ಸಂಭ್ರಮದ ಮಡೆ, ತಂಪು ಉತ್ಸವ

ಇಡೀ ಬೀದಿ ಮಡೆ ಉತ್ಸವದ ಹಿನ್ನೆಲೆಯಲ್ಲಿ ಜನಜಂಗುಳಿಯಿಂದ ಕೂಡಿತ್ತು. ದೇವಾಲಯದಲ್ಲಿ ವಿಶೇಷ ಕಳಸಪೂಜೆ ಸಲ್ಲಿಸಿದ ನಂತರ ಪೂಜಾರಿಗಳಾದ ಶೇಖರ್‌ ಮತ್ತು ದಶರಥ ಅವರು ಮನೆಗಳ ಬಾಗಿಲಲ್ಲಿ ಮಡೆ ತಯಾರಿಸಿದ ಸ್ಥಳಕ್ಕೆ ಬಂದು ಮಡೆ ಪ್ರಸಾದವನ್ನು ಆಗಸಕ್ಕೆಸೆಯುವ ಮೂಲಕ ಭಕ್ತರ ಗಮನ ಸೆಳೆದರು.

ಬೀದಿಯಲ್ಲಿ ಮಹಿಳೆಯರು, ಮಕ್ಕಳು ಪುರುಷರು ಈ ದೃಶ್ಯವನ್ನು ಕಣ್ತುಂಬಿಕೊಳ್ಳಲು ಕಿಕ್ಕಿರಿದು ನೆರೆದು ಜೋರಾದ ಘೋಷಣೆಗಳನ್ನು ಕೂಗುವ ಮೂಲಕ ಪೂಜಾರಿಗಳು ಆವೇಶಭರಿತರಾಗಿ ಮಾಡುವ ದೃಶ್ಯ ಸೇರಿದ್ದ ಜನರಲ್ಲಿ ಮೈನವಿರೇಳಿಸಿತು.

ಪಾಳ್ಯ, ಮುಡಿಗುಂಡ, ಸತ್ತೇಗಾಲ, ಕುಣಗಳ್ಳಿ, ಚಾಮರಾಜನಗರ, ಯಳಂದೂರು  ಸೇರಿದಂತೆ ಇತರೆಡೆಗಳಿಂದ ನೆಂಟರಿಷ್ಟರು ಮಡೆ ಉತ್ಸವದಲ್ಲಿ ಪಾಲ್ಗೊಂಡು ಪೂಜೆ ಸಲ್ಲಿಸಿದರು. ಜಿಲ್ಲಾ ಪಂಚಾಯಿತಿ ಮಾಜಿ ಸದಸ್ಯ ಕೊಪ್ಪಾಳಿ ಮಹದೇವ ನಾಯಕ ನಗರಸಭಾ ಸದಸ್ಯ ಸುರೇಶ್‌, ಮುಖಂಡರಾದ ಸುಂದರ್‌, ಬಸವಣ್ಣ, ಗೋವಿಂದರಾಜು, ನಾಯಕ ಸಮುದಾಯದ ಮುಖಂಡರು  ಭಾಗವಹಿಸಿದ್ದರು.