ಸ್ವಚ್ಛತೆಯಲ್ಲಿ ನಾವೀಗ 152ನೇ ನಗರ!

ತುಮಕೂರು: ದೇಶದ ಸ್ವಚ್ಛ ನಗರದ ಪೈಕಿ ನಗರ 152ನೇ ಸ್ಥಾನ ಪಡೆದಿದೆ. ‘ಸ್ಮಾರ್ಟ್ ಸಿಟಿ’ ಕನಸಿನಲ್ಲಿ ತೇಲುತ್ತಿರುವ ನಗರ ಮೊದಲ 100ರ ಪಟ್ಟಿಯಲ್ಲೂ ಇಲ್ಲದಿರುವುದು ನಾಗರಿಕರಿಗೆ ಬೇಸರ ತರಿಸಿದೆ.

ನಗರದಲ್ಲಿ ಕಸ ವಿಲೇವಾರಿ, ವೈಯಕ್ತಿಕ ಶೌಚಾಲಯಗಳ ಬಳಕೆ, ಸಮುದಾಯ ಶೌಚಾಲಯಗಳ ಲಭ್ಯತೆ, ಪರಿಸರ ಕುರಿತ ಜನರ ನಡವಳಿಕೆ, ಪಾಲಿಕೆಯ ಕಾರ್ಯಕ್ರಮಗಳ ಬಗ್ಗೆ ಜನರ ಅಭಿಪ್ರಾಯ, ಕಸ ಸಂಗ್ರಹಣೆ, ಕಸ ವಿಲೇವಾರಿ, ಕೇಂದ್ರ ಸರ್ಕಾರದ  ಅಧಿಕಾರಿಗಳ ವೀಕ್ಷಣೆ ಮುಂತಾದ ಮಾನದಂಡಗಳನ್ನು ಅನುಸರಿಸಿ ಈ ರ್‌್ಯಾಂಕಿಂಗ್‌  ಪ್ರಕಟಿಸಲಾಗಿದೆ.

ರಾಜ್ಯದ ನಗರಗಳನ್ನು ಗಣನೆಗೆ ತೆಗೆದುಕೊಂಡಾಗ 6ನೇ ಸ್ಥಾನ ಪಡೆದರೂ ಜನರಲ್ಲಿ ಒಡಕಿನ ಅಭಿಪ್ರಾಯ ಕೇಳಿ ಬಂದಿದೆ. ಬಹಳಷ್ಟು ಮಂದಿ ಈ ಆಯ್ಕೆಯ ಬಗ್ಗೆಯೇ ಭಿನ್ನರಾಗ ಹೊರಡಿಸಿದ್ದಾರೆ. ಮತ್ತೊಂದಿಷ್ಟು ಮಂದಿ ಸಂಭ್ರಮ ವ್ಯಕ್ತಪಡಿಸಿದ್ದಾರೆ.

‘ನಗರದಲ್ಲಿ ಪ್ಲಾಸ್ಟಿಕ್‌ ನಿಷೇಧ  ಕಟ್ಟುನಿಟ್ಟಾಗಿ ಜಾರಿಯಾಗಿಲ್ಲ.  ಪ್ರತಿ ಬಡಾವಣೆಯ ಮೂಲೆ ಮೂಲೆಗಳಲ್ಲಿ ಕಸಕ್ಕೆ ಬೆಂಕಿ ಹಾಕುವ ಕೆಲಸ ನಿರಂತರ ನಡೆಯುತ್ತಿದೆ. ಎಲ್ಲ ರಸ್ತೆಗಳಲ್ಲೂ ಕಸದ ರಾಶಿ ಬಿದ್ದಿರುತ್ತದೆ. ಪಾಲಿಕೆ ಸ್ವಲ್ಪ ಮುತುವರ್ಜಿಯಿಂದ ಕೆಲಸ ಮಾಡಿದ್ದರೆ ಇನ್ನೂ ಒಳ್ಳೆಯ ಸ್ಥಾನ ಪಡೆಯಬಹುದಿತ್ತು’ ಎಂಬ ಮಾತುಗಳು ಕೇಳಿ ಬಂದಿವೆ.

‘ಇದ್ದುದ್ದರಲ್ಲಿ ಸಮಾಧಾನದ ಸ್ಥಾನದ ಗರಿಮೆ ಸಿಕ್ಕರೂ ನಗರದ ಜನರು ಸ್ವಚ್ಛತೆ ಬಗ್ಗೆ, ಸ್ವಚ್ಛ ಪರಿಸರದ ಬಗ್ಗೆ ಎತ್ತಿರುವ ಸಂದೇಹಗಳಿಗೆ, ಅನುಮಾನಗಳಿಗೆ ಪಾಲಿಕೆ ಉತ್ತರ ನೀಡಬೇಕಾಗಿದೆ’ ಎನ್ನುತ್ತಾರೆ ಡಿವೈಎಫ್‌ಐ ಜಿಲ್ಲಾ ಘಟಕದ ಕಾರ್ಯದರ್ಶಿ ಎಸ್.ರಾಘವೇಂದ್ರ.

ನಗರದಲ್ಲಿ 73 ಸಾವಿರ ಮನೆಗಳಿದ್ದು, 3 ಸಾವಿರ ಮನೆಗಳಿಗೆ ಶೌಚಾಯಲ ಇಲ್ಲ. ನಗರ ಇನ್ನೂ ಬಯಲು ಶೌಚ ಮುಕ್ತ ನಗರವಾಗಲು ಸಾಧ್ಯವಾಗಿಲ್ಲ.  ಪರಿಸರ ಕಾಳಜಿ ಕುರಿತು ಮೂಡಿಸಿರುವ ಜಾಗೃತಿ ಅಭಿಯಾನ, ಕಾರ್ಯಕ್ರಮಗಳು ಜನರ ನಡವಳಿಕೆಯಲ್ಲಿ, ಚಿಂತನೆಯಲ್ಲಿ ಗಮನಾರ್ಹ ಬದಲಾವಣೆ ತಂದಿಲ್ಲ, ಈ ವಿಷಯದಲ್ಲಿ ಮೈಸೂರು ನಮಗಿಂತಲೂ ಮುಂದೆ ಇದೆ. ಈ  ಅಂಶದ ಬಗ್ಗೆಯೂ ಪಾಲಿಕೆ ಹೆಚ್ಚು ಗಮನ ಹರಿಸಬೇಕು ಎನ್ನುತ್ತಾರೆ ಪರಿಸರ ತಜ್ಞರು.