ಬರದ ಬೇಲಿ ದಾಟಿಸಿದ ಬೇಲ!

ಅವಿಶ್ರಾಂತ ದುಡಿಮೆ ಮತ್ತು ಹಾಸ್ಯಪ್ರಜ್ಞೆ ಅವರ ಟ್ರೇಡ್‌ಮಾರ್ಕ್. ಎಂ.ಎ ಕನ್ನಡ ಓದಿ, ಫೇಲಾಗಿರುವ ಅವರು, ಈಗ ಜಿಲ್ಲೆಯಲ್ಲಿ ಬಸವಳಿದ ರೈತರ ನಡುವೆ ಭಿನ್ನವಾಗಿ ಕಾಣುವುದೂ ಇದೇ ಕಾರಣಕ್ಕೆ.

ಮನೆಯ ಐವರು ಸದಸ್ಯರು ಮತ್ತು ಇಬ್ಬರು ಕೂಲಿಗಳ ನೆರವಿನಿಂದ ಅವರು ಬೇಲದ ತಿರುಳನ್ನು ತೆಗೆದು ಮೌಲ್ಯವರ್ಧನ ಮಾಡಿ ಮಾರಾಟ ಮಾಡುತ್ತಿದ್ದಾರೆ. ಬೇಲದ ಹಣ್ಣನ್ನು ಕೈಯಲ್ಲಿ ಒಡೆದು, ಚಮಚದಲ್ಲಿ ತಿರುಳನ್ನು ತೆಗೆದು, ಬೀಜಗಳ ಸಮೇತ ಮಿಕ್ಸಿಗೆ ಹಾಕಿ ರುಬ್ಬುತ್ತಾರೆ. ನಂತರ ಬೆಲ್ಲ, ಜಾಕಾಯಿ, ಶುಂಠಿ, ಏಲಕ್ಕಿಯನ್ನು ಸ್ವಾದಕ್ಕೆ ಹಾಕುತ್ತಾರೆ. ಯಾವುದೇ ರಕ್ಷಕಗಳನ್ನು ಬಳಸುವುದಿಲ್ಲ. ಇದೇ ಮೌಲ್ಯವರ್ಧನ ಪ್ರಕ್ರಿಯೆ.

ಮೊದಲು ಮೇಳಗಳಿಗೆ, ಕೃಷಿ, ತೋಟಗಾರಿಕೆ ಇಲಾಖೆ ಕಾರ್ಯಕ್ರಮಗಳಿಗೆ, ಮರ ಕೃಷಿ ಕುರಿತ ಕಾರ್ಯಕ್ರಮಗಳಿಗೆ ಸಂಪನ್ಮೂಲ ವ್ಯಕ್ತಿಯಾಗಿ ಹೋಗುವಾಗ ಹಣ್ಣುಗಳನ್ನು ಕೊಂಡೊಯ್ದು ಮಾರಿಕೊಂಡು ಬರುತ್ತಿದ್ದರು. ಈಗ ಚೀಲ ಬಿಟ್ಟಿದ್ದಾರೆ. ‘ಗ್ರಾಹಕ ರೈತರ ಮಿಲನ’ ವೇದಿಕೆ ಅಡಿ ಬೆಂಗಳೂರಿನ ಎರಡು ಕಡೆ ಅವರ ಬೇಲಕ್ಕೆ ಉತ್ತಮ ಬೇಡಿಕೆ ಇದೆ. ತೀರ್ಥಹಳ್ಳಿಯ ಸಾವಯವ ಮಹಾಮಂಡಳ ಅವರಿಗೆ ನೆರವಾಗಿದೆ.

‘ಸವುಳು ಮತ್ತು ಕರ್ಲು ಭೂಮಿ ನನ್ನ ಮುಂದಿರುವ ಏಕೈಕ ಆಯ್ಕೆ. ಅದರಲ್ಲೇ ನಾನು ಜೀವನ ಕಟ್ಟಿಕೊಂಡಿದ್ದೀನಿ. ಜಿಲ್ಲೆಯಲ್ಲಿ ಈ ವರ್ಷ ತೊಂಬತ್ತು ಪರ್ಸೆಂಟ್‌ ಬರಗಾಲ. ನನಗೆ ಬರಗಾಲವೇ ಇಲ್ಲ. ಈ ವರ್ಷ ಬೇಲದ ಹಣ್ಣು ಮಾರಿದ್ದರಿಂದಲೇ ಒಂದೂವರೆ ಲಕ್ಷ ರೂಪಾಯಿ ಆದಾಯ ಬಂದಿದೆ’ ಎಂಬುದು ಅವರ ಆತ್ಮವಿಶ್ವಾಸದ ನುಡಿ.

