಿನಲ್ಲಿಯೇ ಈ ಬಾರಿ ಕುಡಿಯುವ ನೀರಿಲ್ಲದೆ ಬಹುತೇಕ ಗ್ರಾಮಗಳ ಜನರು ಹಾಹಾಕಾರ ಪಡುವ ಸ್ಥಿತಿ ನಿರ್ಮಾಣವಾಗಿದೆ.

ವಿವಿಧ ಅಭಿವೃದ್ಧಿ ಯೋಜನೆಗಳಿಂದ ದಟ್ಟ ಮಳೆ ಕಾಡುಗಳು ಹಂತ ಹಂತವಾಗಿ ನಾಶವಾಗುತ್ತಿವೆ. ಇದರ ಪರಿಣಾಮವಾಗಿ ಮಲೆನಾಡಿನ ತಾಪಮಾನ 38 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿ ಆತಂಕ ಉಂಟು ಮಾಡಿದೆ. ಅಂತರ್ಜಲ ಮಟ್ಟ ಕುಸಿದು  ಶೇ. 60ರಷ್ಟು ತೆರೆದ ಬಾವಿಗಳು, ಕೊಳವೆ ಬಾವಿಗಳು ನೀರಿಲ್ಲದೆ ಬತ್ತಿಹೋಗಿವೆ.

ಹೇಮಾವತಿ ನದಿಯನ್ನು ಬಂದು ಸೇರುವ ಜಪಾವತಿ, ಬೆಣಚಿನಹಳ್ಳ, ಕಿರುಹಳ್ಳ ಸೇರಿದಂತೆ ಬಹುತೇಕ ಹಳ್ಳಗಳು ಸಂಪೂರ್ಣವಾಗಿ ಒಣಗಿವೆ. ಕೆರೆ, ಕಟ್ಟೆಗಳಲ್ಲಿಯೂ  ನೀರಿಲ್ಲ. ಸಣ್ಣ, ಸಣ್ಣ ಒಡ್ಡುಗಳು ಬತ್ತಿ ಹೋಗಿವೆ.

ಹಾನುಬಾಳು, ಯಸಳೂರು, ಹೆತ್ತೂರು ಹಾಗೂ ಕಸಬಾ ಹೋಬಳಿಗಳಿಗಿಂತಲೂ ಬೆಳಗೋಡು ಹೋಬಳಿ ವ್ಯಾಪ್ತಿಯ ಸುಮಾರು 30 ಗ್ರಾಮಗಳಿಗೆ ಕುಡಿಯುವ ನೀರಿನ ಸಮಸ್ಯೆ ತೀವ್ರವಾಗಿದೆ. ಬಾಗೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ದರ್ಬಾರ್‌ಪೇಟೆ ಗ್ರಾಮದಲ್ಲಿ ಸುಮಾರು 80 ಮನೆಗಳಿವೆ. ಪಂಚಾಯಿತಿ ವತಿಯಿಂದ ಕುಡಿಯುವ ನೀರಿಗೆ ಎರಡು ಕೊಳವೆ ಬಾವಿಗಳಿಂದ 8 ಸಿಸ್ಟನ್‌ಗಳಿಗೆ ನೀರು ಹರಿಸಿ ಸರಬರಾಜು ಮಾಡುವ ವ್ಯವಸ್ಥೆ ಇದೆ.

ಕೊಳವೆ ಬಾವಿಗಳಲ್ಲಿ ನೀರಿನ ಪ್ರಮಾಣ ಕಡಿಮೆ ಆಗಿರುವುದರಿಂದ ಎರಡು ದಿನಕ್ಕೊಮ್ಮೆ ಸಿಸ್ಟನ್‌ಗಳಿಗೆ ನೀರು ಹರಿಸಲಾಗುತ್ತಿದೆ. ರಾತ್ರಿ 11, 12 ಗಂಟೆ ವರೆಗೂ ನೀರಿಗಾಗಿ ಕಾದು ಕುಳಿತುಕೊಳ್ಳಬೇಕಾದ ಸ್ಥಿತಿ ನಿರ್ಮಾಣವಾಗಿದೆ.

‘ಪಂಚಾಯಿತಿ ವತಿಯಿಂದ ಮತ್ತೊಂದು ಕೊಳವೆ ಬಾವಿ ತೆಗೆಯಲಾಗಿದೆ. ಆದರೆ ಅಲ್ಲಿಂದ ಇನ್ನೂ ನೀರು ಸರಬರಾಜು ವ್ಯವಸ್ಥೆ ಆಗಿಲ್ಲ’ ಎನ್ನುತ್ತಾರೆ ಗ್ರಾಮದ ಜಗದೀಶ್‌.

‘ರಾಮನಗರ ಹಾಗೂ ಅರಸು ನಗರ ಗ್ರಾಮ ಸೇರಿ ಸುಮಾರು 100ಕ್ಕೂ ಹೆಚ್ಚು ಮನೆಗಳಿವೆ. ಆದರೆ ಇಲ್ಲಿಗೆ ಪ್ರತ್ಯೇಕವಾದ ಕುಡಿಯುವ ನೀರಿನ ವ್ಯವಸ್ಥೆ ಇಲ್ಲ. 2 ಕಿ.ಮೀ ದೂರದ ಕುಂಬಾರಗಟ್ಟೆ ಕಿರು ನೀರು ಸರಬರಾಜು ಯೋಜನೆಯಿಂದಲೇ ಈ ಗ್ರಾಮಗಳಿಗೆ ನೀರು ಸರಬರಾಜು ಆಗಬೇಕು.

ಅಲ್ಲಿಯೂ ಸಹ ನೀರಿನ ಕೊರತೆ ಉಂಟಾಗಿರುವುದರಿಂದ ಎರಡು, ಮೂರು ದಿನಗಳಿಗೊಮ್ಮೆ ಕಡಿಮೆ ಪ್ರಮಾಣದಲ್ಲಿ ನೀರು ಸರಬರಾಜು ಮಾಡಬೇಕಾದ ಕಷ್ಟದ ಪರಿಸ್ಥಿತಿ ನಿರ್ಮಾಣವಾಗಿದೆ’ ಎಂದು ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ ನೀಲಕಂಠ ತಿಳಿಸಿದರು.

ದೇವಾಲದಕೆರೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಣಾಲ್‌, ಅಚ್ಚನಹಳ್ಳಿ ಗ್ರಾಮಗಳಲ್ಲಿಯೂ ಕುಡಿಯುವ ನೀರಿನ ಸಮಸ್ಯೆ ತೀವ್ರವಾಗಿದೆ. ಸಮೀಪದಲ್ಲಿಯೇ ಸ್ವಜಲಧಾರೆ ಇದ್ದರೂ ಅನುದಾನದ ಕೊರತೆಯಿಂದಾಗಿ ಅಲ್ಲಿಂದ ಗ್ರಾಮಗಳಿಗೆ ನೀರು ಸರಬರಾಜು ಮಾಡಲು ಸಾಧ್ಯವಾಗಿಲ್ಲ.
-ಜಾನೇಕೆರೆ ಆರ್‌. ಪರಮೇಶ್‌