ಬಂತು ಬೂದುಬಕ, ಪುಟಾಣಿಗಳಿಗೆ ತವಕ

ಬೆಂಗಳೂರು ಮತ್ತು ಸುತ್ತಮುತ್ತಲ ಅನೇಕ ಕೆರೆಗಳಲ್ಲಿ ವಲಸೆ ಹಕ್ಕಿಗಳು ಕಾಣಿಸಿಕೊಳ್ಳುವುದು ಸಹಜ ವಿದ್ಯಮಾನ. ಹೊಸಕೋಟೆ ರಸ್ತೆ ಸಮೀಪದ ಸುಂದರ ಕೆರೆಯು ನೂರಕ್ಕೂ ಹೆಚ್ಚಿನ ವಿಭಿನ್ನ ಬಗೆಯ ವಲಸೆ ಹಕ್ಕಿಗಳಿಗೆ ಆಕರ್ಷಣೆಯ ತಾಣವಾಗಿದೆ.

 

ಈ ಚಿತ್ರ ತೆಗೆದವರ ಹೆಸರು ಪ್ರೇಮಾ ಕಾಕಡೆ. ಏಪ್ರಿಲ್ ತಿಂಗಳ ಆರಂಭದಲ್ಲಿ ಮುಂಜಾನೆ ಸೂರ್ಯನ ಹೊಂಗಿರಣಗಳು  ನೀರಿನ ಅಲೆಗಳನ್ನು ಸವರುತ್ತಾ ಮೇಲೇಳುತ್ತಿತ್ತು. ‘ಬೂದು ಮಂಗಟ್ಟೆ’ (Garganey) ಮತ್ತು  ಉದ್ದಗುಲಾಬಿ ಕಾಲಿನ ‘ಮೆಟ್ಟುಗಾಲು’ (Black Winged  Stilt)  ಎಂಬ  ಎರಡು ಜಾತಿಯ ವಲಸೆ ಪಕ್ಷಿಗಳು ಆಹಾರ ಅರಸುತ್ತಿದ್ದವು. ಈ ಪಕ್ಷಿಗಳ ಸಾಲಿನ ಮಧ್ಯೆಯೇ ಮೂರು ಅಡಿ ಎತ್ತರದ  ‘ಬೂದುಬಕವೊಂದು (Grey Heron)  ಮೀನಿನ ಹುಡುಕಾಟಕ್ಕೆಂದು ರಭಸದಿಂದ ಬಂದಿಳಿಯಿತು. ಆ ಕ್ಷಣ ಅಲ್ಲಿದ್ದ ಐದೂ ಸಣ್ಣ ಹಕ್ಕಿಗಳು ಆತಂಕದಿಂದ ನಡುಗಿದವು.
 

ತಮ್ಮ ಮನೆಯ ಹಿತ್ತಲಿನಲ್ಲಿ ಗಿಡ ಮರಗಳನ್ನು ಬೆಳೆಸಿ, ನೀರಿನ  ಅನುಕೂಲತೆ ಮಾಡಿದ್ದಾರೆ ಪ್ರೇಮಾ.  ಕೇವಲ ಫೋಟೊ ತೆಗೆಯಲು ಮಾತ್ರ ಇವರ ಪಕ್ಷಿ ಪ್ರೇಮ ಸೀಮಿತವಾಗಿಲ್ಲ.  ಚಿತ್ರಕಲೆಯಲ್ಲೂ ಪ್ರಾವೀಣ್ಯತೆ ಇದೆ. ಕಳೆದ ಆರು ವರ್ಷಗಳಿಂದ ಪ್ರವಾಸ ಹಾಗೂ ಛಾಯಾಗ್ರಹಣದ ಹವ್ಯಾಸ ಬೆಳೆಸಿಕೊಂಡಿದ್ದಾರೆ. ವನ್ಯಜೀವಿ ಹಾಗೂ ಲ್ಯಾಂಡ್‌ಸ್ಕೇಪ್ ಫೋಟೋಗ್ರಫಿ  ಅವರ ಆಸಕ್ತಿಯ ಕ್ಷೇತ್ರ.