ಬೇಸಿಗೆಯಲ್ಲಿ ಗೃಹಿಣಿಯರಿಗೆ ಹಪ್ಪಳ ಮಾಡಿ ಶೇಖರಿಸಿಟ್ಟುಕೊಳ್ಳುವ ಅಭ್ಯಾಸ. ಹಪ್ಪಳ, ಸಂಡಿಗೆ ಇದ್ದರೆ ಊಟದ ರುಚಿಯೂ ಹೆಚ್ಚುತ್ತದೆ. ಹಲವು ಬಗೆಯ ಹಪ್ಪಳ, ಫೇಣಿ ಮಾಡುವ ವಿಧಾನ ಇಲ್ಲಿದೆ.
ಅಕ್ಕಿ ಹಪ್ಪಳ
ಬೇಕಾಗುವ ಸಾಮಗ್ರಿಗಳು: ಅರ್ಧ ಕೆ.ಜಿ. ದೋಸೆ ಅಕ್ಕಿ, ರುಬ್ಬಿದ ಹಸಿಮೆಣಸಿನಕಾಯಿ, ಉಪ್ಪು.
ಮಾಡುವ ವಿಧಾನ: ಅಕ್ಕಿಯನ್ನು ಒಂದು ದಿನ ನೆನೆಯಲು ಇಡಿ, ಮರುದಿನ ಇದಕ್ಕೆ ಹಸಿ ಮೆಣಸಿನಕಾಯಿ, ಉಪ್ಪು ಸೇರಿಸಿ ರುಬ್ಬಿ ಮುದ್ದೆ ಮಾಡಿಕೊಳ್ಳಿ. ನಂತರ ದಪ್ಪ ದಪ್ಪ ಉಂಡೆ ಮಾಡಿ ಇನ್ನೊಮ್ಮೆ ಕುಕ್ಕರಿನಲ್ಲಿ ಇಡ್ಲಿಯಂತೆ ಹತ್ತು ನಿಮಿಷ ಬೇಯಿಸಿ ತೆಗೆದು ಚೆನ್ನಾಗಿ ನಾದಿ, ಉಂಡೆಮಾಡಿ ಹಪ್ಪಳಗಳನ್ನು ಲಟ್ಟಿಸಿ ಬಿಸಿಲಿನಲ್ಲಿ ಒಣಗಿಸಿ. ಈ ಹಿಟ್ಟಿಗೆ ಈರುಳ್ಳಿ ರಸ, ಟೊಮೆಟೊ ರಸ ಸೇರಿಸಿ ಬೇರೆ ಬೇರೆ ಪರಿಮಳದ ಹಪ್ಪಳಗಳನ್ನು ಸಹ ಮಾಡಬಹುದು.