ಐಎಸ್ ಉಗ್ರರ ದಾಳಿಗೆ ಸಿಕ್ಕು ನಲುಗಿದ ನಗರಗಳಲ್ಲಿ ಇರಾಕ್ನ ಮೊಸುಲ್ ಕೂಡ ಒಂದು. ಮೊಸುಲ್ ವಿಶ್ವವಿದ್ಯಾಲಯದ ಭಂಡಾರದಲ್ಲಿದ್ದ ಅಪರೂಪದ ಪುಸ್ತಕಗಳು, ದಾಖಲೆಗಳು ಈ ದಾಳಿಯಿಂದ ಸಂಪೂರ್ಣವಾಗಿ ನಾಶವಾಗಿದ್ದವು. ವಿ.ವಿ.ಯ ಜ್ಞಾನ ಭಂಡಾರ ಮುಂಚಿನಂತೆಯೇ ಸಂಪತ್ಭರಿತವಾಗಬೇಕು ಎಂಬ ಕನಸು ಹೊತ್ತ ಸಾವಿರಾರು ಇರಾಕ್ ಪ್ರಜೆಗಳು ಸೀದಾ ಬಾಗ್ದಾದ್ನ ಮುತಾನಬಿ ಬೀದಿಗೆ ಬಂದರು. ಅಲ್ಲಿ ಬಿಕರಿಗಿದ್ದ ಅಪರೂಪದ ಪುಸ್ತಕಗಳನ್ನು ಖರೀದಿಸಿ ವಿ.ವಿ.ಗೆ ದೇಣಿಗೆ ನೀಡಿ, ಕೃತಾರ್ಥಭಾವ ಅನುಭವಿಸಿದರು.