ಬೆಂಗಳೂರು: ದೇಶದ ಪ್ರಮುಖ ಜೈವಿಕ ತಂತ್ರಜ್ಞಾನ ಸಂಸ್ಥೆಯಾಗಿರುವ ಬಯೊಕಾನ್, ನಾಲ್ಕನೇ ತ್ರೈಮಾಸಿಕದಲ್ಲಿ ₹ 127 ಕೋಟಿಗಳಷ್ಟು ನಿವ್ವಳ ಲಾಭ ಗಳಿಸಿದೆ.
ವರ್ಷದ ಹಿಂದೆ ಇದೇ ಅವಧಿಯಲ್ಲಿನ ₹ 333 ಕೋಟಿಗೆ ಹೋಲಿಸಿದರೆ ಈ ಬಾರಿಯ ಲಾಭದ ಪ್ರಮಾಣ ಶೇ 62ರಷ್ಟು ಕಡಿಮೆಯಾಗಿದೆ. ವರಮಾನವೂ ಕೂಡ ಮೂರನೇ ತ್ರೈಮಾಸಿಕದಲ್ಲಿನ ₹ 1,092 ಕೋಟಿಗೆ ಹೋಲಿಸಿದರೆ ಶೇ 11ರಷ್ಟು (₹ 974 ಕೋಟಿ) ಇಳಿಕೆಯಾಗಿದೆ.
‘2016–17ನೆ ಹಣಕಾಸು ವರ್ಷದಲ್ಲಿ ಸಂಸ್ಥೆಯ ವರಮಾನವು ಶೇ 18ರಷ್ಟು ಏರಿಕೆ ಕಂಡಿದೆ’ ಎಂದು ಸಂಸ್ಥೆಯ ಅಧ್ಯಕ್ಷೆ ಕಿರಣ್ ಮಜುಂದಾರ್ ಷಾ ಹೇಳಿದ್ದಾರೆ.
ಬೋನಸ್ ಷೇರು: ₹ 5 ಮುಖಬೆಲೆಯ ಪ್ರತಿ ಎರಡು ಷೇರುಗಳಿಗೆ ಒಂದು ಬೋನಸ್ ಷೇರು (2:1) ವಿತರಿಸಲು ಸಂಸ್ಥೆಯ ನಿರ್ದೇಶಕ ಮಂಡಳಿ ಶಿಫಾರಸು ಮಾಡಿದೆ. ಗುರುವಾರದ ವಹಿವಾಟಿನಲ್ಲಿ ಸಂಸ್ಥೆಯ ಷೇರಿನ ಬೆಲೆ ₹ 1,119.60 ರಷ್ಟಿತ್ತು.