ಬೀದಿ ಬದಿ ಸಾಂಪ್ರದಾಯಿಕ ಖಾದ್ಯ

‘ಗ್ರಾಹಕರನ್ನು ಪ್ರೀತಿಯಿಂದ ಮಾತನಾಡಿಸುತ್ತೇವೆ. ಆದಷ್ಟು ತ್ವರಿತವಾಗಿ ಅವರು ಕೇಳಿದ್ದು ನೀಡುವ ಪ್ರಯತ್ನ ಮಾಡುತ್ತೇವೆ. ಇದರಿಂದ ನಮ್ಮನ್ನು ಗ್ರಾಹಕರು ಹುಡುಕಿಕೊಂಡು ಬರುತ್ತಾರೆ’ ಎಂಬುದು ಆಶಾ ಅವರ ಹೆಮ್ಮೆಯ ಮಾತು.

ಸಂಜೆ 6.30ರಿಂದ ರಾತ್ರಿ 10.30ರವರೆಗೆ ವ್ಯಾಪಾರ ಮಾಡುವ ಆಶಾ ಅವರಿಗೆ ಇಲ್ಲಿಯವರೆಗೆ ಯಾವ ಅಹಿತಕರ  ಅನುಭವವಾಗಿಲ್ಲವಂತೆ. ‘ಇಲ್ಲಿಯವರೆಗೆ ಯಾವ ಅಧಿಕಾರಿಗಳೂ, ಪೊಲೀಸರೂ ನಮಗೆ ಕಿರುಕುಳ ನೀಡಿಲ್ಲ. ಬಡವರ ಮೇಲೆ ಕರುಣೆಯುಳ್ಳವರೂ ಈಗಲೂ ಇದ್ದಾರೆ ಸಾರ್’ ಎದು ನಗುತ್ತಾರೆ ಅವರು.

ಆಶಾ ದಂಪತಿಗೆ ಅವರ ಹತ್ತಿರದ ಸಂಬಂಧಿಗಳಾದ ಲಕ್ಷ್ಮೀ ಮತ್ತು  ಶ್ರೀನಿವಾಸ್ ನೆರವಾಗುತ್ತಾರೆ. ವಿಶೇಷ ವಾಗಿ ಶನಿವಾರ ಮತ್ತು ಭಾನುವಾರಗಳಂದು ಗ್ರಾಹಕರ ಒತ್ತಡ ಹೆಚ್ಚಿದ್ದಾಗ ಅವರ ನೆರವು ಬೇಕೇ ಬೇಕು. ಇಬ್ಬರೇ ಅಷ್ಟು ಗ್ರಾಹಕರನ್ನು ನಿಭಾಯಿಸಲು ಆಗುವುದಿಲ್ಲ’ ಎಂಬುದು ರಾಜಗೋಪಾಲ್ ಮಾತು.

ಬೀದಿ ಬದಿ ವ್ಯಾಪಾರಿಗಳ ಊಟ ಉಪಾಹಾರಗಳು ಶುಚಿಯಾಗಿರುವುದಿಲ್ಲ ಎಂಬುದು ಗ್ರಾಹಕರ ಸಾಮಾನ್ಯ ದೂರು. ಹಾಗಾಗಿ ಇವರು ಶುಚಿತ್ವಕ್ಕೆ ಮಹತ್ವ ನೀಡುತ್ತಾರೆ.

‘ಗುಣಮಟ್ಟದ ಎಣ್ಣೆ, ದಿನಸಿಗಳನ್ನೇ ಅಡುಗೆಗೆ ಬಳಸುತ್ತೇವೆ. ಇದರಿಂದ ಸಹಜವಾಗಿಯೇ ನಾವು ಮಾಡುವ ತಿನಿಸುಗಳ ರುಚಿ ಹೆಚ್ಚುತ್ತದೆ’ ಎಂದು ವಿವರಿಸುತ್ತಾರೆ ಈ ದಂಪತಿ.

‘ವರ್ಷದ ಹಿಂದೆ ಸಂಸಾರ ನಡೆಸಲು ಕಷ್ಟದ ಸ್ಥಿತಿ ಇತ್ತು. ತಳ್ಳುಗಾಡಿಯಿಂದ ನಮ್ಮ ಜೀವನ ಸುಧಾರಿಸಿದೆ’ ಎಂದು ನೆಮ್ಮದಿಯ ನಗೆ ಬೀರುತ್ತಾರೆ ಆಶಾ ಮತ್ತು ರಾಜಗೋಪಾಲ್.