ನವದೆಹಲಿ: ದೇಶದ ಷೇರುಪೇಟೆಗಳಲ್ಲಿ ಸದ್ಯ ಗೂಳಿ ಓಟ ಜೋರಾಗಿದೆ, ಸೂಚ್ಯಂಕಗಳು ಏರುಮುಖ ಚಲನೆಯಲ್ಲಿವೆ. ಹೀಗಿದ್ದರೂ ಗರಿಷ್ಠ ಮಟ್ಟವನ್ನು ಕಾಯ್ದುಕೊಳ್ಳುವಲ್ಲಿ ವಿಫಲವಾಗಿವೆ.
ಸಕಾರಾತ್ಮಕ ಮಟ್ಟದಲ್ಲಿ ವಾರದ ವಹಿವಾಟು ಆರಂಭವಾಯಿತು. ಬುಧವಾರ ಮುಂಬೈ ಷೇರುಪೇಟೆ ಸೂಚ್ಯಂಕ (ಬಿಎಸ್ಇ) 30,133 ಅಂಶ ಮತ್ತು ರಾಷ್ಟ್ರೀಯ ಷೇರುಪೇಟೆ ಸೂಚ್ಯಂಕ(ಎನ್ಎಸ್ಇ) ನಿಫ್ಟಿ 9,352 ಅಂಶಗಳಿಗೆ ಏರಿಕೆ ಕಂಡು,ಹೊಸ ದಾಖಲೆ ಬರೆದವು. ಆದರೆ, ಮಾರಾಟದ ಒತ್ತಡಕ್ಕೆ ಒಳಗಾಗಿ ಗುರುವಾರ ಮತ್ತು ಶುಕ್ರವಾರ ಸೂಚ್ಯಂಕಗಳು ಗರಿಷ್ಠ ಮಟ್ಟದಿಂದ ಇಳಿಕೆ ಕಂಡವು.
ವಾರದ ವಹಿವಾಟಿನ ಅಂತ್ಯದಲ್ಲಿ ಬಿಎಸ್ಇ 30 ಸಾವಿರದ ಗರಿಷ್ಠ ಮಟ್ಟವನ್ನು ಕಾಯ್ದುಕೊಳ್ಳುವಲ್ಲಿ ವಿಫಲವಾಗಿದೆ. ಒಟ್ಟಾರೆ 553 ಅಂಶಗಳ ಏರಿಕೆ ಕಂಡು, 29,918 ಅಂಶಗಲ್ಲಿ ವಹಿವಾಟು ಅಂತ್ಯವಾಗಿದೆ.