ಬೆಂಗಳೂರು: ದೇಶದ ಮೂರನೇ ಅತಿದೊಡ್ಡ ಸಾಫ್ಟ್ವೇರ್ ಸೇವಾ ಸಂಸ್ಥೆಯಾಗಿರುವ ವಿಪ್ರೊ, ನಾಲ್ಕನೆ ತ್ರೈಮಾಸಿಕದಲ್ಲಿ ₹ 2,267 ಕೋಟಿಗಳಷ್ಟು ನಿವ್ವಳ ಲಾಭ ಗಳಿಸಿದೆ.
ಈ ಅವಧಿಯಲ್ಲಿ ಸಂಸ್ಥೆಯ ಒಟ್ಟು ವರಮಾನವು ₹ 15,033 ಕೋಟಿಗಳಷ್ಟಾಗಿದೆ. ವರ್ಷದ ಹಿಂದೆ ಸಂಸ್ಥೆಯ ಒಟ್ಟು ವರಮಾನವು ₹ 14,312 ಕೋಟಿ ಮತ್ತು ನಿವ್ವಳ ಲಾಭವು ₹ 2,257 ಕೋಟಿಗಳಷ್ಟಿತ್ತು.
ಬೋನಸ್ ಷೇರು: ಎರಡು ತಿಂಗಳಲ್ಲಿ ಬೋನಸ್ ಷೇರು ವಿತರಿಸುವುದಾಗಿ ಸಂಸ್ಥೆಯ ಸಿಇಒ ಅಬಿದಾಲಿ ನಿಮೂಚ್ವಾಲಾ ಅವರು ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಷೇರುದಾರರಿಗೆ ಹೆಚ್ಚಿನ ಲಾಭ ಮರಳಿಸಲು ಇನ್ಫೊಸಿಸ್ ಮತ್ತು ಟಿಸಿಎಸ್ ಸಂಸ್ಥೆಗಳು ಷೇರು ಮರು ಖರೀದಿಗೆ ಮುಂದಾಗಿರುವುದರಿಂದ ಸಂಸ್ಥೆ ಈ ನಿರ್ಧಾರಕ್ಕೆ ಬಂದಿದೆ.
ಷೇರುದಾರರು ಹೊಂದಿರುವ ಪ್ರತಿ ಒಂದು ಷೇರಿಗೆ ಒಂದು ಬೋನಸ್ ಷೇರು ವಿತರಿಸಲು ನಿರ್ಧರಿಸಿದೆ.
ಸಣ್ಣ ಹೂಡಿಕೆದಾರರ ಪಾಲ್ಗೊಳ್ಳುವಿಕೆ ಉತ್ತೇಜಿಸಲು, ನಗದುತನ ಮತ್ತು ಚಿಲ್ಲರೆ ಹೂಡಿಕೆದಾರರ ಸಂಖ್ಯೆ ಹೆಚ್ಚಿಸಲು ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಸಂಸ್ಥೆ ತಿಳಿಸಿದೆ.
ಹಿಂದಿನ ಹಣಕಾಸು ವರ್ಷಕ್ಕೆ ಹೋಲಿಸಿದರೆ, ಈ ಮಾರ್ಚ್ ಅಂತ್ಯಕ್ಕೆ ಸಂಸ್ಥೆಯ ಲಾಭವು ₹ 2,518 ಕೋಟಿಗಳಷ್ಟಿದ್ದು, ಶೇ 5ರಷ್ಟು ಕಡಿಮೆಯಾಗಿದೆ. ಒಟ್ಟು ವರಮಾನವು ₹ 57,995 ಕೋಟಿಗಳಷ್ಟಾಗಿ ₹ ಶೇ 7.4ರಷ್ಟು ಏರಿಕೆ ದಾಖಲಿಸಿದೆ.