‘ಬೆಟ್ಟದಾ ಮೇಲೆ ಹುಟ್ಟಿದ ವೃಕ್ಷಕ್ಕೆ ಕಟ್ಟೆಯ ಕಟ್ಟಿ ನೀರೆರೆದವರಾರು? ತೋಟ ಎಂದರೆ ನೀರು ಬೇಕೇ ಬೇಕು ಅಂತೇನಿದೆ? ಅರಣ್ಯ ಇಲಾಖೆಯವರು ಗಿಡ ಸಿದ್ಧಪಡಿಸಿಟ್ಟುಕೊಂಡಿರುತ್ತಾರೆ. ಮಳೆ ಬರುತ್ತಲೇ ಗುಣಿಗಳಲ್ಲಿ ನೆಟ್ಟುಬಿಡುತ್ತಾರೆ. ಅವು ಹೇಗೆ ಬೆಳೆಯುತ್ತವೆ? ಈ ತಂತ್ರ ರೈತರಿಗೆ ಯಾಕೆ ಬರುವಲ್ದು? ಈಗ ಹೊಸ ತೋಟವನ್ನು ನನ್ನ ತಮ್ಮನ ಹೊಲದಲ್ಲಿ ಮಾಡ್ತಿದ್ದೀನಿ. ‘ಜೀವನ ವನ’ ಅದರ ಹೆಸರು. ಹೊಲದಿಂದ ರೈತ ಹೇಗೆ ಉಳಿಯಬಹುದು ಎಂದು ತೋರಿಸಲೆಂದೇ ಮಾಡ್ತಿದ್ದೀನಿ’ ಎಂದು ನಕ್ಕರು.

1 ಮರದಿಂದ 10 ಸಾವಿರ ರೂಪಾಯಿ ಲಾಭ!
ಸಜ್ಜನ ಅವರ ತೋಟದ ಪ್ರತಿ ಬೇಲದ ಮರವೂ ಒಮ್ಮೆ ಉದುರಿಸುವ ಹಣ್ಣುಗಳಿಂದ (ಅವರು ಮರದಿಂದ ಬಿದ್ದ ಹಣ್ಣನ್ನಷ್ಟೇ ಬಳಸುತ್ತಾರೆ) ಕನಿಷ್ಠ 10 ಸಾವಿರ ರೂಪಾಯಿ ಲಾಭವಿದೆ. ಪ್ರತಿ ಮರದಿಂದ ಎರಡು ಕ್ವಿಂಟಲ್‌ ಹಣ್ಣು ಸಿಗುತ್ತದೆ. ಅದರಿಂದ ಒಂದು ಕ್ವಿಂಟಲ್‌ ತಿರುಳು. ಅದಕ್ಕೆ ಒಂದೂ ಕಾಲು ಕ್ವಿಂಟಲ್‌ ಬೆಲ್ಲ ಸೇರ್ಪಡೆಯಾಗುತ್ತದೆ. 300 ಗ್ರಾಂ ತಿರುಳಿನ ಬಾಟಲಿಗೆ ಅವರು ಇಟ್ಟಿರುವ ದರ 100 ರೂಪಾಯಿ. ಬೆಂಗಳೂರಿನಿಂದ ತರುವ ಖಾಲಿ ಬಾಟಲಿ ಬೆಲೆ 16 ರೂಪಾಯಿ.

‘ಶಿವರಾತ್ರಿಯಿಂದ ಹಿಡಿದು ಶ್ರಾವಣದವರೆಗೆ ಹಣ್ಣು ಬಿಡುತ್ತವೆ. ತಿರುಳನ್ನು ತೆಗೆದು ಒಣಗಿಸಿಟ್ಟುಕೊಳ್ಳುತ್ತೇವೆ. ಬೇಕೆಂದಾಗ ಅದನ್ನು ತೆಗೆದು ಜ್ಯೂಸ್‌ ಮಾಡಿ ಮಾರುತ್ತೇವೆ. ಹೀಗಾಗಿ ಎಲ್ಲ ಕಾಲದಲ್ಲೂ ಬೇಲ ನಮಗೆ ಆದಾಯದ ಮೂಲವಾಗಿದೆ’ ಎನ್ನುತ್ತಾರೆ ಸಜ್ಜನ. ಅವರ ಜ್ಯೂಸ್‌ ಅಂಗಡಿಯಲ್ಲಿ ಸಿರಿಧಾನ್ಯಗಳೂ ದೊರಕುತ್ತವೆ. ಮುಂದೆ, ಸಾವಯವ ಹೋಟೆಲ್‌ ಮಾಡಲು ನಿರ್ಧರಿಸಿದ್ದಾರೆ.

