ಲಂಚ ಆರೋಪದ ಕಳಂಕ ಎಎಪಿಗೆ ಎಚ್ಚರಿಕೆ ಗಂಟೆ

ಭ್ರಷ್ಟಾಚಾರ ವಿರೋಧಿ ಆಂದೋಲನದಿಂದ ಬೆಳೆದು ಬಂದಿರುವ ದೆಹಲಿ ಮುಖ್ಯಮಂತ್ರಿ ಅರವಿಂದ್‌ ಕೇಜ್ರಿವಾಲ್‌ ಅವರ ವಿರುದ್ಧವೇ ಲಂಚದ ಆರೋಪ ಬಂದಿರುವುದು ವಿಪರ್ಯಾಸವೇ ಸರಿ. ಸಚಿವ ಸ್ಥಾನದಿಂದ ವಜಾಗೊಂಡಿರುವ ಎಎಪಿ ಶಾಸಕ ಕಪಿಲ್‌ ಮಿಶ್ರಾ ಅವರೇ ಮುಖ್ಯಮಂತ್ರಿ ವಿರುದ್ಧ ಆರೋಪ ಮಾಡಿದ್ದಾರೆ. ಇದಕ್ಕೆ ಬಲವಾದ ಸಾಕ್ಷ್ಯಾಧಾರಗಳನ್ನೇನೂ ಅವರು ಕೊಟ್ಟಿಲ್ಲ. ಆದರೂ, ಇದರಿಂದ ಎಎಪಿಗೆ ದೊಡ್ಡ ಕಳಂಕ ತಟ್ಟಿರುವುದು ಸುಳ್ಳಲ್ಲ.  ಕೇಜ್ರಿವಾಲ್‌ ವಿರುದ್ಧ ಅಧಿಕಾರ ಲಾಲಸೆ, ಸರ್ವಾಧಿಕಾರಿ ಧೋರಣೆ ಹಾಗೂ ದುರಹಂಕಾರದ ಆರೋಪಗಳನ್ನು ಒಪ್ಪಬಹುದು.  ಲಂಚದ ಆರೋಪಕ್ಕೆ ಬಲವಾದ ಸಾಕ್ಷ್ಯ ಬೇಕು ಎಂದು ಯೋಗೇಂದ್ರ ಯಾದವ್‌ ಹೇಳಿದ್ದಾರೆ. ಮುಖ್ಯಮಂತ್ರಿ ತಪ್ಪು ಮಾಡಿದ್ದಾರೊ, ಇಲ್ಲವೊ ಎಂಬುದು ಆಮೇಲಿನ ಮಾತು. ಆದರೆ,    ಭ್ರಷ್ಟಾಚಾರ ವಿರೋಧಿ ಹೋರಾಟದ ಕೂಸು ‘ಆಮ್‌ ಆದ್ಮಿ ಪಾರ್ಟಿ’ ಆರೋಪಗಳಿಂದಲೇ ಗಾವುದ ದೂರ  ಇರಬೇಕಿತ್ತು. ಅತ್ಯಂತ ಎಚ್ಚರಿಕೆಯಿಂದ ಹೆಜ್ಜೆ ಇಡಬೇಕಿತ್ತು.  ಪಾರದರ್ಶಕ ಆಡಳಿತ ನೀಡುವ ಮೂಲಕ ರಾಜಕೀಯ ವೈರಿಗಳನ್ನೂ ಮೆಚ್ಚಿಸಬೇಕಿತ್ತು. ಅಂತಹದೊಂದು ಅವಕಾಶ ಕಳೆದುಹೋಯಿತು. ಕಾಂಗ್ರೆಸ್‌ ಹಾಗೂ ಬಿಜೆಪಿಯ ಪರಂಪರಾಗತ ರಾಜಕಾರಣಕ್ಕೆ  ಪರ್ಯಾಯ ರಾಜಕೀಯ ಸಂಸ್ಕೃತಿಯನ್ನು  ಎಎಪಿ ಹುಟ್ಟುಹಾಕಬಹುದು ಎಂದು ಜನ  ಭಾವಿಸಿದ್ದರು. ಕೇಜ್ರಿವಾಲ್‌ ಹಾಗೂ ಅವರ ತಂಡದ ಸದಸ್ಯರನ್ನು ಇಡೀ ದೇಶದ ಜನ ಸೂಕ್ಷ್ಮವಾಗಿ ಗಮನಿಸುತ್ತಿದ್ದರು. ಈ ಕಾರಣಕ್ಕೆ ದೆಹಲಿ ಮತದಾರರು ಎಲ್ಲರ ನಿರೀಕ್ಷೆಗಳನ್ನು ಮೀರಿ ಬೆಂಬಲ ಕೊಟ್ಟಿದ್ದರು. ಬಹು ಬೇಗನೆ ಕೇಜ್ರಿವಾಲ್‌ ಜನರ ವಿಶ್ವಾಸ ಕಳೆದುಕೊಂಡರು. ದೆಹಲಿ ಮಹಾನಗರ ಪಾಲಿಕೆ, ಪಂಜಾಬ್‌ ಹಾಗೂ ಗೋವಾ ವಿಧಾನಸಭೆ ಚುನಾವಣೆಗಳೇ ಇದಕ್ಕೆ ಸಾಕ್ಷಿ.