ಗಟಾರ ಸೇರಿದ ಕುಡಿಯವ ನೀರು

ರೋಣ: ಜನ ಜಾನುವಾರುಗಳಿಗೆ ಕುಡಿಯುವ ಉದ್ದೇಶದಿಂದ ಮಲಪ್ರಭಾ ಜಲಾಶಯದಿಂದ ಹರಿಸಿದ ನೀರು ಕೆರೆ ತುಂಬುವ ಬದಲಾಗಿ ಕಾಲುವೆಗೆ ಹರಿದು ವ್ಯರ್ಥವಾಯಿತು.
ಕಳೆದ 7ರಿಂದ ಪ್ರತಿದಿನ 200 ಕ್ಯೂಸೆಕ್‌ ನೀರನ್ನು ಕಾಲುವೆಗೆ ಹರಿ ಬಿಡಲಾಗಿತ್ತು. ಪಟ್ಟಣದ ಹೊಸ ಸಂತೆ ಬಜಾರ್ ಬಳಿಯ ಕೆರೆ ತುಂಬಿಸಲು ಶನಿವಾರ ಬೆಳಿಗ್ಗೆ ಸಿದ್ಧತೆ ನಡೆದಿತ್ತು. ಕಾಲುವೆ ನೀರು ದೊಡ್ಡ ಗಟಾರ ಮೂಲಕ ಕೆರೆ ಸೇರಬೇಕಿತ್ತು. ಅದಕ್ಕೆ ಪೂರಕವಾಗಿ ಕಾಲುವೆ ಸ್ವಚ್ಛಗೊಳಿಸಲು ಪುರಸಭೆ ಮುಖ್ಯಾಧಿಕಾರಿಗೆ ತಹಶೀಲ್ದಾರ್ ಶಿವಲಿಂಗ ಪ್ರಭುವಾಲಿ ಸೂಚನೆ ನೀಡಿದ್ದರು. ಆದರೆ ಪುರಸಭೆ ಸಿಬ್ಬಂದಿ ಯಾವುದೇ ಕ್ರಮ ಕೈಗೊಂಡಿಲ್ಲ. ಹೀಗಾಗಿ ಕೃಷ್ಣಾಪುರ ಬಳಿಯ ಕಾಲುವೆಯಿಂದ ನೀರು ಗಟಾರ ಸೇರಿ ವ್ಯರ್ಥವಾಯಿತು.