ಕ್ಯೂಬಾದ ಮಾದರಿ ಬೇಕು...
‘ಶೂನ್ಯ ಕೃಷಿ ಬಂಡವಾಳದ ಸೂತ್ರವನ್ನು ರೈತರು ಅನುಸರಿಸಬೇಕು. ಕ್ಯೂಬಾ ದೇಶ ಇದನ್ನೆಲ್ಲ ಮಾಡಿತು. ನಮಗೆ ಮಾತ್ರ ಹಸಿರು ಕ್ರಾಂತಿ ಬೇಕಾಯಿತು. ಆದರೆ ಅದರಿಂದಲೂ ತೊಂದರೆ ಆಯಿತು. ಫಿಡೆಲ್‌ ಕ್ಯಾಸ್ಟ್ರೋ ಅಜ್ಜಂದಿರನ್ನು, ತಂತ್ರಜ್ಞರನ್ನು ಕರೆದು ಅವರ ಸಲಹೆ ಪಡೆದು ಸಾವಯವ ರಾಷ್ಟ್ರವನ್ನು ನಿರ್ಮಿಸಿದ. ಆದರೆ ಇಲ್ಲಿ ನಮ್ಮ ರೈತರು ನಮ್ಮ ಭಾಷೆಯಲ್ಲಿ ಪ್ರಕಟವಾಗುವ ಕೃಷಿ ಸಂಬಂಧಿತ ಪತ್ರಿಕೆಗಳನ್ನು ತರಿಸುವುದೂ ಇಲ್ಲ. ಓದುವುದೂ ಇಲ್ಲ. ಕೃಷಿ ಮೇಳಗಳಿಗೆ ಬರುವುದೇ ಇಲ್ಲ. ಇನ್ನು ಯಶೋಗಾಥೆಗಳ ಪರಿಚಯ ಹೇಗಾದೀತು’ ಎದು ಕೇಳುತ್ತಾರೆ ಸಜ್ಜನ.

‘ಇರುವ ನೀರನ್ನೇ ಸದ್ಬಳಕೆ ಮಾಡಿಕೊಳ್ಳಬೇಕು. ಬರುವ ಮಳೆಯಷ್ಟನ್ನೇ ಬಳಸಿ ಬದುಕು ನಡೆಸುವುದನ್ನು ಕಲಿಯಬೇಕು. ಪೇಟೆಗೆ ಹೋಗಿ ದುಡಿಯುವವರಿಗಿಂತಲೂ ಹೆಚ್ಚು ಸಂಬಳ ಹೊಲದಲ್ಲಿದೆ ಎಂದು ತೋರಿಸಿಕೊಡಬೇಕು. ಲಾಭ ಮಾಡಿದರೆ ರೈತರ ಮಕ್ಕಳೇಕೆ ಪೇಟೆಗೆ ಹೋಗುತ್ತಾರೆ’ ಎಂಬುದು ಅವರ ಪ್ರಶ್ನೆ.

ಆನಂದ ನರ್ಸರಿ
ಸಜ್ಜನ ಅವರ ನರ್ಸರಿಯ ಹೆಸರು ಆನಂದ. ಅವರ ಮೂವರು ಮಕ್ಕಳ ಹೆಸರು ವಿವೇಕಾನಂದ, ದಯಾನಂದ ಮತ್ತು ಅರವಿಂದ. ಎರಡು ಕೊಳವೆಬಾವಿ ನೀರಿನಿಂದ ತೋಟ ಮತ್ತು ನರ್ಸರಿಯನ್ನು ನಿರ್ವಹಿಸುತ್ತಿರುವ ಅವರು ನರ್ಸರಿಯಲ್ಲಿ ಒಂದು ಇಂಗುಗುಂಡಿಯನ್ನೂ ನಿರ್ಮಿಸಿದ್ದಾರೆ.

ಹೀಗಾಗಿ ಅಲ್ಲಿನ ಕೊಳವೆ ಬಾವಿಯಲ್ಲಿ ನೀರು ಬತ್ತಿಲ್ಲ. ನರ್ಸರಿಯಲ್ಲಿ ಮರಗಳನ್ನು ಬೆಳೆಸುವ ಕುರಿತ ಸಂದೇಶ ಫಲಕಗಳೂ ವಿಶೇಷ. ಅಲ್ಲಿ ಚೌಕಾಸಿಗೂ ಅವಕಾಶವಿಲ್ಲ.

ಮನೆಯಲ್ಲಿ ಗಿರ್‌ ತಳಿಯ ಹಸುಗಳಿವೆ. ಅವುಗಳಿಗೆ ‘ಅಡವಿ ಹುಲ್ಲು, ಮಡಗಿದ್‌ ನೀರಷ್ಟೇ’ ಆಹಾರ. ಗೋಮೂತ್ರದಿಂದ ಅವರು ಅರ್ಕ ಎಂಬ ಔಷಧಿ ತಯಾರಿಸುತ್ತಿದ್ದಾರೆ. ಅವರ ತಿಪ್ಪೆಗೆ ಇಟ್ಟ ಹೆಸರು ‘ಅಕ್ಷಯ ಸಸ್ಯಕಾಶಿ’.